Serurubele se itshetlehile ka motjheso wa letsatsi hore se futhumatse methapo ya sona e le hore se kgone ho fofa. Empa ke hobaneng ha serurubele se bitswang cabbage white se kgona ho futhumatsa methapo ya sona kapele le ho fofa pele ho tse ding, haeba ho se na letsatsi? Se thuswa ke eng?

 Nahana ka sena: Dirurubele tse fapaneng, di dula letsatsing di kwetse mapheo a tsona kapa di a butse pele di fofa. Le ha ho le jwalo, serurubele se bitswang cabbage white sona se dula letsatsing se butse mapheo a sona jwalo ka tlhaku ya V. Bafuputsi ba bontsha hore e le hore serurubele se fumane motjheso o lekaneng, se lokela hore mapheo a sona a bulehe jwalo ka serurubele sa cabbage white se emang jwalo ka tlhaku ya V. Sebopeho sena sa V, se etsa hore letsatsi le tjhabele hantle methapong e sefubeng sa serurubele mme sena se e thusa hore se be le mofuthu o lekaneng e le hore se kgone ho fofa.

 Bafuputsi ba University of Exeter e England, ba ile ba etsa dipatlisiso tsa hore ba ka kgona ho etsa disebediswa tsa solar tse sebetsang betere ho feta tse fetileng tse emang jwalo ka serurubele se bitswang cabbage white. Ka mora ho etsa disebediswa tsena, ba fumane hore di kgona ho nka matla a letsatsi a fetang tsa pele ka diphesente tse 50.

 Bafuputsi ba boetse ba fumane hape hore karolo e ka hodimo ya mapheo a serurubele sena e ya bonaletsa. Ka hoo, ba ile ba etsa disebediswa tsa solar tse tshwanang le sebopeho sa serurubele sena, le tsela eo mapheo a yona a bonaletsang a entsweng ka yona ho etsa di sebediswa tse kgonang ho monya motjheso wa letsatsi ha bonolo. Sena se ile sa etsa hore Moprofesa Richard ffrench-Constant, e leng e mong wa ditsebi a re, serurubele sena sa cabbage white “se a ipabola ka ho nka motjheso o lekaneng wa letsatsi.”

 Wena o nahanang ka taba ee? Na serurubele sa cabbage white se ikentse hore se eme jwalo ka tlhaku ya V? Kapa na se entswe?