Mosadi o ile a fumana ntho eo monna wa hae a neng a e etsa lekunutung. Monna wa hae o ile a kopa tshwarelo ka tiyo. O ile a tshepisa hore o tla emisa mme o ile a kgona ho emisa ka nakwana. Le ha ho le jwalo o ile a etsa ntho eo hape yaba mosadi wa hae o a fumana hore o qaleletse. A kopa tshwarelo mme a tshepisa hore o tla emisa.

 Na le wena o boemong bo tshwanang? Haeba ho jwalo, o lokela ho hlokomela hore na tlwaelo ya hao ya ho shebella pornography e ama molekane wa hao jwang le hore na o ka etsang ho tlohella mokgwa oo ka ho feletseng. a

Seo re tlo ithuta sona sehloohong sena

•  Seo o lokelang ho se tseba

•  Seo o ka se etsang

•  Haeba monna wa hao a shebella pornography

 Pornography e ka senya lenyalo la hao. E ka etsa hore molekane ya se nang molato a jare molekane wa hae ka pelo le hore a kgaotse ho mo tshepa. b

 Mosadi eo monna wa hae a shebellang pornography a ka nna a ba le maikutlo a latelang:

•   Ho ikutlwa a fetohetswe. Mosadi ya bitswang Sarah o re: “Ke ne ke utlwa eka monna wa ka o entse bofebe hangata.”

•   Ho ikutlwa a se na thuso. Mosadi e mong o re o ne a ikutlwa “a le mobe a bile a tlotlolotswe” hobane monna wa hae a shebella pornography.

•   Ho se mo tshepe. Mosadi ya bitswang Helen o re: “Ke belaella ntho e nngwe le e nngwe eo monna wa ka a e etsang.”

•   Ho tshwenyeha. Mosadi e mong ya bitswang Catherine o re: “Ntho feela eo ke neng ke dula ke nahana ka yona e ne e le hore monna wa ka o shebella pornography.”

 Seo o ka nahanang ka sona: Bibele e re monna o lokela ho rata mosadi wa hae. (Baefese 5:​25) Na o tla be a bontsha hore o a mo rata haeba a etsa hore a ikutlwe ka ditsela tse boletsweng ka hodimo?

 Ha ho bonolo ho tlohella ho shebella pornography. Mosadi ya bitswang Stacey o re: “Monna wa ka o tlohetse ho tsuba sakerete, matekwane le ho nwa jwala empa ha a kgone ho tlohella ho shebella pornography.”

 Haeba o boemong bo tshwanang, ditlhahiso tse latelang di ka o thusa hore o emise mokgwa ona ka ho feletseng.

•   Utlwisisa hore na ke hobaneng ha ho shebella pornography ho fosahetse. Ho shebella pornography ho kgotsofatsa ditakatso tsa boithati mme ho etsa hore lerato, ho tshepana le ho tshepahallana di fele, e leng dintho tse etsang hore lenyalo e be le thabileng. Hape ho bontsha hore motho ha a hlomphe Moqapi wa lenyalo e leng Jehova Modimo.

   Molaomotheo: “Batho bohle ba hlomphe lenyalo.”​—⁠Baheberu 13:⁠4.

•   Nka boikarabelo bakeng sa diketso tsa hao. O se ke wa re: ‘Ho ne ho ke ke ha hlokahala hore ke shebelle pornography hoja mosadi wa ka o ne a mpontsha lerato.’ Ho beha mosadi wa hao molato ke ho mo hlokela toka ebile ho etsa hore o iphe lebaka la hore o shebelle pornography hape hobane o nahana hore ha a o bontshe lerato.

   Molaomotheo: “E mong le e mong o lekwa ke ho hohelwa ke ditakatso tsa hae.”​—Jakobo 1:14.

•   Buisana le molekane wa hao mme o mo bolelle nnete. Monna ya bitswang Kevin o re: “Ke bua le mosadi wa ka letsatsi le leng le le leng. Ke a mo bolella haeba ke ile ka sheba ntho e neng e ka etsa hore ke qalelle ho shebella pornography le haeba ke sa e sheba. Ka lebaka leo, ha a utlwe eka ho na le dintho tseo ke mo patelang tsona.”

   Molaomotheo: “Re lakatsa ho etsa dintho tsohle ka botshepehi.”​—⁠Baheberu 13:⁠18.

•   Dula o le hlokolosi. O ka shebella pornography hape esita le ka mora dilemo tse ngata o se o nahana hore o e tlohetse. Kevin eo ho builweng ka yena pejana o re: “Ke ile ka kgona ho tlohella ho shebella pornography ka dilemo tse leshome mme ke ne ke itjwetsitse hore bothata boo bo fedile empa bo ne bo eso fele.”

   Molaomotheo: “Ya nahanang hore o eme a hlokomele hore a se ke a wa.”​—⁠1 Bakorinthe 10:12.

•   Ha o lekeha, ema hanyane. Le hoja o ke ke wa kgona ho thibela takatso e fosahetseng, o ka kgona ho kgetha hore na o inehela ho yona kapa tjhe. Ha o ithuta ho nahana ka dintho tse ding ha takatso e fihla, mohlomong e tla fela kapele ho feta ka moo o nahanang ka teng.

   Molaomotheo: ‘E mong le e mong a tsebe ho laola mmele wa hae e le hore o dule o halalela ebile o hlompheha. Le se ke la laolwa ke ditakatso tse feteletseng tsa ho etsa thobalano.’​—⁠1 Bathesalonika 4:​4, 5.

•   Qoba maemo a ka etsang hore o shebelle pornography hape. Buka e bitswang Willpower’s Not Enough e re: “Ha o le boemong bo kotsi ho tshwana le ha eka o laeta thutswana ya mollo, ho se ho hlokahala parafini e seng kae feela . . . hore ho tuke.”

   Molaomotheo: “O se ke wa dumella ntho le ha e le efe e mpe ho ntaola.”​—⁠Pesaleme ya 119:​133.

•   O se ke wa lahla tshepo. Ho ka nka nako e telele kapa dilemo hore molekane wa hao a o tshepe hape. Empa banyalani ba bangata ba ile ba kgona ho tshepana hape.

   Molaomotheo: “Motho ya lerato o na le mamello.”​—⁠1 Bakorinthe 13:⁠4.