Na Bibele e Bua ka Pelekatori?

E Bapale

Bibele ya araba

Tjhe, ha e bue ka yona. Ha ho na moo Bibele e buang ka lentswe “pelekatori,” hape ha ho na moo e rutang hore meya ya batho ba shweleng e ya hlwekiswa ha e fihla pelekatoring. a Hlokomela seo Bibele e se rutang ka sebe le lefu le hore seo e rutang se fapane le thuto ya pelekatori.

Ho ba le tumelo mading a Jesu, ke hona ho hlwekisang motho dibeng tsa hae eseng ho ya sebakeng se bitswang pelekatori. Bibele e re “madi a Mora wa hae Jesu a re hlwekisa sebeng sohle” le hore ‘Jesu Kreste . . o ile a re lokolla dibeng tsa rona ka madi a hae.’ (1 Johanne 1:7; Tšenolo 1:5) Jesu o ile a fana “ka moya wa hae hore e be thekollo bakeng sa ba bangata” e le hore a ka hlakola dibe tsa bona.—Matheu 20:28.
Batho ba shweleng ha ba tsebe letho. “Ba phelang baa tseba hore ba tla shwa; empa ha e le ba shweleng, ho hang ha ba tsebe letho.” (Moeklesia 9:5) Ka ha motho ya shweleng ha ho letho leo a le utlwang, ha ho kgonehe hore a ka hlwekiswa ka mollo wa pelekatori.
Motho ha a ahlolelwe dibe ka mora hore a shwe. Bibele e re “moputso oo sebe se o lefang ke lefu” le hore motho ya “shweleng o hlakotswe molato wa sebe sa hae.” (Baroma 6:7, 23) Kahoo, lefu ke kahlolo e tshwanelang sebe.

Thuto ya pelekatori e tswa hokae?

Bagerike ba boholoholo ba ne ba dumela thutong ya pelekatori. Titus Flavius Clemens wa Mogerike ya neng a susumeditswe ke filosofi o ile a bolela hore bafu ba ka hlwekiswa ka mollo. Le ha ho le jwalo, e ne e le Mopapa Gregory e Moholo ya ileng a hatisa hore mollo wa pelekatori ke thuto e ke keng ya hanyetswa ho latela The History of Christian Doctrines. Tlaleho ena e eketsa ka hore Gregory, eo e neng e le mopapa ho tloha ka 590 ho fihlela ka 604 C.E., “hangata o bitswa ‘moqapi wa pelekatori.’ ” Kereke ya Khatholike e ile ya hlalosa dithuto tsa yona tsa pelekatori sebokeng se neng se tshwaretswe Lyons ka selemo sa (1274) yaba ya di hlalosa hape sebakeng se bitswang Florence ka selemo sa (1439) yaba ya netefatswa hape sebokeng se neng se tshwaretswe Trent ka selemo sa 1547.

a Buka ya Orpheus: A General History of Religions e re “ha ho moo ho buang ka pelekatori ka Dikosepeleng.” Ka ho tshwanang, New Catholic Encyclopedia e re: “Ha ho etswa dipatlisiso ka taba ena, ho fumanwe hore thuto ena ya Khatholike e thehuwe meetlong eseng Mangolong a Halalelang.”—Second Edition, Volume 11, leqephe 825.

b Sheba New Catholic Encyclopedia, Second Edition, Volume 11, leqephe 824.