UMbuso waNkulunkulu unguhulumende mbamba lomiswe nguJehova Nkulunkulu. EBhayibhelini, ‘loMbuso waNkulunkulu’ uphindze ubitwe ngekutsi ‘nguMbuso wemazulu’ ngobe ubusa usezulwini. (Makho 1:14, 15; Matewu 4:17) LoMbuso ufana ngetindlela letinyenti nabohulumende bebantfu, kodvwa wona uncono khashane kunabo.

•   Babusi. Nkulunkulu ubeke Jesu Khristu kutsi abe yiNkhosi yaloMbuso futsi umnikete ligunya babusi lababantfu labangayuze babe nalo. (Matewu 28:18) Jesu uwasebetisa kahle emandla akhe njengobe sekakhombisile kutsi ungumbusi loneluvelo nalesingametsemba. (Matewu 4:23; Makho 1:40, 41; 6:31-34; Lukha 7:11-17) Acondziswa nguNkulunkulu, Jesu ukhetse bantfu kuto tonkhe tive labatawuba “ngemakhosi etikwemhlaba” bakanye naye ezulwini.​—Sembulo 5:9, 10.

•   Sikhatsi. Ngalokungafani nabohulumende bebantfu lababusa sikhashana, uMbuso waNkulunkulu ‘angeke uze ubhujiswe.’​—Danyela 2:44.

•   Takhamuti. Nobe ngubani lowenta loko lokufunwa nguNkulunkulu angaba sakhamuti seMbuso waNkulunkulu, kungenandzaba kutsi utalwa kuphi nobe utalwa ngubani.​—Imisebenti 10:34, 35.

•   Imitsetfo. Imitsetfo yeMbuso waNkulunkulu yenta lokungetulu kwekungakuvumeli kutiphatsa lokubi, iphindze yente takhamuti tawo titiphatse kahle kakhulu. Sibonelo nje, liBhayibheli litsi: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngiwo umtsetfo wekucala futsi lomkhulu kunayo yonkhe. Wesibili lofana nawo utsi: ‘Kufanele utsandze makhelwane wakho njengobe utitsandza wena.’” (Matewu 22:37-39) Ngenca yekutsi takhamuti taloMbuso titsandza Nkulunkulu kanye nabomakhelwane, tenta tintfo letizuzisa labanye bantfu.

•   Imfundvo. Njengobe uMbuso waNkulunkulu ufuna takhamuti tawo tiphile ngendlela lehlantekile, uphindze utifundzise kutsi tingakwenta kanjani loko.​—Isaya 48:17, 18.

•   Umgomo. UMbuso waNkulunkulu awuhluphekisi takhamuti tawo kuze babusi bawo baphile kancono. Kunaloko, utawufeza intsandvo yaNkulunkulu, lefaka ekhatsi setsembiso sekutsi labo labatsandza Nkulunkulu batawuphila phakadze emhlabeni lolipharadisi.​—Isaya 35:1, 5, 6; Matewu 6:10; Sembulo 21:1-4.