UYATI kutsi abobani futsi entani lamadvodza lowabona kulesitfombe? Aya emphini, futsi lawa lahamba embili wona ayahlabela. Kodvwa ungahle utibute: ‘Kungani emadvodza lahlabelako wona ete tikhali netinkhemba tekulwa?’ Ase sibone.

Jehoshafati abe yinkhosi yaka-Israyeli wembuso wetive letimbili. Waphila ngasikhatsi sinye neNkhosi Ahabi naJezebeli basembusweni wasenyakatfo wetive letingu-10. Jehoshafati abe yinkhosi lelungile, kantsi nababe wakhe Asa naye abe yinkhosi lenhle. Ngako kwendlula iminyaka leminyenti bantfu bembuso waseningizimu wetive letimbili baphila kamnandzi.

Kodvwa kukhona lokwenteka lokwabetfusa bantfu. Sitfunywa saletsa umbiko kuJehoshafati satsi: ‘Kukhona libutfo lelikhulu lemphi leliphuma kaMowabi, ka-Amoni naseNtsabeni iSeyiri lelitewuhlasela wena.’ Ema-Israyeli lamanyenti ahlangana ndzawonye eJerusalema atewucela lusito kuJehova. Atsi nawefika ethempelini, Jehoshafati wema embikwawo wathandaza watsi: ‘Awu, Nkulunkulu, Jehova, asati kutsi kufanele senteni ngoba tsine site emandla. Emehlo etfu abuke kuwe.’

Jehova wamlalela, wase utfumela inceku yakhe kubantfu kutsi ifike itsi: ‘Kulwa akusiko kwenu, kodvwa kwaNkulunkulu. Angeke sibekhona sidzingo sekuyilwa lemphi. Nine manini nicine, nitewubona kutsi Jehova utanisindzisa njani.’

Ngakusasa ekuseni Jehoshafati wakhuluma nebantfu watsi: ‘Tsembelani kuJehova!’ Ngemuva kwaloko wakhetsa emadvodza kutsi ahlabelele embikwemasotja, abehamba ahlabelela tingoma tekudvumisa Jehova. Uyati kutsi yini leyenteka nabasondzela endzaweni yekulwa? Jehova wabangela lamasotja latitsa kutsi alwe odvwa. Atsi ema-Israyeli nawefika, atfola kutsi onkhe emasotja latitsa abefile.

Uyabona yini kutsi Jehoshafati abente kahle ngekwetsembela kuJehova? Natsi futsi sitawube senta kahle ngekwetsembela kuye.