Nkulunkulu umema bantfu bato tonkhe tive kutsi basondzele kuye ngemthandazo. (Tihlabelelo 65:2) Nobe kunjalo, akalaleli yonkhe imithandazo nobe ayiphendvule yonkhe. Sibonelo saloku kutsi imithandazo yendvodza lephatsa kabi umfati wayo akayilaleli. (1 Phetro 3:7) Nangalesikhatsi ema-Israyeli achubeka nekwenta bubi, Nkulunkulu abengayilaleli imithandazo yawo. Kusebaleni-ke kutsi kuthandaza kulilungelo lelikhulu. Nobe kunjalo, Nkulunkulu uyayemukela imithandazo yalabo labenta tono letinkhulu nangabe baphendvuka.​—Fundza Isaya 1:15; 55:7.

Umthandazo uyincenye yekukhonta kwetfu Nkulunkulu, kungaleso sizatfu kufanele sithandaze kuphela kuMdali wetfu Jehova. (Matewu 4:10; 6:9) Njengobe sibantfu labanesono, kufanele sithandaze ngelibito laJesu ngobe nguye lowasifela. (Johane 14:6) Jehova akafuni kutsi sisolo siphindzaphindza imithandazo lesiyifake enhloko nobe lebhalwe phansi. Ufuna sithandaze ngalokusuka etinhlitiyweni tetfu.​—Fundza Matewu 6:7; Filiphi 4:6, 7.

UMdali wetfu uyayiva ngisho nemithandazo lesiyenta enhlitiyweni. (1 Samuweli 1:12, 13) Usimema kutsi sithandaze nome ngunini, njenganakucala lusuku nanaluphela, nasitawudla, ngisho nanasinetinkinga.​—Fundza Tihlabelelo 55:22; Matewu 15:36.

Kusondzela kuNkulunkulu akusiyo intfo lemelula ngobe siphila nebantfu labangakholwa kuNkulunkulu futsi labedzelela setsembiso sakhe sekuphila emhlabeni lonekuthula. (2 Thimothi 3:1, 4; 2 Phetro 3:3, 13) Ngako-ke siyakudzinga kuhlangana nebazalwane betfu kute sikhutsatane, kantsi nabo futsi bayasidzinga.​—Fundza Hebheru 10:24, 25.

 Kuba nebantfu labatsandza Nkulunkulu kuyasisita kutsi natsi sisondzele kuNkulunkulu. Imihlangano yaboFakazi BaJehova isivulela ematfuba lamahle ekutsi sikhutsatwe kukholwa kwalabanye.​—Fundza Roma 1:11, 12.

Ungasondzela kuJehova ngekuzindla ngaloko lokufundza eVini lakhe. Cabanga ngaloko longakufundza emisebentini yakhe, eselulekweni sakhe, ngisho nasetetsembisweni takhe. Kuzindla nekuthandaza kusisita sicondze kubaluleka kwelutsandvo lwaNkulunkulu kanye nekuhlakanipha kwakhe.​—Fundza Joshuwa 1:8; Tihlabelelo 1:1-3.

Ungaba sedvute naNkulunkulu kuphela nangabe umetsemba futsi ukholwa kuye. Kepha kukholwa kufanana nentfo lephilako ledzinga kondliwa. Kufanele ukondle kukholwa kwakho ngekuhlale uzindla ngetintfo lokholwa kuto.​—Fundza Matewu 4:4; Hebheru 11:1, 6.

Jehova uyabakhatsalela labo labamtsandzako. Uyakwati kubavikela kunome yini lengenta kukholwa kwabo nelitsemba labo lekuphila phakadze libe sengotini. (Tihlabelelo 91:1, 2, 7-10) Uyasecwayisa ngetindlela tekuphila letingafaka imphilo kanye nenjabulo yetfu engotini. Jehova usifundzisa indlela lencono kakhulu yekuphila.​—Fundza Tihlabelelo 73:27, 28; Jakobe 4:4, 8.