Bubi emhlabeni bacala ngesikhatsi Sathane akhuluma emanga ekucala. Ekucaleni Sathane abeyingilosi lenhle, kodvwa ‘akemanga ecinisweni.’ (Johane 8:44) Waba nesifiso sekukhontwa, lokuyintfo lokufanele inikwetwe Nkulunkulu kuphela. Sathane wacala emanga ku-Eva, wesifazane wekucala, futsi wamyengela ekutseni alalele yena esikhundleni sekulalela Nkulunkulu. Adamu wahlanganyela na-Eva ekungamlalelini Nkulunkulu. Lesincumo sa-Adamu sabangela kuhlupheka kanye nekufa.​—Fundza Genesisi 3:1-6, 19.

Ngesikhatsi Sathane abangela Eva kutsi angamlaleli Nkulunkulu, abecalisa kuvukela bukhosi baNkulunkulu, nobe lilungelo laNkulunkulu lekubusa. Linyenti lebantfu lihlanganyele naSathane ekwaleni kutsi Nkulunkulu abe nguMbusi wabo. Ngako-ke, Sathane ‘sewungumbusi welive.’​—Fundza Johane 14:30; 1 Johane 5:19.

Yonkhe imisebenti yaNkulunkulu iphelele. Bantfu netingilosi letadalwa nguNkulunkulu bebangakhona kumlalela ngaphandle kwenkinga. (Dutheronomi 32:4, 5) Nkulunkulu wasidala saba nenkhululeko yekutikhetsela kutsi sitawenta lokulungile nobe lokubi. Lenkhululeko isiniketa litfuba lekukhombisa kutsi siyamtsandza Nkulunkulu.​—Fundza Jakobe 1:13-15; 1 Johane 5:3.

Nkulunkulu solo ukubeketelele kuvukelwa kwebukhosi bakhe kusukela e-Edeni. Kungani? Ufuna kukhombisa kutsi ayikho leminye emetamo yekubusa leyawuzuzisa bantfu ngaphandle kwekubuswa nguye. (Umshumayeli 7:29; 8:9) Loku kubonakala kahle kuleminyaka lengu-6 000 yekuphila  kwebantfu leseyendlulile. Babusi lababantfu behlulekile kucedza timphi, bugebengu, kungalungi kanye kanye netifo.​—Fundza Jeremiya 10:23; Roma 9:17.

Ngekungafanani nekubusa kwebantfu, kubusa kwaNkulunkulu kutawubazuzisa labo labakwemukelako. (Isaya 48:17, 18) Madvutane, Jehova uyawucedza bonkhe bohulumende bebantfu. Ngulabo labakhetsa kubuswa nguNkulunkulu kuphela labatawuhlala emhlabeni.​—Isaya 11:9; Fundza Danyela 2:44.

Sathane watsi kute umuntfu longakhonta Nkulunkulu ngalokusuka enhlitiyweni. Ungatsandza yini kukhombisa kutsi loko bekungemanga? Ungakwati kukukhombisa loko! Kubeketela kwaNkulunkulu kusiniketa litfuba lekuveta kutsi sifuna kubuswa nguNkulunkulu nobe kubuswa bantfu. Indlela lesiphila ngayo ikhombisa loko lesikukhetsako kulendzaba.​—Fundza Jobe 1:8-12; Taga 27:11.

Singabonisa kutsi sikhetsa kubuswa nguNkulunkulu ngekutsi sifune inkholo yeliciniso lesekelwe eBhayibhelini futsi sichubeke sikuyo. (Johane 4:23) Singakhombisa kutsi asifuni kubuswa nguSathane ngekutsi silingise Jesu, singangeni etindzabeni tepolitiki kanye nasetimphini.​—Fundza Johane 17:14.

Sathane usebentisa emandla akhe kute atfutfukise kutiphatsa lokubi. Nangabe siyilahla lemikhuba lemibi, labanye bangani betfu kanye netihlobo bangahlekisa ngatsi nobe basiphikise. (1 Phetro 4:3, 4) Ngako-ke, kufanele sikhetse. Sitawutihlanganisa yini nebantfu labatsandza Nkulunkulu? Sitayilalela yini imitsetfo yakhe lehlakaniphile nalekhombisa kutsi uyasitsandza? Nasenta njalo, sitawube sikhombisa kutsi Sathane abenemanga ngesikhatsi atsi kute umuntfu longalalela Nkulunkulu nangabe acindzetelekile.​—Fundza 1 Khorinte 6:9, 10; 15:33.

Lutsandvo lwaNkulunkulu ngebantfu lusicinisekiso sekutsi bubi nekuhlupheka kutawuphela. Labo labakhombisako kutsi bayakukholelwa loku batawuphila emhlabeni phakadze.​—Fundza Johane 3:16.