1. Iyini injongo yaNkulunkulu ngemhlaba?

INJONGO yaNkulunkulu ngemhlaba iyamangalisa. Jehova ufuna kutsi emhlabeni kuhlale bantfu labajabulile nalabaphile saka. LiBhayibheli litsi “Nkulunkulu wahlanyela insimi yase-Edeni” futsi “wamilisa emhlabatsini tonkhe tihlahla letibukekako letimnandzi.” Ngemuva kwekutsi Nkulunkulu adale indvodza yekucala nemfati wekucala, bo-Adamu na-Eva, wase ubabeka ekhaya lelihle watsi kubo: “Talanani, nandze, nigcwalise umhlaba, niwuncobe.” (Genesisi 1:28; 2:8, 9, 15) Ngako-ke, kwakuyinjongo yaNkulunkulu kutsi bantfu babe nebantfwana, banwebele lelikhaya labo leliyinsimi emhlabeni wonkhe futsi banakekele netilwane.

2. (a) Sati njani kutsi injongo yaNkulunkulu ngemhlaba itawugcwaliseka? (b) Ngekusho kweliBhayibheli bantfu labanjani labatawuphila phakadze?

² Ucabanga kutsi injongo yaNkulunkulu Jehova yekutsi bantfu bahlale epharadisi emhlabeni itawugcwaliseka yini? Nkulunkulu utsi: “Loko lese ngikushito, nguloko lengiyawukuphumelelisa.” (Isaya 46:9-11; 55:11) Yebo, loko Nkulunkulu lakuhlosile kutawufezeka nakanjani! Utsi umhlaba “akazange awudalele kutsi ubete lutfo, kodvwa wawubumbela kutsi uhlale bantfu.” (Isaya 45:18) Nkulunkulu  abefuna kutsi kuhlale bantfu labanjani emhlabeni? Abefuna kutsi bahlale sikhatsi lesingakanani? LiBhayibheli liyaphendvula: “Labalungile bayawudla lifa lemhlaba, bahlale kulo kuze kube phakadze.”—Tihlabelelo 37:29; Sembulo 21:3, 4.

3. Ngusiphi simo lesibuhlungu lesikhona emhlabeni lamuhla, futsi ngimiphi imibuto lephakamako?

³ Kuyacaca-ke kutsi loku kusengakenteki. Bantfu bayagula futsi bayafa; labanye bayalwa baze babulalane. Kukhona lokonakala. Kuliciniso kutsi Nkulunkulu abengakahlosi kutsi umhlaba ube njengobe siwubona lamuhla! Konakalaphi? Kungani injongo yaNkulunkulu ingakagcwaliseki? Kute incwadzi yemlandvo lebhalwe ngumuntfu lengasitjela ngobe lenkinga yacala ezulwini.

4, 5. (a) Ngubani lowakhuluma na-Eva asebentisa inyoka? (b) Umuntfu lohloniphekile futsi lowetsembekile angaba njani lisela?

⁴ Incwadzi yekucala yeliBhayibheli isitjela ngemphikisi waNkulunkulu lowabonakala ensimini yase-Edeni. Imbita ngekutsi ‘yinyoka,’ kodvwa abengasiso silwane. Incwadzi yekugcina yeliBhayibheli yona imbita “ngekutsi nguMhlebi nome nguSathane, uMkhohlisi wemhlaba wonkhe.” Iphindze imbite ngekutsi ‘yinyoka yasemandvulo.’ (Genesisi 3:1; Sembulo 12:9) Lengilosi lenemandla, nobe sidalwa semoya lesingabonakali, yasebentisa inyoka nayikhuluma na-Eva. Loku kufanana naloko lokungentiwa ngumuntfu lonelikhono longatsi lapho akhuluma ente shengatsi kukhuluma umdoli loseceleni kwakhe. Asingabati-ke kutsi lesidalwa semoya sasikhona ngalesikhatsi Nkulunkulu adala umhlaba kute kuhlale bantfu.—Jobe 38:4, 7.

⁵ Njengobe yonkhe indalo yaJehova iphelele, ngubani-ke lowadala ‘loMhlebi,’ ‘loSathane’? Kalula nje, lomunye wemadvodzana aNkulunkulu lanemandla watenta yena kutsi abe nguMhlebi. Kwenteka njani loko? Angitsi kungenteka kutsi umuntfu lohloniphekile futsi lowetsembekile abe  lisela. Kungenteka njani? Lomuntfu angavumela sifiso lesibi kutsi sakheke enhlitiyweni yakhe. Nangabe ahlala acabanga ngaso, lesifiso siyakhula. Ngako-ke nakuvela litfuba, wenta yona kanye lentfo lembi labeyicabanga.—Jakobe 1:13-15.

6. Indvodzana yaNkulunkulu lengumoya yaba njani nguSathane Develi?

⁶ Kwenteka kanjalo-ke nangaSathane Develi. Kungenteka kutsi wamuva Nkulunkulu ngalesikhatsi atjela bo-Adamu na-Eva kutsi babe nebantfwana futsi batalane bandze bagcwalise umhlaba. (Genesisi 1:27, 28) Ngako-ke Sathane wacabanga, ‘Bonkhe labantfu bangakhulekela mine esikhundleni saNkulunkulu!’ Sifiso lesibi sakheka enhlitiyweni yakhe. Ekugcineni wakhohlisa Eva ngekukhuluma emanga ngaNkulunkulu. (Genesisi 3:1-5) Wase uba “nguDeveli” lokusho kutsi “uMkhohlisi.” Waphindze waba “nguSathane” lokusho kutsi “uMphikisi.”

7. (a) Kungani bo-Adamu na-Eva bagcine bafile? (b) Kungani yonkhe intalo ya-Adamu iguga futsi ifa?

⁷ Ngekusebentisa emanga nebucili, Sathane Develi wenta kutsi bo-Adamu na-Eva bangamlaleli Nkulunkulu. (Genesisi 2:17; 3:6) Umphumela waba kutsi bagcine bafile njengobe Nkulunkulu abeshito kutsi batawufa nabangamlaleli. (Genesisi 3:17-19) Njengobe Adamu waba ngulongakapheleli ngesikhatsi ona, bonkhe bantfwana bakhe batfola lifa lelisono kuye. (Roma 5:12) Lendzaba singayifananisa nelipani lekubhaka tinkhwa. Nangabe lelipani linesifaca, kwentekani ngaletinkwa letibhakwa ngalo? Tonkhe tiphuma tinesifaca. Ngalokufananako-ke, natsi sitfole “sifaca” sekungapheleli ku-Adamu. Kungako nje siguga futsi sifa.—Roma 3:23.

8, 9. (a) Nguyiphi insayeya leyabekwa nguSathane? (b) Kungani Nkulunkulu angazange atibulale ngaso leso sikhatsi letihlubuki?

⁸ Ngesikhatsi Sathane enta kutsi bo-Adamu na-Eva bone kuNkulunkulu, abehola ekuhlubukeni. Abebekela kubusa kwaJehova insayeya. Empeleni Sathane abetsi: ‘Nkulunkulu ungumbusi lomubi, ucala emanga futsi  ugodlela bantfu tintfo letinhle. Bantfu abakudzingi kubuswa nguye. Bangatikhetsela bona kutsi ngukuphi lokulungile nalokungakalungi. Kutawubahambela kahle nabangabuswa ngimi.’ Yini Nkulunkulu labengayenta ngalokudzelelwa lokunjena? Labanye bacabanga kutsi ngabe Nkulunkulu watibulala ngaso leso sikhatsi letihlubuki. Kodvwa loko bekutayiphendvula  yini lensayeya yaSathane? Kwakungabonisa yini kutsi indlela yaNkulunkulu yekubusa ilungile?

⁹ Imfanelo yaJehova lephelele yekulunga ayizange imvumele kutsi abulale letihlubuki ngaleso sikhatsi. Wancuma kutsi kudzingeka sikhatsi kute aphendvule insayeya yaSathane ngendlela leyenetisako futsi abonise kutsi Develi ungumcambimanga. Ngako-ke, Nkulunkulu wakhetsa kutsi abayekele bantfu batibuse sikhashana bacondziswa nguSathane. Sizatfu lesenta Jehova wenta kanjalo nalesimente watsatsa sikhatsi lesidze ngembi kwekutsi alungise lendzaba, kutawucocwa ngaso eSehlukweni 11 salencwadzi. Kwanyalo kuhle kutsi ucabange ngaloku: Kwakusincumo lesihle yini ngabo-Adamu na-Eva kulalela Sathane, longazange abentele lokuhle? Kwakulungile yini ngabo kukholwa kutsi Jehova labebebanike konkhe lebebanako, ungumcambimanga lonelunya? Wena bewungenta njani?

10. Ungalusekela njani luhlangotsi lwaJehova ekuphendvuleni insayeya yaSathane?

¹⁰ Kuhle kutsi sicabange ngalemibuto ngobe ngamunye wetfu uhlangabetana netinkinga letitsi atifane naleti. Kodvwa wena unelitfuba lekusekela luhlangotsi lwaJehova kute aphendvule lensayeya yaSathane. Ungamemukela Jehova njengeMbusi wakho, futsi ubonise kutsi Sathane ungumcambimanga. (Tihlabelelo 73:28; Taga 27:11) Lokudzabukisako kutsi bambalwa kuphela bantfu labakhetsa kwenta njalo kuletigidzigidzi letikhona emhlabeni. Loku kuphakamisa umbuto lobalulekile, liBhayibheli lifundzisa kutsi nguSathane yini vele lobusa lelive?

11, 12. (a) Kulingwa kwaJesu kubonisa njani kutsi Sathane nguye lobusa lelive? (b) Yini lenye lebonisa kutsi Sathane nguye longumbusi walelive?

¹¹ Jesu akazange akungabate kutsi nguSathane lobusa lelive. Ngalelinye lilanga ngendlela lesimanga, Sathane  wakhombisa Jesu “yonkhe imibuso nebucwebecwebe bayo.” Ngako wetsembisa Jesu loku: “Konkhe loku ngitakunika kona, nawungamane uwe phansi nje, ungikhotsame.” (Matewu 4:8, 9; Lukha 4:5, 6) Cabanga ngaloku. Bekutawuba silingo yini loku kuJesu kube Sathane abengesuye umbusi walemibuso? Jesu akazange akuphike kutsi bonkhe labohulumende baSathane. Ngalokucinisekile, kube Sathane abengesuye umbusi walemibuso, Jesu abengakwenta konkhe loko abekusho.

¹² Kuliciniso kutsi Jehova nguNkulunkulu somandla, uMdali wemhlaba nesibhakabhaka lesimangalisako. (Sembulo 4:11) Akukho lapho liBhayibheli lisho khona kutsi Nkulunkulu Jehova nobe Jesu Khristu bababusi balelive. Ngebusuku bakhe bekugcina alapha emhlabeni Jesu wabita Sathane ngalokucondzile ngekutsi nguye “umbusi walelive.” (Johane 12:31; 14:30; 16:11) LiBhayibheli liphindze libite Sathane Develi ngekutsi ‘ngunkulunkulu walomhlaba.’ (2 Khorinte 4:3, 4) Macondzana nalomphikisi nobe Sathane, umphostoli Johane wabhala: “Umhlaba wonkhe ungephansi kwemandla aLomubi.”—1 Johane 5:19.

13. Kungani sidzinga live lelisha?

¹³ Umnyaka ngamunye bubi buchubeka bandza kakhulu. Kugcwele emabutfo lalwako, betembusave labangakatsembeki, baholi benkholo labatentisako, kanye netigebengu letite nembeza. Kute umuntfu longakwati kulungisa lelive. LiBhayibheli libonisa kutsi sesisedvute sikhatsi lapho Nkulunkulu atawususa khona lelive lelibi emphini yakhe i-Amagedoni. Loku kutawuvulela live lelisha indzawo.—Sembulo 16:14-16.

14. Ngubani Nkulunkulu lamkhetse kutsi abe nguMbusi weMbuso wakhe, futsi loku kwabiketelwa njani?

¹⁴ Nkulunkulu Jehova ukhetse Jesu Khristu kutsi abe nguMbusi weMbuso wakhe wasezulwini nobe hulumende.  Endvulo liBhayibheli labiketela loku: “Ngobe tsine sitalelwe umntfwana, siphiwe indvodzana. Umbuso uyawuba semahlombe akhe. Uyawutsiwa . . . yiNkhosi Yekuthula. Umbuso wakhe uyawukhula, kuthula nenhlalakahle kungeke kuphele.” (Isaya 9:6, 7) Macondzana nembuso, Jesu wafundzisa balandzeli bakhe kutsi bathandaze kanjena: “Umbuso wakho awute. Intsandvo yakho ayentiwe emhlabeni, njengobe yentiwa ezulwini.” (Matewu 6:10) Njengobe sitawubona kulencwadzi, uMbuso waNkulunkulu utawususa bonkhe labohulumende bese wona utsatsa sikhundla. (Danyela 2:44) UMbuso waNkulunkulu utawubese uletsa lipharadisi emhlabeni.

15. Uyini ‘umhlaba lomusha’?

¹⁵ LiBhayibheli liyasicinisekisa: “Kepha ngesetsembiso [saNkulunkulu] silindzele emazulu lamasha, nemhlaba lomusha, lapho kubusela khona kulunga.” (2 Phetro 3:13; Isaya 65:17) Ngalesinye sikhatsi liBhayibheli nalikhuluma ‘ngemhlaba’ lisuke libhekisele kubantfu labahlala kuwo. (Genesisi 11:1) Ngako ‘umhlaba lomusha’ lolungile usicumbi sebantfu labemukelwa nguNkulunkulu.

16. Ngusiphi sipho lesiligugu Nkulunkulu latsi utasiniketa labo labamukelako, futsi yini lokufanele siyente kute sisitfole?

¹⁶ Jesu wetsembisa kutsi emhlabeni lomusha, labo labemukelwa nguNkulunkulu batawutfola sipho ‘lesikuphila lokuphakadze.’ (Makho 10:30) Sicela uvule liBhayibheli lakho kuJohane 3:16 nakusehluko 17:3, ufundze kutsi Jesu watsi yini lokufanele siyente kute sitfole kuphila lokuphakadze. Nyalo cabanga ngetibusiso liBhayibheli lelitsi titawujatjulelwa ngulabo labatawutfola sipho lesihle lesivela kuNkulunkulu ePharadisi lasemhlabeni lelitako.

17, 18. Singaciniseka njani kutsi kuyoba nekuthula nekulondzeka emhlabeni wonkhe?

¹⁷ Bubi, timphi, bugebengu, kanye nebudlova kuyophela.  “Benti balokubi bayawunyamalala . . . Kodvwa labamnene bayawulidla lifa lemhlaba.” (Tihlabelelo 37:10, 11) Kutawuba nekuthula ngobe ‘Nkulunkulu uyawucatulula imibango yetive letinyenti.’ (Tihlabelelo 46:9; Isaya 2:4) ‘Ngemalanga ayo kutawandza kulunga, kwandze nekuthula siphelane.’—futsi loko kusho kutsi phakadze.—Tihlabelelo 72:7.

¹⁸ Tikhonti taJehova tiyophila ngekulondzeka. Ngalesikhatsi ema-Israyeli alalela Nkulunkulu, abephila ngekulondzeka. (Levithikhusi 25:18, 19) Cabanga kutsi kuyoba kuhle kanjani nasekunekulondzeka lokunjalo ePharadisi!—Isaya 32:18; Mikha 4:4.

19. Yini lesenta sati kutsi eveni lelisha laNkulunkulu kudla kuyoba yinala?

¹⁹ Angeke isaba khona indlala. Umhlabeleli wahlabela watsi: ‘Kutawuba nenala emasimini, lenala isibekele ticongo tetintsaba, kube tiphihli.’ (Tihlabelelo 72:16) Nkulunkulu Jehova utawubusisa labalungile, futsi ‘umhlaba utawuba nesivuno lesihle senala.’—Tihlabelelo 67:6.

20. Yini lesicinisekisako kutsi wonkhe umhlaba uyoba lipharadisi?

²⁰ Umhlaba wonkhe uyoba lipharadisi. Emhlabeni lowonakaliswe bantfu labanesono kuyokwakhiwa tindlu letinhle futsi kulinywe netingadzi. (Isaya 65:21-24; Sembulo 11:18) Njengobe sikhatsi sichubeka tincenye temhlaba letinebantfu tiyonwetjwa kuze kube ngulapho umhlaba wonkhe sewumuhle futsi ukhicita njengensimi yase-Edeni. Nkulunkulu angeke ehluleke ‘kuvula sandla sakhe esutsise tonkhe tifiso talokuphilako.’—Tihlabelelo 145:16.

21. Yini lekhombisa kutsi kuyoba nekuthula emkhatsini webantfu netilwane?

²¹ Kuyoba nekuthula emkhatsini webantfu netilwane. Tilwane tesiganga naletifuywako tiyodla ndzawonye. Ngisho tilwane letiyingoti lamuhla, umfana lomncane angeke atesabe—Isaya 11:6-9; 65:25.

22. Yini leyowenteka ngekugula?

 ²² Kugula kuyophela. NjengeMbusi weMbuso waNkulunkulu wasezulwini, Jesu utawelapha bantfu ngelizinga lelisetulu kwendlula indlela labebalapha ngayo ngalesikhatsi alapha emhlabeni. (Matewu 9:35; Makho 1:40-42; Johane 5:5-9) Ngemuva kwaloko “kute lohlala [khona] loyakutsi: ‘Ngiyagula.’”—Isaya 33:24; 35:5, 6.

23. Kungani kuvuswa kwalabafile kutasiletsela injabulo etinhlitiyweni tetfu?

²³ Tihlobo tetfu letifile tiyovuswa setinelitsemba lekungaphindzi tife. Bonkhe labo labafile labasenkhumbulweni yaNkulunkulu bayovuswa. Ecinisweni “labalungile nalabangakalungi, bayawuvuka ekufeni.”—Imisebenti 24:15; Johane 5:28, 29.

24. Utiva njani ngekuphila ePharadisi emhlabeni?

²⁴ Cabanga ngelikusasa lelihle lelilindzelwe ngulabo labakhetsa kufundza nekukhonta uMdali wetfu Lophakeme, Nkulunkulu Jehova. Jesu abekhuluma ngeliPharadisi lelitako emhlabeni ngalesikhatsi etsembisa lesinye saletigelekece labetselwa nato nakatsi: “Utakuba nami ePharadisi.” (Lukha 23:43) Kubaluleke kakhulu kutsi sifundze lokunyenti ngaJesu Khristu, letiyotfolakala ngaye tonkhe letintfo.