Bazalwane Betfu Labatsandzekako:

Eminyakeni lembalwa leyendlulile, magazini lohanjiswako we-Sicongosekulindza waba neluchungechunge lolusha lolujabulisako lolunesihloko lesitsi “Lingisa Kukholwa Kwabo.” Kusukela ngaleso sikhatsi, besikujabulela kushicilela sihloko lesisha kuloluchungechunge njalo ngemuva kwetinyanga letitsite.

Bafundzi baletihloko batsintseke njani? Ngemuva kwekutsi acedze kufundza sihloko lesikhuluma ngaMata, lomunye umfundzi wabhala watsi: “Ngavele ngahleka ngesikhatsi ngisifundza ngobe nami ngifana naye​—ngiyakutsandza kutemukela kahle tivakashi nekuba matasatasa kakhulu ngize ngikhohlwe nekutsi kufanele ngiyekele loko lengikwentako, bese ngijabulela kuba nebangani bami.” Lomunye losemusha waphetsa ngalamavi ngemuva kwekufundza indzaba lekhuluma nga-Esta: “Ngiyavuma kutsi ngaletinye tikhatsi sikhatsateka kakhulu ngetimphahla tekugcoka nangemfashini. Kona kufanele sembatse kahle, kodvwa akukafaneli secise.” Wachubeka watsi: “Jehova unaka loko lesingiko ngekhatsi.” Sihloko lesikhuluma ngemphostoli Phetro senta lomunye dzadze washo lamavi ngenjabulo: “Nami ngatibona ngikhona nakwenteka lendzaba. Kwaba shengatsi yenteka mbamba! Bengetama kutibeka esimeni salabo lengifundza ngabo kute ngibone kutsi bebativa njani.”

Labafundzi kanye nalabanye labanyenti labasibhalele kute babonge ngenca yaletihloko, baveta kuba liciniso kwemavi labhalwa ngumphostoli Pawula endvulo, latsi: “Tonkhe tintfo letabhalwa kadzeni tabhalelwa kufundzisa tsine.” (Rom. 15:4) Jehova wente kutsi letindzaba tifakwe eBhayibhelini kute tisifundzise tifundvo letibalulekile. Ngisho nobe sesineminyaka lengakanani sati liciniso, sonkhe singafundza kuto.

Sikukhutsata ngemusa kutsi uyifundze ngekushesha lencwadzi ngemuva kwekuyitfola. Yifake eluhlelweni lwenu lweKukhonta Kwemndeni, ngobe bantfwana batayijabulela. Ngesikhatsi seyifundvwa eSifundvweni SeliBhayibheli Selibandla, ungaphutsi! Yifundzisise kahle futsi ungajaki. Kubone ngeliso lengcondvo loko lokufundzako, utifake kuko. Yetama kucondza indlela lebebativa ngayo labantfu lokukhulunywa ngabo eBhayibhelini, ubone naloko lebebakubona. Catsanisa loko lebebakwenta etimeni letehlukahlukene naloko wena lobewutawukwenta.

Sijabula kakhulu ngekusebentisa lencwadzi kanye nani. Shengatsi ingaba sibusiso kini nasemindenini yenu. Sinitsandza kakhulu futsi sinifisela lokuhle,

Sigungu Lesibusako SaboFakazi BaJehova