SIFUNDVO 57
Yini Lokufanele Uyente Nangabe Wente Sono Lesikhulu?
Ngisho nobe umtsandza kakhulu Jehova futsi wetama kamatima kungatenti tintfo letitamvisa buhlungu, kodvwa utawuhle uwenta emaphutsa. Nobe kunjalo, lamanye emaphutsa mabi kakhulu kunalamanye. (1 KubaseKhorinte 6:9, 10) Nangabe wente sono lesikhulu, khumbula kutsi Jehova angeke ayekele kukutsandza, ufuna kukutsetselela nekukusita.
1. Yini lokufanele siyente kuze Jehova asitsetselele?
Labo labatsandza Jehova beva buhlungu kakhulu nababona kutsi bente sono lesikhulu. Kodvwa Jehova uyabadvudvuta ngalesetsembiso lesitsi: “Nome ngabe tono tenu tibovu njengengati, titakwentiwa tibe mhlophe njengelichwa.” (Isaya 1:18) Nangabe siphendvuka mbamba, Jehova utasicolela. Siphendvuka njani? Sitisola kakhulu ngaloku lesikwentile futsi sicele Jehova asicolele. Setama kamatima kushintja indlela lembi lesicabanga ngayo nobe siyekele kwenta tintfo letimbi letisiholele kulesono, futsi setame kuphila ngekuvumelana netimiso taJehova letihlantekile.—Fundza Isaya 55:6, 7.
2. Jehova ubasebentisa njani labadzala belibandla kuze basisite nasente sono?
Nangabe sente sono lesikhulu, Jehova usitjela kutsi ‘sibite labadzala belibandla.’ (Fundza Jakobe 5:14, 15.) Lamadvodza ayamtsandza Jehova netimvu takhe. Aceceshiwe kutsi angasisita njani kuze silungise buhlobo betfu naJehova.—KubaseGalathiya 6:1.
Labadzala belibandla basisita njani nangabe sente sono lesikhulu? Labadzala lababili nobe labatsatfu batasisita basebentisa seluleko lesiseBhayibhelini. Batawuphindze basisite sibone loko lesingakwenta kuze sikubalekele kuphindze sente sono lesifanako futsi basikhutsate. Bangahle bancume kutsi singatenti letinye tintfo ebandleni sikhatsi lesitsite kuze kube ngulapho siphindze siba nebuhlobo lobuhle naJehova. Kuze kuvikelwe libandla, labadzala bayamyekelisa kuba nguFakazi umuntfu lowente sono lesikhulu futsi longaphendvuki.
CHUBEKA UFUNISISA
Khulisa lizinga lobonga ngalo ngendlela Jehova lasisita ngayo nasente sono lesikhulu.
3. Kuvuma sono kuyasisita kutsi siphindze sibe nebuhlobo lobuhle naJehova
Nobe ngusiphi sono lesisentako simvisa buhlungu Jehova, kungako kufanele sisivume kuye. Fundza Tihlabelelo 32:1-5, bese nicoca ngalombuto:
-
Kukahle ngani kuvuma tono tetfu kuJehova kunekutsi sitifihle?
Ngetulu kwekuvuma tono tetfu kuJehova, sitawutiva sincono kakhulu nasicela nelusito kulabadzala belibandla. Dlala le-VIDEO, bese nicoca ngalombuto lolandzelako.
-
Kule-video, labadzala belibandla bamsite njani Canon kutsi abuyele kuJehova?
Kufanele sibatjele konkhe labadzala belibandla, singabafihleli lutfo ngobe basuke bafuna kusisita. Fundza Jakobe 5:16, futsi nicoce ngalombuto:
-
Yini leyenta kube melula ngalabadzala belibandla kutsi basisite nangabe singabafihleli lutfo?
Vuma sono sakho, ungabafihleli lutfo labadzala belibandla futsi uvume kusitwa nguJehova
4. Kusita ngani kuyekelisa umuntfu kuba nguFakazi?
Nangabe umuntfu lowente sono lesikhulu angafuni kuphila ngetimiso taJehova, angeke achubeke ayincenye yelibandla. Uyayekeliswa kuba nguFakazi futsi asitihlanganisi naye nobe sikhulume naye. Fundza 1 KubaseKhorinte 5:6, 11 na-2 Johane 9-11, bese nicoca ngalombuto:
-
Njengobe sibiliso silatisa inhlama, lingatsintseka njani libandla nangabe litihlanganisa nemuntfu longaphendvuki?
Labanyenti labayekelisiwe kuba boFakazi babese bayabuya ebandleni, ngobe nanobe sijeziso sibuhlungu kodvwa siyabasita bashintje. (Tihlabelelo 141:5) Dlala le-VIDEO, bese nicoca ngalombuto lolandzelako.
-
Kule-video, kwamsita njani Sonja kuyekeliswa kuba nguFakazi?
Kuyekelisa umuntfu kuba nguFakazi . . .
-
kulidvumisa njani libito laJehova?
-
kukhombisa njani kutsi Jehova uyacabangela futsi unelutsandvo?
5. Jehova uyasicolela nangabe siphendvuka
Jesu wasebentisa umfanekiso losisita sibone indlela Jehova lativa ngayo nangabe siphendvuka. Fundza Lukha 15:1-7, bese nicoca ngalombuto:
-
Loku kukufundzisani ngaJehova?
Fundza Hezekeli 33:11, bese nicoca ngalombuto:
-
Yini lebalulekile lokufanele siyente kuze sikhombise kutsi siphendvukile?
Njengemelusi, Jehova utinakekela mbamba timvu takhe
LABANYE BANTFU BATSI: “Ngiyesaba kutsi nangingatjela labadzala belibandla ngesono sami ngitawuyekeliswa kuba nguFakazi.”
-
Yini longayisho kumuntfu lotiva ngalendlela?
LOKO LESICOCE NGAKO
Nangabe sente sono lesikhulu futsi sitisola mbamba siphindze siyekele kwenta lokubi, Jehova utasicolela.
Yini Loyifundzile?
-
Kuhle ngani kuvuma tono tetfu kuJehova?
-
Yini lokufanele siyente kuze Jehova asicolele tono tetfu?
-
Nangabe sente sono lesikhulu, kungani kufanele sicele lusito kulabadzala belibandla?
LOKUNYE LONGAKUHLOLA
Buka kutsi lenye indvodza yawutfola njani umusa waJehova lochazwe ku-Isaya 1:18.
Kusita ngani kuyekelisa umuntfu kuba nguFakazi?
Fundza kutsi ungamchazela njani umuntfu longesuye Fakazi kutsi kungani ngalesinye sikhatsi umuntfu ayekeliswa kuba nguFakazi.
“BoFakazi BaJehova Bayabecwaya Yini Labake Babangemalunga Enkholo Yabo?” (Sihloko lesiku-internet)
Kulendzaba letsi “Bengikudzinga Kubuyela KuJehova,” fundza kutsi kungani lendvodza lebeyishiye liciniso yeva shengatsi Jehova uphindze wayidvonsa.
“LiBhayibheli Liyakugucula Kuphila” (Sicongosekulindza, sa-April 1, 2012)
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
