SIFUNDVO 30
Bantfu Lobatsandzako Batawuphindze Baphile!
Kufa kubangela lusizi nebuhlungu lobukhulu. Kungako liBhayibheli litsi kufa kusitsa. (1 KubaseKhorinte 15:26) ESifundvweni 27, sifundze kutsi Jehova utasincoba lesitsa. Nobe kunjalo, kutawentekani kulabo lesebavele bafile? Kulesifundvo, utawufundza ngalesinye setsembiso saJehova lesimangalisako sekuvusa bantfu labafile kuze bajabulele kuphila kuze kube phakadze. Utawubavusa ekufeni! Kungenteka yini vele loko? Batawuvuselwa ezulwini yini nobe emhlabeni?
1. Yini Jehova latayenta etihlotjeni tetfu letashona?
Jehova ulangatelela kuvusa bantfu lasebafa. Jobe indvodza lebeyinekukholwa, beyiciniseka kutsi Nkulunkulu bekangeke aze ayikhohlwe naseyifile. Watsi kuNkulunkulu: “Utangibita, futsi ngisabele [ngiseThuneni].”—Fundza Jobe 14:13-15.
2. Sati njani kutsi bantfu labafile bangavuswa?
Ngesikhatsi Jesu alapha emhlabeni, Nkulunkulu wamnika emandla ekuvusa bantfu labafile. Wavusa intfombatane leneminyaka lengu-12 kanye nendvodzana yemfelokati. (Makho 5:41, 42; Lukha 7:12-15) Ngekuhamba kwesikhatsi umngani waJesu, Lazaro, wafa. Ngisho nobe besekuphele emalanga lamane Lazaro afile futsi angcwatjiwe, Jesu wamvusa. Jesu wathantaza kuNkulunkulu, wase utsi: “Lazaro, phuma!” Futsi “lomuntfu lobekafile waphuma” aphila! (Johane 11:43, 44) Cabanga kutsi umndeni kanye nebangani baLazaro bajabula kangakanani!
3. Nguliphi litsemba lelikhona ngebantfu lobatsandzako lesebafa?
LiBhayibheli letsembisa kutsi “batawuvuswa ekufeni.” (Imisebenti 24:15) Bantfu labavuswa nguJesu ngesikhatsi alapha emhlabeni bebangakayi ezulwini. (Johane 3:13) Wabavusela khona lapha emhlabeni futsi bakujabulela loko. Ngendlela lefanako, madvutane Jesu utawuvusa tigidzigidzi tebantfu kuze tijabulele kuphila kuze kube phakadze emhlabeni lolipharadisi. Jesu watsi Nkulunkulu usabakhumbula “bonkhe labasemathuneni,” ngisho nalabo lesesibakhohliwe, futsi utawubavusa.—Johane 5:28, 29.
CHUBEKA UFUNISISA
Fundza eBhayibhelini kutsi yini lengasenta siciniseke kutsi Jesu unemandla ekuvusa bantfu labafile nekutsi utawubavusa. Tfola nekutsi kuvuswa kwalabafile kungakudvudvuta njani futsi kukunikete nelitsemba.
4. Jesu wakhombisa kutsi angakhona kuvusa labafile
Fundza lokunyenti ngaloko Jesu lakwentela umngani wakhe Lazaro. Fundza Johane 11:14, 38-44, bese nicoca ngalemibuto:
-
Sati njani kutsi Lazaro bekafe mbamba?—Buka livesi 39.
-
Ucabanga kutsi kube Lazaro bekaye ezulwini, Jesu bekangamvusa kutsi aphindze aphile lamhlabeni yini?
5. Kutawuvuswa bantfu labanyenti!
Fundza Tihlabelelo 37:29, bese nicoca ngalombuto:
-
Tigidzigidzi tebantfu letitawuvuswa, titawuvuselwa kuphi?
Jesu angeke avuse kuphela labo labafa bakhonta Jehova, kodvwa utawuvusa nalabanye labanyenti. Fundza Imisebenti 24:15, bese nicoca ngalombuto:
-
Ngubani longatsandza kumbona avuswa?
Cabanga nganaku: Jesu angavusa umuntfu lofile kalula njengalapho babe avusa umntfwana wakhe ebutfongweni
6. Kuvuswa kwalabafile kungakudvudvuta futsi kukunike nelitsemba
Indzaba leseBhayibhelini yendvodzakati yaJayiru idvudvute yaphindze yakhutsata bantfu labanyenti labaselusizini lwekufelwa. Fundza lendzaba kuLukha 8:40-42, 49-56.
Ngaphambi kwekuvusa indvodzakati yaJayiru, Jesu watsi kuJayiru: “Ungesabi, kodvwa bani nekukholwa.” (Buka vesi 50.) Litsemba lekuvuswa kwalabafile lingakusita njani . . .
-
nawufelwa ngumuntfu lomtsandzako?
-
nangabe kuphila kwakho kusengotini?
Dlala le-VIDEO, bese nicoca ngalombuto lolandzelako.
-
Litsemba lekuvuswa kwalabafile libakhutsate futsi labadvudvuta njani batali baPhelicity?
LABANYE BANTFU BATSI: “Kulukhuni kukholelwa kutsi bantfu labafile bangaphindze baphile.”
-
Wena ucabangani?
-
Ngumuphi umbhalo longawusebentisa kuze ukhombise kutsi bantfu labafile batawuvuswa?
LOKO LESICOCE NGAKO
LiBhayibheli letsembisa kutsi tigidzigidzi tebantfu letafa titawuvuswa ekufeni. Jehova ufuna kutsi tiphindze tiphile, futsi unikete Jesu emandla ekutivusa.
Yini Loyifundzile?
-
Jehova naJesu bativa njani ngekuvusa bantfu labafile?
-
Tigidzigidzi tebantfu letitawuvuswa titawuphila kuphi, ezulwini nobe lamhlabeni? Yini lekwenta usho njalo?
-
Yini lekwenta uciniseke kutsi bantfu lobatsandzako batawuphindze baphile?
LOKUNYE LONGAKUHLOLA
Fundza ngetintfo longatenta kuze uncobe lusizi lwekufelwa.
“Usizo Kwabasosizini Lokushonelwa” (Phaphama! No. 3 2018, letfolakala ngesiZulu)
Timiso teliBhayibheli tingamsita mbamba yini umuntfu loselusizini lwekufelwa?
Bantfwana bangabhekana njani nebuhlungu bekufelwa ngumuntfu labamtsandzako?
Bakhona yini labatawuvuselwa ezulwini? Bobani labangeke bavuswe?
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
