SIFUNDVO 11
Indlela Yekutfola Lokunyenti Nawufundza LiBhayibheli
Wake wafuna yini kwenta umsebenti lomkhulu kodvwa weva shengatsi kutawuba matima? Kungenteka wawehlukanisa waba tincenye letincane kuze kube melula kuwenta. Loku kuyafana nalapho ufuna kufundza liBhayibheli. Ungahle utibute, ‘Ngitalicala ngakuphi nje?’ Kulesifundvo, sitawucoca ngetintfo letimelula letingakusita ukujabulele kufundza nekutadisha liBhayibheli.
1. Kungani kufanele silifundze njalo liBhayibheli?
Umuntfu lolifundza njalo liBhayibheli nobe ‘umtsetfo waJehova,’ utawujabula futsi aphumelele. (Fundza Tihlabelelo 1:1-3.) Ungacala ngekulifundza imizuzu lembalwa ngelilanga. Njengobe uya wetayelana neliVi laNkulunkulu, utakujabulela nekulifundza.
2. Yini lengakusita kutsi uzuze nawufundza liBhayibheli?
Kuze sizuze kakhulu nasifundza liBhayibheli, kudzingeka kutsi sime kancane futsi sicabange ngaloko lesikufundzako. Kufanele silifundze futsi ‘sicabangisise ngalo.’ (Joshuwa 1:8) Njengobe ufundza, tibute imibuto lenjengaletsi: ‘Loku kungifundzisani ngaNkulunkulu Jehova? Ngingakusebentisa njani ekuphileni kwami? Ngingawasebentisa njani lamavesi kuze ngisite labanye?’
3. Ungasakha njani sikhatsi sekufundza liBhayibheli?
Ukutfola kumatima yini kwakha sikhatsi sekufundza liBhayibheli? Labanyenti betfu bakutfola kumatima. Yetama ‘kusisebentisa kahle sikhatsi sakho.’ (Kubase-Efesu 5:16) Loku ungakwenta ngekutsi lilanga ngalinye ubekele eceleni sikhatsi sekufundza liBhayibheli. Labanye bantfu balifundza ekuseni kakhulu. Labanye balifundza emini nobe ngesikhatsi sabo selikhefu. Kantsi labanye balifundza ebusuku ngaphambi kwekutsi balale. Ngusiphi sikhatsi lesikulungelako wena?
CHUBEKA UFUNISISA
Fundza kutsi yini longayenta kuze wente kufundza kwakho liBhayibheli kujabulise. Tfola indlela lekahle yekulungiselela kuze uzuze kakhulu nawutadisha liBhayibheli.
Njengobe singagcine sesikujabulela kudla kudla lebesingakutsandzi, singagcina sesikujabulela nekufundza liBhayibheli
4. Tfola indlela longakujabulela ngayo kufundza liBhayibheli
Kungahle kube lukhuni kucala kufundza liBhayibheli. Nobe kunjalo, ungagcine sewukutsandza kulifundza, njengalapho umuntfu ajabulela kudla lebekangakutsandzi. Fundza 1 Phetro 2:2, bese nicoca ngalombuto:
-
Ucabanga kutsi nawungafundza liBhayibheli onkhe malanga, ungagcine sewukutsandza yini futsi uze ukulangatelele?
Dlala le-VIDEO kuze ubone kutsi labanye bantfu bacala njani kujabulela kufundza liBhayibheli, bese nicoca ngalemibuto lelandzelako.
-
Kule-video, ngutiphi tinkinga letancotjwa ngulabantfu labasha?
-
Yini leyabasita banamatsela emgomweni wabo wekufundza liBhayibheli?
-
Bakwenta njani kufundza kwabo liBhayibheli kwajabulisa?
Lokungakusita kutsi ucale:
-
Khetsa lihumusho lakamuva leletsembekile. Yetama Lihumusho Lemhlaba Lomusha nalitfolakala ngelulwimi lwakho.
-
Ungacala ngekufundza incenye yeliBhayibheli loyitsandza kakhulu. Kuze ubone kutsi ungakwenta kanjani loku, buka lishadi lelitsi “Cala Ufundze LiBhayibheli.”
-
Kubhale phansi loko lokufundzile. Sebentisa lishadi lelitsi “Landzelela Kufundza Kwakho LiBhayibheli” lelikulencwadzi.
-
Sebentisa i-JW Library®app. Kuyo, ungafundza futsi ulalele kufundvwa kweliBhayibheli nobe ngabe ukuphi usebentisa intfo yakho yebuchwephesha.
-
Sebentisa tandzisanchazo letise Humushweni Lemhlaba Lomusha. Tinemabalave, emashadi kanye netinchazelo temagama lokungenta kufundza kwakho kujabulise.
5. Kulungiselele kutadisha liBhayibheli
Fundza Tihlabelelo 119:34, bese nicoca ngalombuto:
-
Kukahle ngani kuthantaza ngaphambi kwekutsi ufundze nobe ulungiselele kutadisha liBhayibheli?
Yini longayenta kuze uzuze kakhulu njalo nawufundza? Njengobe ulungiselela sifundvo ngasinye, yetama naku lokulandzelako:
-
Fundza tigaba letisekucaleni kwesifundvo ngasinye.
-
Vula imibhalo uphindze uyifundze bese wetama kubona kutsi ihlobana njani naloko lokufundzako.
-
Dvwebela emagama nobe imisho leyinhloko lephendvula umbuto ngamunye; loku kutakusita nasenicoca ngalesifundvo naloyo lokufundzelako.
Bewati yini?
BoFakazi BaJehova basebentisa emahumusho eliBhayibheli lamanyenti lehlukahlukene. Nobe kunjalo, sitsandza kakhulu Lihumusho Lemhlaba Lomusha LemiBhalo Lengcwele ngoba linembile, licacile, futsi lisebentisa ligama laNkulunkulu.—Buka sihloko lesiku-internet lesitsi “BoFakazi BaJehova BaneliBhayibheli Labo Yini?”
LABANYE BANTFU BATSI: “Kungumsebenti kutadisha liBhayibheli. Ngite sikhatsi nobe emandla ekulifundza.”
-
Wena utsini?
LOKO LESICOCE NGAKO
Kuze uzuze ekufundzeni kwakho liBhayibheli, hlela sikhatsi sekulifundza, uthantaze kuze ukucondze loko lokufundzako futsi ulungiselele sifundvo sakho seliBhayibheli ngasinye.
Yini Loyifundzile?
-
Yini lengakusita kutsi uzuze kakhulu nawufundza liBhayibheli?
-
Ngusiphi sikhatsi lesikahle sekufundza longatibekela sona?
-
Kuhle ngani kulungiselela sifundvo sakho seliBhayibheli ngasinye?
LOKUNYE LONGAKUHLOLA
Hlola letinye tindlela letingakusita utfole lokunyenti nawufundza liBhayibheli.
“Tindlela Tekutfola Lokunyenti Nawufundza LiBhayibheli” (Sicongosekulindza No. 1 2017)
Tfola tindlela letintsatfu longatisebentisa nawufundza liBhayibheli.
“Lingangisita Njani LiBhayibheli?—Incenye 1: Hlolisisa LiBhayibheli Lakho” (Sihloko lesiku-internet)
Tfola indlela yekujabulela kufundza liBhayibheli.
Buka kutsi labanye labanesikhatsi lesidze bafundza liBhayibheli, bakwente njani kwajabulisa.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
