Tihlabelelo 45:1-17
Sicondziso lesiya kumcondzisi: Kufanele ihlatjelwe ngendlela letsi: “Timbali.”* Imaskili* yemadvodzana aKhora.+ Ingoma yelutsandvo.
45 Inhlitiyo yami itsintfwe yindzaba lemnandzi.
Ngitsi: “Ingoma yami* imayelana nenkhosi.”+Shengatsi lulwimi lwami lungafana nelutsi lwekubhala+ lwembhali* lonelikhono.+
2 Awu nkhosi, wena umuhle kunawo onkhe emadvodzana ebantfu.
Emlonyeni wakho kuphuma emavi lamnandzi.+
Kungako Nkulunkulu akubusise phakadze naphakadze.+
3 Bophela inkemba yakho+ elukhalo, wena chawe lelinemandla,+Uhlonipheke futsi ube muhle.+
4 Phuma uyewuncoba*+ ngobe uyakhatimula;Gibela lihhashi lakho futsi ulwele labatfobekile, ulwele liciniso nekulunga,+Futsi sandla sakho sangesekudla sitawenta* tintfo letesabekako.
5 Imicibisholo yakho iyakhalipha, yenta bantfu bawe embikwakho;+Igwaza tinhlitiyo tetitsa tenkhosi.+
6 Nkulunkulu ukunike bukhosi* phakadze naphakadze;+Intfonga yembuso wakho iyintfonga yekulunga.*+
7 Wena wakutsandza kulunga+ futsi wabutondza bubi.+
Kungako Nkulunkulu, longuNkulunkulu wakho akugcobe+ ngemafutsa futsi wakwenta wajabula kakhulu+ kwendlula onkhe lamanye emakhosi.
8 Tonkhe timphahla takho tinukelela emakha emure, enhlaba* newekhasiya;Ujatjuliswa tinsimbi temculo letikhala esigodlweni lesikhulu, lesihlotjiswe ngematinyo endlovu.
9 Emkhatsini webafati lobahloniphako, kunemadvodzakati emakhosi.
Inkhosikati ime ngesekudla sakho, itihlobise ngeligolide lase-Ofiri.+
10 Awu ndvodzakati, lalela, unake futsi usondzete indlebe yakho;Bakhohlwe bantfu bakini, uyikhohlwe nendlu yababe wakho.
11 Inkhosi itawukhangwa buhle bakho.
Iyinkhosi yakho,Ngako yikhotsamele.
12 Indvodzakati yaseThire itawuta nesipho;Emadvodza lacebe kakhulu atawucela umusa wakho.*
13 Indvodzakati yenkhosi iyacwebetela ngekhatsi esigodlweni;Timphahla tayo tihlotjiswe ngeligolide.*
14 Itawuletfwa enkhosini yembetse tingubo letinhle letelukiwe.*
Tintfombi letiyiphekeletelako nato titawuletfwa embikwenkhosi.*
15 Kutawube kutfokotiwe futsi kujatjuliwe nabaletfwa;Batawungena esigodlweni senkhosi.
16 Emadvodzana akho atawutsatsa sikhundla sabokhokho bakho.
Utawabeka kutsi abe babusi emhlabeni wonkhe.+
17 Ngitawukhuluma ngelibito lakho kuto tonkhe titukulwane letitako.+
Kungako bantfu batakudvumisa phakadze naphakadze.
Imibhalo lengentansi
^ Kungenteka kushiwo insimbi yemculo lenetintsambo, indlela ingoma lebhalwe ngayo, nobe indlela yekuhlabela. Kodvwa ayatiwa kahle inchazelo lengiyo.
^ Fundza Tinchazelo Temagama.
^ NgesiHebheru kutsi, “Imisebenti yami.”
^ Leligama lesiHebheru lifaka ekhatsi bantfu labebakopa uMtsetfo naletinye tincenye temiBhalo Lengcwele.
^ NgesiHebheru kutsi, “sitakufundzisa.”
^ Nobe “uyewuphumelela.”
^ NgesiHebheru kutsi, “Nkulunkulu usihlalo sakho sebukhosi.”
^ Nobe “yebucotfo.”
^ Leli ligama lelisetjentiswa nakukhulunywa ngesihlahla lesinesitaputapu lesinuka kamnandzi, lebesisetjentiselwa kwakha emakha ngetikhatsi tekubhalwa kweliBhayibheli.
^ Nobe “atawutsambisa buso bakho.”
^ NgesiHebheru kutsi, “tinemihlobiso yeligolide.”
^ Kungaphindze kubekwe ngekutsi, “letihlotjisiwe.”
^ NgesiHebheru kutsi, “embikwakho.”
