Tihlabelelo 107:1-43
107 Bongani Jehova ngobe muhle;+Lutsandvo lwakhe lolucotfo luhlala kuze kube phakadze.+
2 Shengatsi bantfu labahlengwe nguJehova bangasho kanjalo,Labo labahlenge etitseni tabo,+
3 Labo labagcogce ndzawonye basuka kulamanye emave,+Basuka emphumalanga nasenshonalanga,Basuka enyakatfo naseningizimu.+
4 Bebazulazula ehlane, elugwadvule;Abayitfolanga indlela leya edolobheni lebebangahlala kulo.
5 Bebalambile futsi bomile;Bese baphelelwe ngemandla ngenca yekudzinwa.
6 Bebachubeka bakhala kuJehova nabacindzetelekile;+Yena wabakhulula elusizini lwabo.+
7 Wabahola endleleni lengiyo+Leyabayisa edolobheni lebebangahlala kulo.+
8 Shengatsi bantfu bangambonga Jehova+ ngelutsandvo lwakhe lolucotfo,Bambonge nangemisebenti yakhe lemangalisako layentele bantfu.+
9 Ngobe labo labomile ubanatsise emanti baze benelaFutsi labalambile ubesutsise ngetintfo letinhle.+
10 Labanye bebahleti ebumnyameni nasetfuntini lekufa,Bebatiboshwa letiselusizini futsi bebaboshwe ngetinketane.
11 Ngobe abalilalelanga livi laNkulunkulu;Basedzelela seluleko saLosetikwako Konkhe.+
12 Ngako wabafundzisa kutfobeka ngekutsi abayekelele bahlupheke;+Bawa, kwaba bete nalotabasita.
13 Bakhala kuJehova bacela lusito ngesikhatsi bacindzetelekile;Yena wabakhulula elusizini lwabo.
14 Wabakhipha ebumnyameni nasetfuntini lekufa,Futsi wadzabula tinketane lebebaboshwe ngato.+
15 Shengatsi bantfu bangambonga Jehova ngelutsandvo lwakhe lolucotfo,+Bambonge nangemisebenti yakhe lemangalisako layentele bantfu.
16 Ngobe wephule iminyango yelitfusi,Wephula nemishudo yensimbi.+
17 Bebatilima, ngako bahlupheka+Ngenca yemaphutsa abo netono tabo.+
18 Kute kudla lebebasakukhanuka;Futsi bacishe bafa.*
19 Bebakhala kuJehova bacele lusito nabacindzetelekile;Bekabese uyabakhulula elusizini lwabo.
20 Abekhipha livi lekutsi baphile+Futsi abakhulule emigodzini lebebagcumkele kuyo.
21 Shengatsi bantfu bangambonga Jehova ngelutsandvo lwakhe lolucotfo,Bambonge nangemisebenti yakhe lemangalisako layentele bantfu.
22 Bantfu abanikele ngemihlatjelo yekubonga+Futsi bamemetele ngemisebenti yakhe bajabulile.
23 Labo labahamba ngemikhumbi elwandle,Labahamba kulo netintfo labatitsengisako,+
24 Bayibonile imisebenti yaJehovaBabona netintfo letinhle latidala letiselwandle;+
25 Nekutsi ukhipha livi futsi kucale sivunguvungu,+Siphakamise emagagasi elwandle.
26 Ayabatsatsa abajike etulu;Baphindze babuye phansi ekujuleni kwelwandle.
Bafikelwa kwesaba ngenca yenhlekelele lebasondzelelako.
27 Bayayendza futsi badzayitele njengemuntfu lodzakiwe,Onkhe emakhono abo ekucondzisa umkhumbi aba lite.+
28 Batsi nasebacindzetelekile bakhale kuJehova;+Yena abakhulule elusizini lwabo.
29 Uthulisa lesivunguvungu;Bese emagagasi aselwandle ayabindza.+
30 Bayajabula nasebawabona athulile,Bese ubaholela esikhumulweni semikhumbi lebebaya kuso.
31 Shengatsi bantfu bangambonga Jehova ngelutsandvo lwakhe lolucotfo,Bambonge nangemisebenti yakhe lemangalisako layentele bantfu.+
32 Shengatsi bangamphakamisa emkhatsini welibandla,+Bamdvumise emhlanganweni wemadvodza lamadzala.
33 Ugucula imifula ibe lugwadvuleAgucule imitfombo yemanti ibe yindzawo leyomile,+
34 Nelive lelikhicitako alente libe live lelingasakhiciti,+Ngenca yebubi lobentiwa bantfu labahlala kulo.
35 Ushintja lugwadvule lube yindzawo lenemachibi;Ashintje nendzawo leyomile ibe nemitfombo yemanti.+
36 Labalambile ubahlalisa lapho,+Kuze bakhe lidolobha labangahlala kulo.+
37 Balima emasimu futsi bahlanyele netihlahla temagilebisi+Batfole sivuno lesihle kakhulu.+
38 Uyababusisa bese bandza kakhulu;Akavumi nekutsi linani letinkhomo tabo linciphe.+
39 Kodvwa baphindze babe mbalwa futsi bahlazekeNgenca yekucindzetelwa, kanye nenhlekelele nelusizi.
40 Wenta kutsi tikhulu tingahlonishwaAtente tizulazule ehlane tingayiboni indlela.+
41 Kodvwa labeswele uyabavikela kuze bangacindzetelwa,+Nemindeni yabo uyenta yandze ibe ngangemhlambi.
42 Bantfu labacotfo bayakubona loku futsi bajabule;+Kodvwa bonkhe labangakalungi bayabindza.+
43 Bonkhe bantfu labahlakaniphile batatinakisisa letintfo+Futsi bacabangisise ngemusa* Jehova labentela wona.+
Imibhalo lengentansi
^ NgesiHebheru kutsi, “basondzela emagedeni ekufa.”
^ Nobe “ngelutsandvo lolucotfo.”
