Taga 27:1-27
27 Ungatishayi sifuba ngalotokwenta kusasa,Ngobe awati kutsi likusasa likuphatseleni.+
2 Shengatsi ungadvunyiswa ngulomunye umuntfu,* ungatidvumisi ngemlomo wakho;Shengatsi ungadvunyiswa ngulabanye bantfu,* ungatidvumisi wena.+
3 Litje liyesindza, sihlabatsi naso siyesindza,Kodvwa kucansulwa silima kukwengca khashane loku.+
4 Lulaka lwenta umuntfu abe bete umusa futsi intfukutselo injengesikhukhula,Kodvwa ngubani nje longabeketelela umona?+
5 Kuncono kwekhuta umuntfu kucace kunekutsi utsi uyamtsandza kodvwa kube kungabonakali.+
6 Umngani sibili uyakweluleka ngisho nobe leseluleko singasimnandzi,+Kodvwa sitsa sichubeka sikwentela umusa.*
7 Umuntfu lowesutsi uyalwala* luju loluntfonsako,Kodvwa lolambile ukuva kumnandzi ngisho nekudla lokubabako.
8 Njengenyoni lebaleka esidlekeni sayoUnjalo-ke nemuntfu loshiya likhaya lakhe.
9 Emafutsa nemphepho kwenta inhlitiyo ijabule;Unjalo-ke nemngani lokunika seluleko lesisuka enhlitiyweni.+
10 Ungamlahli umngani wakho nobe umngani wababe wakho,Futsi ungayi endlini yemnakenu nawehlelwe yinhlekelele;Uncono makhelwane lodvutane nawe kunemnakenu lohlala khashane.+
11 Hlakanipha ndvodzana yami futsi uyijabulise inhlitiyo yami,+Kuze ngikhone kuphendvula loyo longedzelelako.+
12 Umuntfu lohlakaniphile utsi nakabona ingoti abaleke,+Kodvwa lote lwati ucondza ngco kuyo, bese ubhekana nemiphumela lebuhlungu.
13 Ubositsatsa sembatfo semuntfu lowetsembise kubhadalela sihambi;Utsatse sibambiso kuye nangabe etsembise kubhadalela umfati wakulelinye live.*+
14 Nangabe lotsite amemeta umuntfu wakubo ekuseni kakhulu, amfisela lokuhle,Kutawutsatfwa ngekutsi uyamcalekisa.
15 Umfati lotsandza kususa lutfutfuva* ufana neluphahla loluhlale luvuta nalina.+
16 Nobe ngubani longakhona kumlawula angakhona kulawula umoyaFutsi angakhona kubamba emafutsa ngesandla sakhe sangesekudla.
17 Njengobe insimbi ilola insimbi,Kanjalo-ke nemuntfu usita lomunye kutsi abe ngumuntfu loncono.*+
18 Umuntfu lonakekela sihlahla semkhiwa utawudla titselo taso,+Nemuntfu lomphatsa kahle umphatsi wakhe utawuhlonishwa.+
19 Njengobe umuntfu akhona kubona buso bakhe emantini,Kanjalo-ke nemuntfu uyakhona kutibona kutsi unjani nakabuka labanye.
20 LiThuna kanye nendzawo lakubolela khona tidvumbu* akweneli,+Futsi nemehlo emuntfu akwenteki enele.
21 Njengobe lisiliva neligolide+ lincibilikiswa emlilweni kuze kubonakale kutsi lisezingeni lelisetulu yini,Kanjalo-ke nemuntfu uhlolwa ngeludvumo lalutfolako.*
22 Ngisho nome silima ungasifihlita ngemphini wekukhobola
Sibe njengemphuphu emkhobolweni,Kodvwa bulima baso angeke buphume kuso.
23 Kufanele uwati kahle umhlambi wakho.
Tinakekele kahle timvu takho,+
24 Ngobe umcebo awuhlali ukhona kuze kube phakadze,+Nemchele angeke usuke kulesinye situkulwane uye kulesinye kuze kube phakadze.
25 Tjani lobuluhlata buyaphela, kuhlume tjani lobusha,Futsi tjani basetintsabeni buyabutfwa buyophiwa imfuyo.
26 Nawunetimvu letindvuna letingemazinyane, ungakha timphahla ngeboya bato,Nawunetimbuti letindvuna ungakhona kutsenga insimu,
27 Futsi utawuba nelubisi lwembuti lolunyenti longatondla ngalo,Uphindze wondle ngalo umndeni wakho kanye netincekukati takho.
Imibhalo lengentansi
^ NgesiHebheru kutsi, “ngumuntfu longamati.”
^ NgesiHebheru kutsi, “sihambi.”
^ NgesiHebheru kutsi, “sikucabuza kanyenti.”
^ NgesiHebheru kutsi, “uyalunyatsela.”
^ Nobe “sihambi.”
^ Nobe “kukhonona.”
^ Nobe “umuntfu ulola lomunye.”
^ Nobe “IShiyoli ne-Abhadoni.”
^ Nobe “nemuntfu ubonakala ngeludvumo lalutfolako kutsi unjani.”
