Taga 11:1-31
11 Jehova uyatenyanya tikali letingaketsembeki,*Kodvwa uyajabula ngetisindvo letingito.+
2 Nangabe umuntfu atigcabha, lokulandzelako kutawuba kutsi ahlazeke,+Kodvwa kuhlakanipha kukubantfu labatfobekile.+
3 Labalungile bacondziswa bucotfo babo,+Kodvwa labangaketsembeki batawubulawa bucili babo.+
4 Umcebo ngeke usite ngalutfo ngelilanga lentfukutselo yaNkulunkulu,+Kodvwa kwenta lokulungile kutamkhulula umuntfu ekufeni.+
5 Kulunga kwemuntfu lomsulwa kwenta indlela yakhe icondze,Kodvwa umuntfu lomubi utakuwa ngenca yebubi labentako.+
6 Labacotfo batawusindziswa kulunga kwabo,+Kodvwa labangaketsembeki batawubanjwa tifiso tabo.+
7 Nangabe umuntfu lomubi afa, litsemba lakhe liyashabalala,Naloko lebeketsembe kutsi utakwenta ngemandla akhe kuvele kuphelele eteni.+
8 Umuntfu lolungile utawutfola lusito nakacindzetelekile,Bese esikhundleni sakhe kucindzeteleka lomubi.+
9 Ngemlomo wakhe umuntfu lomubi* ulimata makhelwane wakhe,Kodvwa kuba nelwati kuyabakhulula labalungile.+
10 Tento temusa letentiwa ngulabalungile tenta lidolobha lijabule,Futsi kuba nenjabulo lenkhulu nakushabalala lababi.+
11 Nakubusiswa labacotfo, lidolobha liyadvunyiswa,*+Kodvwa umlomo webantfu lababi uyalibhidlita.+
12 Umuntfu lote kucondza wedzelela makhelwane wakhe,Kodvwa umuntfu lohlakaniphe mbamba uyathula.+
13 Umuntfu longumnyundzeli uhamba akhuluma timfihlo talabanye bantfu,+Kodvwa umuntfu lowetsembekile uyayigcina imfihlo.
14 Bantfu bayahlupheka nangabe kute sicondziso lesihlakaniphile,Kodvwa bayaphumelela* nangabe kunebeluleki labanyenti.+
15 Tintfo titamhambela kabi loyo lovume kubhadala sikweleti semuntfu wekuhamba,+Kodvwa umuntfu longajaki kwenta tivumelwane* ngeke abe netinkinga.
16 Umfati lonemusa* utitfolela ludvumo,+Kodvwa tidlova temuka labanye bantfu umcebo wabo.
17 Umuntfu lonemusa uyasitakala ngekuba nemusa kwakhe,+Kodvwa umuntfu lonenhlitiyo lembi utiletsela tinkinga.*+
18 Umuntfu lomubi utitfolela inzuzo lengenamsebenti,+Kodvwa umuntfu lowenta lokulungile utfola inzuzo sibili.+
19 Loyo lotimisele kwenta lokulungile utawuphila,+Kodvwa loyo logijimisa lokubi utawufa.
20 Jehova uyabenyanya labo labanenhlitiyo lembi,+Kodvwa bayamjabulisa labo labacotfo.+
21 Naku lokufanele uciniseke ngako: Umuntfu lomubi ngeke ahlale angajeziswa,+Kodvwa bantfwana balolungile batawuphunyula.
22 Njengendandatho yeligolide ekhaleni lengulube,Unjalo-ke umfati lomuhle kodvwa abe ete kucondza.
23 Bantfu labalungile bafisa lokuhle kuphela,+Kodvwa loko lokufiswa ngulababi kubaholela entfukutselweni yaNkulunkulu.
24 Umuntfu lowephana ngesandla lesivulekile ugcine sekanalokunyenti;+Kodvwa loyo longabaphi labanye loko lanako ugcine sekaphuyile.+
25 Umuntfu lowephanako utawuphumelela,+Futsi nobe ngubani lonatsisa labanye emanti naye batamnatsisa.+
26 Bantfu batamcalekisa loyo longafuni kubatsengisela kudla,Kodvwa batambusisa umuntfu lokutsengisako.
27 Loyo lofunisisa indlela yekwenta lokuhle utawutfola umusa,+Kodvwa loyo lofuna kwenta lokubi, utawehlelwa ngiko kanye lolokubi bekakufuna.+
28 Umuntfu lowetsembela emcebeni wakhe ngeke aphumelele,+Kodvwa lolungile utawuhluma njengemacembe laluhlata.+
29 Kute lifa latalitfola* umuntfu loletsa tinkinga* ekhaya lakhe,+Nesilima sitawuba sisebenti semuntfu lohlakaniphile.
30 Imisebenti yalolungile injengesihlahla sekuphila,+Futsi loyo lokhutsata labanye kutsi bente lokulungile uhlakaniphile.+
31 Nangabe umuntfu lolungile losemhlabeni atfola loko lokumfanele,Kangakanani-ke ngemuntfu lomubi nalosoni?+
Imibhalo lengentansi
^ Nobe “letidojako.”
^ Nobe “sihlubuki.”
^ Nobe “Nangabe labacotfo babusisa lidolobha, liyadvunyiswa.”
^ Nobe “bayaphepha.”
^ Nobe “longatsandzi kuchawulana.”
^ Nobe “lotsandzekako.”
^ Nobe “uyatihlaza.”
^ NgesiHebheru kutsi, “Utawutfola umoya.”
^ Nobe “lihlazo.”
