Sembulo Lesembulelwa Johane 14:1-20
14 Ngatsi ngiyabuka, ngabona liWundlu+ lime eNtsabeni iSiyoni,+ likanye nalabangu-144 000,+ futsi emabuntini abo kubhalwe libito lalo nelaBabe walo.+
2 Ngeva livi livela ezulwini linjengemsindvo wemanti lamanyenti nanjengemsindvo wekudvuma kwelitulu lokukhulu; lomsindvo lengawuva bewunjengewebantfu labahlabelako, bashaya emahabhu abo.
3 Bahlabela lokungatsi yingoma lensha+ embikwesihlalo sebukhosi, embikwetidalwa letine letiphilako+ nasembikwalabadzala;+ kute lowakwati kuyibamba lengoma ngaphandle kwalaba labangu-144 000+ labatsengwe emhlabeni.
4 Laba ngulabangazange batingcolise ngalabasikati; ecinisweni banjengetintfombi ntfo.+ Bachubeka balandzela liWundlu nobe ngukuphi lapho liya khona.+ Batsengwa+ kubantfu baba titselo tekucala+ letinikelwa kuNkulunkulu nakulo liWundlu,
5 futsi kute emanga latfolakele emilonyeni yabo; abanasici.+
6 Ngabona lenye ingilosi indiza emoyeni,* inetindzaba letimnandzi taphakadze lebekufanele itimemetele kulabo labahlala emhlabeni, kuto tonkhe tive, tinhlanga, tilwimi kanye nebantfu.+
7 Beyikhuluma ngelivi lelikhulu, itsi: “Mesabeni Nkulunkulu nimkhatimulise, ngobe sikhatsi sakhe sekwehlulela sesifikile,+ ngako khontani Loyo lowadala lizulu, umhlaba, lwandle,+ kanye nemitfombo yemanti.”
8 Kwalandzela ingilosi yesibili, itsi: “Iwile! IBhabhulona Lenkhulu+ iwile,+ leyo leyenta kutsi tonkhe tive tinatse liwayini lenkhanuko* yebugwadla*+ bayo!”
9 Ingilosi yesitsatfu yatilandzela, yakhuluma ngelivi lelikhulu yatsi: “Nangabe kukhona lokhonta lesilwane sesiganga+ nemfanekiso waso, futsi emukele neluphawu ebuntini nobe esandleni sakhe,+
10 naye utawunatsa liwayini lentfukutselo yaNkulunkulu lelitselwa lingakabhicwa nalutfo endzebeni yentfukutselo yakhe,+ futsi utawuhlushwa ngemlilo nangesibabule+ embikwetingilosi letingcwele nasembikweliWundlu.
11 Intfutfu yekuhlushwa kwabo yenyuka phakadze naphakadze.+ Labo labakhonta lesilwane sesiganga nemfanekiso waso, nabo bonkhe labemukela luphawu lwelibito laso ngeke baphumule busuku nemini.+
12 Loku-ke kudzinga kutsi labangcwele bacinisele,+ lokungulabo labagcina imiyalo yaNkulunkulu futsi lababambelele ekukholweni+ kwabo kuJesu.”
13 Ngeva livi livela ezulwini litsi: “Bhala utsi: Bayajabula labo labatsi nabafa babe basebunyeni neNkhosi+ kusukela nyalo kuchubeke. Umoya utsi abaphumule ekukhandlekeni kwabo, ngobe tintfo labatenta tiyabalandzela.”*
14 Ngatsi ngiyabuka, ngabona lifu lelimhlophe, etikwalo bekuhleti lotsite lofana nendvodzana yemuntfu,+ enhloko yakhe bekunemchele weligolide, nasesandleni sakhe bekaphetse lisikela lelikhaliphako.
15 Lenye ingilosi yaphuma endzaweni lengcwele yelithempeli, yamemeta loyo lohleti kulelifu ngelivi lelikhulu, yatsi: “Faka lisikela lakho uvune, ngobe sikhatsi sekuvuna sesifikile, nesivuno semhlaba sesilungile.”+
16 Loyo lohleti kulelifu wafaka lisikela lakhe emhlabeni, umhlaba wase uyavunwa.
17 Nalenye ingilosi yaphuma endzaweni lengcwele yelithempeli lesezulwini, futsi nayo beyiphetse lisikela lelikhaliphako.
18 Lenye ingilosi yaphuma e-al’thare, ineligunya etikwemlilo. Yamemeta ngelivi lelikhulu, yamemeta leyo lebeyiphetse lisikela lelikhaliphako, yatsi: “Faka lelisikela lakho lelikhaliphako, uvune tikhehle temagilebisi letisensimini yemagilebisi yemhlaba, ngobe emagilebisi ayo sekavutsiwe.”+
19 Lengilosi yafaka lelisikela layo emhlabeni, yavuna lensimu yemagilebisi yemhlaba, yayijika etjeni lelikhulu lekuhlutela lentfukutselo yaNkulunkulu.+
20 Lelitje lekuhlutela liwayini lagcotjwagcotjwa ngaphandle kwelidolobha, kwaphuma ingati, yaphakama yaze yefika nasematomini emahhashi, yatsatsa libanga lelicishe libe ngemakhilomitha langu-296.*
Imibhalo lengentansi
^ Nobe “esibhakabhakeni; etulu.”
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Nobe “lentfukutselo.”
^ Nobe “tihambisana nabo.”
^ NgesiGriki kutsi, “lelingemastadiya langu-1 600.” Stadiya sisinye besilingana nemamitha langu-185. Fundza Sandzisanchazo B14.
