Ruthe 4:1-22
4 Ngako Bhowazi wakhuphukela egedeni lelidolobha+ wafike wahlala khona. Watsi asahleti, kwendlula lomuntfu Bhowazi labekhulume ngaye lobekanelilungelo lekuhlenga lomfati.+ Bhowazi watsi kulomuntfu: “Ngicela ute lapha uhlale phansi.” Lomuntfu waya kuye wafike wahlala phansi.
2 Ngemuva kwaloko Bhowazi wabita emadvodza lamadzala+ langu-10 akulelidolobha, watsi kuwo: “Hlalani phansi.” Ngako ahlala phansi.
3 Bhowazi wabese utsi kulendvodza lenelilungelo lekuhlenga lomfati:+ “Nawomi losabuyile eveni lakaMowabi+ kufanele atsengise umhlaba lebewuwa-Elimeleki umnaketfu.+
4 Ngako bengicabanga kutsi ngikutjele ngalendzaba futsi ngitsi: ‘Wutsenge* embikwalesive nasembikwalamadvodza lamadzala alesive.+ Nangabe utawutsenga, kulungile wutsenge. Kodvwa nangabe ungeke uwutsenge ngitjele kuze ngati ngobe nguwe lonelilungelo lekuwutsenga futsi mine ngilandzela wena.’” Lendvodza yamphendvula yatsi: “Nginesifiso sekuwutsenga.”+
5 Ngemuva kwaloko Bhowazi watsi: “Ngelilanga lotawutsenga ngalo lomhlaba kuNawomi kufanele uphindze uwutsenge nakuRuthe umMowabi, longumfati wemufi kuze ulondvolote ligama lemufi kuloko lokulifa lakhe.”+
6 Nayiva loko, lendvodza yamphendvula yatsi: “Angeke ngikhone kuwutsenga ngobe kungenteka ngone lifa lami. Ngicela uwutsenge ngelilungelo lami ngobe mine angeke ngikhone kuwutsenga.”
7 Nali lisiko lebelisetjentiswa kadzeni ka-Israyeli kuze kucinisekiswe sivumelwane lesimayelana nelilungelo lekutsenga nelekushintjiselana: Indvodza bekufanele ikhumule incabule+ yayo iyinike lona lomunye umuntfu, futsi nguleyo indlela tivumelwane lebeticinisekiswa* ngayo ka-Israyeli.
8 Ngesikhatsi lendvodza itsi kuBhowazi: “Wutsenge wena,” yakhumula incabule yayo.
9 Ngako Bhowazi watsi kulamadvodza lamadzala nakubo bonkhe labantfu: “Nine nibofakazi+ lamuhla bekutsi konkhe lobekukwa-Elimeleki nako konkhe lobekukwaKhiliyoni naMahaloni ngiyakutsenga kuNawomi.
10 Ngiphindze ngitsatsa naRuthe umMowabi, umfati waMahaloni, kutsi abe ngumfati wami khona ngitawulondvolota ligama lemufi kuloko lokulifa lakhe,+ kuze ligama lemufi lingasulwa kubomnakabo nasegedeni lelidolobha lakubo. Nine-ke nibofakazi lamuhla.”+
11 Ngaleso sikhatsi bonkhe bantfu lebebasegedeni lelidolobha kanye nemadvodza lamadzala batsi: “Tsine sibofakazi! Shengatsi Jehova angenta kutsi lomfati lotawungena endlini yakho lamuhla afanane naRakheli kanye naLeya, bobabili labakha indlu yaka-Israyeli.+ Shengatsi ungaphumelela e-Efratha+ uphindze wakhe ligama lelihle* eBhetlehema.+
12 Shengatsi indlu yakho ingafanana nendlu yaPheresi+ indvodzana yaThamari naJuda, ngebantfwana Jehova latakunika bona ngalomkakho.”+
13 Ngako Bhowazi watsatsa Ruthe, waba ngumkakhe. Waya naye ecansini futsi Jehova wabangela kutsi Ruthe akhulelwe, wase utala indvodzana.
14 Ngemuva kwaloko, bafati batsi kuNawomi: “Akadvunyiswe Jehova lowente kutsi lamuhla kube nemuntfu lonelilungelo lekunihlenga. Shengatsi ligama lakhe lingamenyetelwa ka-Israyeli!
15 Ulondvolote* kuphila* kwakho futsi utakusekela ebudzaleni bakho ngobe utelwe ngumakoti wakho lokutsandzako+ naloncono kakhulu kuwe kunemadvodzana langu-7.”
16 Nawomi watsatsa lomntfwana wambeka esifubeni sakhe, wase uyamnakekela.*
17 Ngemuva kwaloko bafati lababomakhelwane bametsa libito. Batsi: “Nawomi utalelwe indvodzana,” futsi bametsa batsi ngu-Obedi.+ Ungubabe waJese,+ longubabe waDavide.
18 Nalu luhla lwemndeni* waPheresi:+ Pheresi watala Hesroni;+
19 Hesroni watala Ramu; Ramu watala Aminadabi;+
20 Aminadabi+ watala Nasoni; Nasoni watala Salmoni;
21 Salmoni watala Bhowazi; Bhowazi watala Obedi;
22 Obedi watala Jese;+ futsi Jese watala Davide.+
Imibhalo lengentansi
^ NgesiHebheru kutsi, “Phindze uwutsenge.”
^ Nobe “lebetifakazelwa.”
^ NgesiHebheru kutsi, “umemetele ligama.”
^ Lokusho, umtukulu waNawomi.
^ Nobe “umphefumulo.”
^ Nobe “waba ngumnakekeli wakhe.”
^ NgesiHebheru kutsi, “Leti titukulwane.”
