Kulandzisa KwaMatewu 5:1-48
-
INSHUMAYELO YASENTSABENI (1-48)
5 Nakabona lesicumbi sebantfu, Jesu wakhuphukela entsabeni, watsi nasahleti phansi, bafundzi bakhe beta kuye.
2 Wase uyakhuluma, wabafundzisa watsi:
3 “Bayajabula labo labanakisisa tintfo letiphatselene naNkulunkulu,*+ ngobe uMbuso wemazulu ngewabo.
4 “Bayajabula labo labalilako, ngobe batawudvudvutwa.+
5 “Bayajabula labo labanemoya lophansi,*+ ngobe batawudla lifa lemhlaba.+
6 “Bayajabula labo labalambele kulunga futsi bakomele,+ ngobe batawenetiswa.*+
7 “Bayajabula labo labanesihawu,+ ngobe batawuhawukelwa.
8 “Bayajabula labo labanetinhlitiyo letihlantekile,+ ngobe batawubona Nkulunkulu.
9 “Bayajabula labo labatsandza kuthula,+ ngobe bayawubitwa ngekutsi ngemadvodzana aNkulunkulu.
10 “Bayajabula labo labaphetfwe kabi ngenca yekulunga,+ ngobe uMbuso wemazulu ngewabo.
11 “Niyajabula nangabe bantfu banihlambalata,+ baniphatsa kabi,+ basho konkhe lokubi ngani futsi banicalela emanga ngenca yami.+
12 Tfokotani futsi nijabule kakhulu,+ ngenca yekutsi umvuzo wenu+ mkhulu emazulwini, ngobe nebaphrofethi bebaphatfwa ngaleyondlela.+
13 “Nine niluswayi+ lwemhlaba, kodvwa-ke nangabe luswayi luphelelwa ngemandla alo, lawo mandla angabuyiselwa njani? Lusuke lungasenamsebenti walutfo, ngako luyalahlwa,+ lunyatselwe ngetinyawo.
14 “Nine nikukhanya kwelive.+ Lidolobha lelakhiwe entsabeni ngeke lisitseke.
15 Bantfu abasikhanyisi sibane bese basifaka ngephansi kwabhasikidi,* kodvwa basibeka etikwelutsi lwesibane, kute sikhanyisele bonkhe labasendlini.+
16 Nani-ke yentani kukhanya kwenu kukhanye kubantfu,+ khona batewubona lokuhle lenikwentako+ bese badvumisa Babe wenu losemazulwini.+
17 “Ningacabangi kutsi ngitele kutewucitsa uMtsetfo nobe loko lokwashiwo baPhrofethi. Angiketeli kutewucitsa kodvwa ngitele kutewugcwalisa.+
18 Ngicinisile ngitsi kini, ngisho nobe lizulu nemhlaba kungendlula, kodvwa kute ngisho nalinye lichashata nobe luhlavu loluncane lweligama lolukuloMtsetfo lolutawususwa kudzimate kube ngulapho konkhe sekugcwalisekile.+
19 Ngako-ke, nobe ngubani lowephula munye kulemitsetfo lebonakala imincane bese ufundzisa labanye kutsi bente njalo, ngeke kumfanele kungena* eMbusweni wemazulu. Kodvwa nobe ngubani loyigcinako futsi ayifundzise labanye, kutamfanela kungena* kuwo.
20 Ngobe ngiyanitjela ngitsi, nangabe ningakalungi kwendlula tati temtsetfo nebaFarisi,+ ngeke ningene eMbusweni wemazulu.+
21 “Niyati kutsi kwatsiwa kubantfu basendvulo: ‘Ungabulali,+ kepha nobe ngubani lobulalako utawuyiswa enkantolo.’+
22 Kodvwa mine ngitsi kini, nobe ngubani lochubeka atfukutselele+ umnakabo, utawuyiswa enkantolo; futsi nobe ngubani lobita umnakabo ngemavi layinhlamba, utawuyiswa eNkantolo Lephakeme, kantsi nobe ngubani lotsi kumnakabo: ‘Silima ndzini!’ utawufanelwa kujikwa eGehena* levutsa umlilo.+
23 “Nangabe uletsa sipho e-al’thare,+ bese uyakhumbula kutsi kukhona lomphetse kabi ngako umnakenu,
24 sishiye khona lapho embikweli-al’thare, uhambe uye kuye. Cale wakhe kuthula naye, nasewente njalo sewungahamba uyewunikela ngalesipho sakho.+
25 “Nisaya enkantolo, shesha ulungise inkinga nemuntfu lokumangalele, kuze angakumikisi kumehluleli, umehluleli yena akunikele kubogadzi, bese bona bakuvalela ejele.+
26 Ngicinisile ngitsi kuwe ngeke uphume kuze kube ngulapho ukhipha yonkhe imali, ngisho neyekugcina.*
27 “Niyati kutsi kwatsiwa: ‘Ungaphingi.’+
28 Kodvwa mine ngitsi kini, wonkhe umuntfu lochubeka abuka lomsikati+ ate amkhanuke sewuvele uphingile naye enhlitiyweni.+
29 Nangabe liso lakho langesekudla likuhlupha, likhiphe ulilahle,+ ngobe kuncono kulahlekelwa sitfo sinye semtimba kunekutsi umtimba wakho wonkhe ujikwe eGehena.*+
30 Nangabe sandla sakho sangesekudla sikuhlupha, sijube usilahle,+ ngobe kuncono kulahlekelwa sitfo sinye semtimba, kunekutsi umtimba wakho wonkhe ujikwe eGehena.*+
31 “Ngetulu kwaloko, kwatsiwa: ‘Nobe nguyiphi indvodza ledivosa umfati wayo, kufanele imnike incwadzi yedivosi.’+
32 Kodvwa mine ngitsi kini, nangabe indvodza idivosa umfati wayo, abe lomfati angakagwadli,* imbeka engotini yekutsi aphinge, futsi nobe nguyiphi indvodza leshada umfati lonjalo, iyaphinga.+
33 “Niyati nekutsi kwatsiwa kubantfu basendvulo: ‘Ungafungi bese awusenti,+ kepha kufanele utifeze tifungo takho kuJehova.’*+
34 Kodvwa mine ngitsi kini: Ningafungi sanhlobo,+ kungaba ngelizulu, ngobe lisihlalo sebukhosi saNkulunkulu;
35 nobe ngemhlaba, ngobe usenabelo setinyawo takhe;+ nobe ngeJerusalema, ngobe ilidolobha leNkhosi lenkhulu.+
36 Ungafungi ngenhloko yakho, ngobe ngeke ushintje ngisho nalunye lunwele lwakho lube mhlophe nobe lube mnyama.
37 Kuphela nje, ‘Yebo’ wenu akabe nguyebo, na-‘Cha’ wenu abe ngucha,+ ngobe lokungetulu kwaloko kuvela kulomubi.+
38 “Niyati kutsi kwatsiwa: ‘Liso ngeliso, litinyo ngelitinyo.’+
39 Kepha mine ngitsi kini: Ningalwisani nemuntfu lomubi, kodvwa nobe ngubani lokushaya esihlatsini sangesekudla, mvumele akushaye nakulesi lesinye.+
40 Nangabe umuntfu afuna kukuyisa enkantolo futsi atsatse ingubo yakho yangephansi, mnike nengubo yakho yangetulu,+
41 futsi nangabe umuntfu loneligunya akucindzetela kutsi wente lokutsite likhilomitha* linye, kwente emakhilomitha lamabili.
42 Ubomupha umuntfu locelako, futsi ungamgodleli loyo loboleka* lutfo kuwe.+
43 “Niyati kutsi kwatsiwa: ‘Kufanele utsandze makhelwane wakho+ futsi utondze sitsa sakho.’
44 Kodvwa mine ngitsi kini: Chubekani nitsandza titsa tenu+ futsi nithantazele labo labaniphatsa kabi,+
45 kuze nitewutiveta ningemadvodzana aBabe wenu losemazulwini,+ ngobe yena wenta lilanga liphumele bantfu lababi nalabahle, aphindze ente imvula inele bantfu labalungile nalabangakalungi.+
46 Ngobe nangabe nitsandza labo labanitsandzako, ninamvuzo muni?+ Abenti njalo yini nebatselisi?
47 Nangabe nibingelela bomnakenu kuphela, yini lencono leniyentako? Abenti njalo yini nebantfu betive?
48 Ngaleyondlela, nani kufanele niphelele* njengobe naBabe wenu losezulwini aphelele.+
Imibhalo lengentansi
^ Nobe “labamphofu emoyeni.”
^ Nobe “labatfobekile.”
^ Nobe “batawesutsiswa.”
^ Lona ngubhasikidi lobewuphatsa tintfo letitinhlavu, njengakolo.
^ NgesiGriki kutsi, “kuyawutsiwa ngulomncane.”
^ NgesiGriki kutsi, “kuyawutsiwa ungulomkhulu.”
^ Lena kwakuyindzawo lebeyingephandle kweJerusalema, lebekushiselwa kuyo tibi. Fundza Tinchazelo Temagama.
^ NgesiGriki kutsi, “ema-quadran ekugcina.” Fundza Sandzisanchazo B14.
^ Fundza Tinchazelo Temagama.
^ Fundza Tinchazelo Temagama.
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ Fundza Sandzisanchazo A5.
^ NgesiGriki kutsi, “limayela.” Fundza Tinchazelo Temagama.
^ Lokusho, loboleka abe angeke ayibhadale intalo.
^ Nobe “ningashodi ngalutfo.”
