Kulandzisa KwaMakho 1:1-45
-
Johane uMbhabhatisi uyashumayela (1-8)
-
Jesu uyabhajatiswa (9-11)
-
Jesu ulingwa nguSathane (12, 13)
-
Jesu ucala kushumayela eGalile (14, 15)
-
Bafundzi bekucala bayabitwa (16-20)
-
Lidimoni liyacoshwa (21-28)
-
Jesu welapha bantfu labanyenti eKhaphanawume (29-34)
-
Uthantaza endzaweni lethulile (35-39)
-
Indvodza lenebulephelo iyelashwa (40-45)
1 Livangeli lelimayelana naJesu Khristu, loyiNdvodzana yaNkulunkulu licala kanje:
2 Encwadzini yemphrofethi Isaya kwabhalwa kwatsiwa: “(Ngitfumela sitfunywa sami embikwakho,* sona sitakulungisela indlela.)+
3 Ukhona lomemeta ehlane, utsi: ‘Lungisani indlela yaJehova!* Yenteni icondze.’”+
4 Johane uMbhabhatisi bekasehlane, ashumayela bantfu kutsi babhajatiswe kuze bavete kutsi baphendvukile khona batotsetselelwa tono.+
5 Bonkhe bantfu basesifundzeni saseJudiya nabo bonkhe bantfu baseJerusalema beta kuye, wababhabhatisa* eMfuleni iJordane, futsi bavuma tono tabo.+
6 Johane bekambatsa ingubo yeboya belikamela, abopha libhande lesikhumba elukhalo,+ futsi adla tintsetse neluju lwetinyosi tesiganga.+
7 Bekashumayela atsi: “Kukhona lota emvakwami, lonemandla kunami, futsi angikufaneli ngisho nekumkhumula tintsambo tetincabule takhe.+
8 Mine benginibhabhatisa ngemanti, kodvwa yena utanibhabhatisa ngemoya longcwele.”+
9 Kulawo malanga, Jesu wefika aphuma eNazaretha yaseGalile, futsi wabhajatiswa nguJohane eJordane.+
10 Ngekushesha nakaphuma emantini, wabona emazulu avuleka, kwase kwehlela etikwakhe umoya longcwele unjengelituba.+
11 Kwevakala nelivi liphuma emazulwini litsi: “Wena uyiNdvodzana yami letsandzekako, ngikwemukele.”+
12 Ngekushesha umoya waNkulunkulu wamhola wamyisa ehlane.
13 Ngako wahlala lapho emalanga langu-40, futsi bekahlala netilwane tesiganga. Ngesikhatsi alapho walingwa nguSathane,+ kodvwa tingilosi betimsita.+
14 Ngemuva kwekuboshwa kwaJohane, Jesu waya eGalile+ washumayela tindzaba letimnandzi taNkulunkulu,+
15 watsi: “Sikhatsi lesibekiwe sesifikile, neMbuso waNkulunkulu sewusondzele. Phendvukani+ futsi nitikholwe letindzaba letimnandzi.”
16 Asahamba eceleni kweLwandle LwaseGalile, Jesu wabona Simoni ana-Andreya+ umnakabo bajika emanethi abo elwandle+ ngobe bebabadwebi.+
17 Jesu watsi kubo: “Ngilandzeleni, ngitawunenta badwebi bebantfu.”+
18 Ngako bavele bashiya emanethi abo bamlandzela.+
19 Angakahambi lokuyaphi, wabona Jakobe indvodzana yaZebedi nemnakabo longuJohane basesikebheni balungisa emanethi abo,+
20 futsi wababita ngekushesha. Bashiya babe wabo Zebedi esikebheni akanye netisebenti takhe, bamlandzela.
21 Bahamba baya eKhaphanawume.
Ngekushesha nakufika liSabatha, Jesu wangena esinagogeni, wafundzisa.+
22 Bantfu yabamangalisa indlela lebekafundzisa ngayo, ngobe bekafundzisa njengemuntfu loneligunya, hhayi njengetati temtsetfo.+
23 Ngaleso sikhatsi kwevakala indvodza lebeyinelidimoni imemeta lapho esinagogeni, itsi:
24 “Ufunani lapha wena Jesu waseNazaretha?+ Utele kutosibhubhisa yini? Ngiyati kutsi ungubani, unguLongcwele waNkulunkulu!”+
25 Jesu walekhuta lelidimoni, watsi: “Bindza, futsi uphume kuye!”
26 Lelidimoni lamnklinklitisa lomuntfu, lamemeta kakhulu, lase liyaphuma.
27 Labantfu bamangala kakhulu kangangekutsi bakhuluma bodvwa batsi: “Yini lena lesiyibonako? Indlela lomuntfu lafundzisa ngayo yehlukile! Wekhuta ngisho nemadimoni futsi ayamlalela.”
28 Ngekushesha letidvumo taJesu tandza tagcwala kuto tonkhe tindzawo taseGalile.
29 Ngemuva kwaloko baphuma esinagogeni bahamba baya lapho bekuhlala khona boSimoni na-Andreya, futsi boJakobe naJohane bebakhona.+
30 Maketala waSimoni+ bekalele phansi aphetfwe ngumkhuhlane, ngako batjela Jesu ngaloko.
31 Waya kuye, wafike wambamba ngesandla wamsukumisa. Lomkhuhlane waphela, futsi lomaketala waSimoni wabese ubalungisela kudla.
32 Nasekuhwalele, bantfu baletsa kuye bonkhe lebebagula nalabebaphetfwe ngemadimoni,+
33 futsi bonkhe bantfu bakulelo dolobha besebabutsene lapho emnyango.
34 Ngako welapha labanyenti lebebaphetfwe tifo letehlukahlukene,+ futsi wacosha nemadimoni lamanyenti, kodvwa akawavumelanga kutsi akhulume ngobe abemati kutsi unguKhristu.*
35 Ekuseni ngeluvivi, waphuma waya endzaweni lethulile wafike wathantaza.+
36 Kodvwa Simoni nalabo lebekanabo bamfuna,
37 futsi nabamtfola batsi kuye: “Bonkhe bantfu bayakufuna.”
38 Yena watsi kubo: “Asiyeni nasemadolobheni lasedvute kuze ngiyoshumayela nakhona, ngobe nguloko lengikutele.”+
39 Ngako wahamba, washumayela emasinagogeni abo kuyo yonkhe iGalile, wacosha nemadimoni.+
40 Indvodza lebeyinebulephelo yeta kuye, yafike yaguca embikwakhe yamncenga yatsi: “Nawutsandza ungangenta ngihlanteke.”+
41 Ngako Jesu wayihawukela lendvodza futsi wayitsintsa ngesandla, watsi kuyo: “Ngiyatsandza, hlanteka!”+
42 Ngekushesha lobulephelo baphela, futsi lendvodza yahlanteka.
43 Ngemuva kwaloko wayidvonsa ngendlebe, wase utsi ayihambe,
44 watsi kuyo: “Ungatjeli muntfu ngaloku, kodvwa hamba uye kumphristi, futsi wente umnikelo ngenca yekuhlanjululwa kwakho njengobe kushiwo eMtsetfweni waMosi,+ khona kutewuba bufakazi kubo.”+
45 Kodvwa yatsi kube ihambe lendvodza, yatjela wonkhe umuntfu futsi yayisakata lendzaba, kangangekutsi Jesu abengasakhoni ngisho nekungena kunobe nguliphi lidolobha, kunaloko wahlala etindzaweni letithulile. Kepha bantfu bebasolo beta kuye bavela kuto tonkhe tindzawo.+
Imibhalo lengentansi
^ NgesiGriki kutsi, “embikwebuso bakho.”
^ Fundza Sandzisanchazo A5.
^ Fundza Tinchazelo Temagama.
^ Kungaphindze kubekwe ngekutsi, “bekamati kutsi ungubani.”
