Kubase-Efesu 4:1-32
4 Ngako-ke mine siboshwa+ eNkhosini, ngiyanincenga kutsi nihambe ngendlela lefanele+ lubito lenabitwa ngalo,
2 nihlale nitfobekile,+ nibe nemoya lophansi,* nicinisele,+ nibeketelelane ngelutsandvo,+
3 futsi nikhutsalele kugcina bunye bemoya ngesibopho sekuthula.+
4 Kunemtimba munye,+ nemoya munye,+ njengobe nje nabitelwa etsembeni linye;+
5 kuneNkhosi yinye,+ kukholwa kunye, nelubhabhatiso lunye;
6 kunaNkulunkulu munye longuBabe wabo bonkhe, longetulu kwabo bonkhe, losebenta ngabo bonkhe, nakubo bonkhe.
7 Ngamunye wetfu watfola umusa lomkhulu waNkulunkulu futsi nguKhristu lowasinika lesipho.+
8 Ngobe umbhalo utsi: “Nakakhuphukela endzaweni lephakeme watfumba bantfu; wasipha tipho letibantfu.”+
9 Asho kutsini-ke lamavi latsi ‘wakhuphuka’? Akasho yini nekutsi wehlela etindzaweni letingephansi, lokusho umhlaba?
10 Loyo lowehla nguye kanye lowakhuphukela+ ngetulu kwawo onkhe emazulu,+ kuze aphelelise tonkhe tintfo.
11 Wasipha labanye kutsi babe baphostoli,+ labanye babe baphrofethi,+ labanye babe bavangeli,*+ labanye babe belusi nebafundzisi,+
12 kuze balungise* labangcwele, bente umsebenti lophatselene nekushumayela, bakhe umtimba waKhristu,+
13 sonkhe size sifinyelele ebunyeni bekukholwa nebelwati lolungulonalona lweNdvodzana yaNkulunkulu, sibe njengendvodza lekhule ngalokwenele,*+ futsi sivutfwe ngelizinga leliphelele njengaKhristu.
14 Ngako kufanele singasabi bantfwana, sijikijeleke shengatsi sijikijelwa ngemagagasi, siyiswe lena nalena ngiyo yonkhe imimoya yetimfundziso+ tebantfu labayenganako futsi sipheshulwe ngemacebo ekudukisa.
15 Kodvwa asikhulume liciniso futsi sibe nelutsandvo, kuze sikhule kuto tonkhe tintfo kuKhristu, loyinhloko.+
16 Kuye, wonkhe umtimba+ uhlanganiswe ngekuvumelana, futsi wentiwa usebentisane ngawo onkhe emalunga lenta lokudzingekile. Nangabe lilunga ngalinye lisebenta kahle, loku kuba nesandla ekukhuleni kwemtimba njengobe utakha ngelutsandvo.+
17 Ngako-ke loku ngiyakusho futsi ngiyakufakazela eNkhosini, kutsi kufanele ningasahambi ngendlela tive letihamba ngayo+ ekubeni bete kwato ingcondvo.+
18 Tingcondvo tabo tisebumnyameni, futsi bakhashane nekuphila kwaNkulunkulu ngenca yekutsi abafuni kumati, nangenca yekutsi tinhlitiyo tabo atitsintseki.
19 Abasadliwa ngunembeza, futsi sebatinikele ekoneni lokuhambisana nekwedzelela*+ kuze bente yonkhe inhlobo yekungcola babe bangeneli.
20 Kodvwa nine anizange nifundze kutsi Khristu ungumuntfu lonjena,
21 ngobe wafundzisa liciniso, futsi nangabe namuva naphindze nafundziswa nguye, nitati kahle letintfo.
22 Nafundziswa kutsi nilahle buntfu lobudzala+ lobuvumelana nendlela lebenitiphatsa ngayo, futsi loboniwa tifiso letikhohlisako.+
23 Kufanele nichubeke niyenta ibe yinsha indlela lenicabanga ngayo,*+
24 nigcoke buntfu lobusha+ lobentiwe ngentsandvo yaNkulunkulu ngekuvumelana nekulunga kweliciniso kanye nebucotfo.
25 Njengobe seniwalahlile emanga, nguloyo naloyo akakhulume liciniso kumakhelwane wakhe,+ ngobe singemalunga emtimba munye.+
26 Tfukutselani kodvwa ningoni;+ lilanga alingashoni nisetfukutsele;+
27 ningamniki Develi litfuba.*+
28 Lowebako akangasebi, kodvwa akasebente kamatima, ente lokuhle ngetandla takhe,+ kuze abe nalokutsite langakuhlephulela loweswele.+
29 Akungaphumi ligama lelibolile emlonyeni wenu,+ kodvwa akuphume loko lokulungele kwakha kuye ngesidzingo, kuze kusitakale labo labalalele.+
30 Ngetulu kwaloko, ningawuvisi buhlungu* umoya longcwele waNkulunkulu,+ lenabekwa ngawo luphawu+ nilungiselelwa lilanga lekukhululwa ngenhlawulo.+
31 Lahlani tonkhe tinhlobo tenzondo,+ intfukutselo, lulaka, umsindvo, inkhulumo lehlabako+ kanye nako konkhe lokulimatako.+
32 Kodvwa nibophatsana ngemusa, nibe nesihawu,+ nitsetselelane ngekukhululeka njengobe nje naNkulunkulu anitsetselela ngekukhululeka ngaKhristu.+
Imibhalo lengentansi
^ Nobe “nibe mnene.”
^ Nobe “bashumayeli betindzaba letimnandzi.”
^ Nobe “baceceshe.”
^ Nobe “njengendvodza levutsiwe.”
^ Nobe “kwenta tintfo letenyanyekako ungenamahloni.” NgesiGriki kutsi a·selʹgei·a. Fundza Tinchazelo Temagama.
^ Nobe “emandla enu ekucabanga.” NgesiGriki kutsi, “umoya wengcondvo yenu.”
^ Nobe “indzawo.”
^ Nobe “ningawudzabukisi.”
