Kulandzisa KwaJohane 4:1-54
4 Ngesikhatsi Jesu abona kutsi baFarisi besebevile kutsi utfola bafundzi labanyenti kwendlula Johane, nekutsi uyababhabhatisa+—
2 nanobe bebangabhajatiswa nguye kodvwa babhajatiswa bafundzi bakhe—
3 wesuka eJudiya wabuyela eGalile.
4 Kodvwa bekudzingeka kutsi adzabule eSamariya.
5 Ngako wefika edolobheni laseSamariya lelibitwa ngekutsi yiSikhari, lelisedvute nensimu Jakobe layinika Josefa indvodzana yakhe.+
6 Kuleyo ndzawo bekunemtfombo waJakobe.+ Njengobe Jesu bekadziniwe, wahlala eceleni kwawo. Besekusondzela insimbi yelishumi nakubili emini.*
7 Lomunye umfati waseSamariya weta atowukha emanti. Jesu watsi kuye: “Ngicela unginatsise.”
8 (Bafundzi bakhe bebaye edolobheni bayotsenga kudla.)
9 Lomfati watsi kuye: “Kwentiwa yini kutsi nanobe wena ungumJuda utsi angikunatsise, ngibe mine ngingumSamariya?” (Phela emaJuda bekangawatsandzi emaSamariya.)+
10 Jesu wamphendvula watsi: “Kube bewusati sipho lesivela kuNkulunkulu+ nekutsi ngubani lona lotsi kuwe: ‘Ngicela unginatsise,’ bewungamcela emanti futsi bekangakupha emanti ekuphila.”+
11 Lomfati watsi kuye: “Mnumzane, ute ngisho nentfo yekukha emanti, kantsi nalomtfombo uyashona. Pho utawatsatsaphi lamanti ekuphila?
12 Angitsi wena awusimkhulu kunakhokho wetfu Jakobe, lokunguye lowasinika lomtfombo lebekanatsa kuwo yena nemadvodzana akhe kanye netinkhomo takhe?”
13 Jesu watsi kuye: “Nobe ngubani lonatsa lamanti utawuphindze ome.
14 Kodvwa nobe ngubani lonatsa emanti lengitamnika wona ngeke aphindze ome,+ ngobe lamanti lengitamnika wona atawuba njengemtfombo lophuphumako, amnike kuphila lokuphakadze.”+
15 Lomfati watsi kuye: “Mnumzane, ngicela lamanti khona ngingatophindze ngome nobe ngite kulendzawo kutowukha emanti.”
16 Jesu watsi kulomfati: “Hamba uyobita indvodza yakho, nite lapha.”
17 Lomfati wamphendvula watsi: “Ngite indvodza.” Jesu watsi kuye: “Ucinisile nawutsi ute indvodza.
18 Ngobe bewunemadvodza lasihlanu, nalena lonayo nyalo ayisiyo yakho. Ngako ukhuluma liciniso.”
19 Lomfati watsi: “Mnumzane, ngiyabona kutsi ungumphrofethi.+
20 Bokhokho betfu bebakhonta Nkulunkulu kulentsaba, kodvwa nine nitsi kufanele akhontelwe eJerusalema.”+
21 Jesu watsi kuye: “Ngikholwe nangitsi: Sikhatsi siyeta lapho Babe ningeke nisamkhonta kulentsaba nobe eJerusalema.
22 Nine nikhonta leningakwati;+ tsine sikhonta lesikwatiko, ngobe insindziso icala kumaJuda.+
23 Ngetulu kwaloko, sikhatsi siyeta, futsi sengiso nanyalo, lapho emakholwa eliciniso atawukhonta Babe ngemoya nangeliciniso, ngobe Babe ufuna kukhontwa ngulabanjalo.+
24 Nkulunkulu unguMoya,+ nalabo labamkhontako kufanele bamkhonte ngemoya nangeliciniso.”+
25 Lomfati watsi kuye: “Ngiyati kutsi Mesiya uyeta, loyo lobitwa ngekutsi nguKhristu. Nakefika utawusitjela tonkhe tintfo.”
26 Jesu watsi kuye: “Mine lengikhuluma nawe nginguye.”+
27 Kwatsi kusenjalo, bafundzi bakhe befika, futsi bamangala ngobe bekakhuluma nemfati. Kodvwa kute kubo lowatsi: “Ufunani?” nobe atsi: “Ukhulumelani nalomfati?”
28 Ngako lomfati washiya imbita yakhe yemanti waya edolobheni wafike watjela bantfu watsi:
29 “Wotani nitobona indvodza lengitjele konkhe lengikwentile. Kungenteka yini kutsi inguKhristu?”
30 Labantfu besuka edolobheni baya kuJesu.
31 Bafundzi bebamncenga batsi: “Dlani Mfundzisi.”*+
32 Kodvwa yena watsi kubo: “Nginekudla nine leningakwati.”
33 Ngako bakhuluma bodvwa batsi: “Angitsi kute lomletsele kudla?”
34 Jesu watsi kubo: “Kudla kwami kwenta intsandvo yaloyo longitfumile+ nekutsi ngicedze umsebenti wakhe.+
35 Angitsi nine nitsi sekusele tinyanga letine kutsi kuvunwe? Ngako ngitsi kini: Bukani emasimu, sekamhlophe alungele kuvunwa.+
36 Lovunako sewuvele utfola loko lakusebentele, futsi ubutsa titselo letitawuhlala phakadze, khona lohlanyelako nalovunako batojabula kanye kanye.+
37 Ngako-ke iliciniso inkhulumo letsi: Lomunye uyahlanyela, lomunye avune.
38 Nginitfume kutsi niyovuna loko leningakakusebenteli. Labanye basebentile, nine nitfola umvuzo wemsebenti wabo.”
39 Bantfu labanyenti baseSamariya lebebavela kulelodolobha bakholwa kuJesu ngenca yalomfati lowatsi kubo: “Ungitjele konkhe lengikwentile.”+
40 Ngako lamaSamariya efika kuye amcela kutsi ahlale nawo, wahlala khona emalanga lamabili.
41 Lamanyenti akholwa ngenca yaloko Jesu lakusho,
42 abese atsi kulomfati: “Asisakholwa ngenca yaloko lositjele kona kuphela; ngobe sesitivele tsine matfupha futsi sesiyati kutsi vele lomuntfu unguye umsindzisi welive.”+
43 Ngemuva kwalamalanga lamabili, wesuka lapho waya eGalile.
44 Nanobe kunjalo, Jesu wakusho yena matfupha kutsi umphrofethi akahlonishwa endzaweni yakubo.+
45 Kodvwa watsi nakefika eGalile, bantfu bakhona bamemukela, ngobe bebabone tonkhe tintfo lebekatentile eJerusalema ngesikhatsi semkhosi,+ njengobe nabo bebayile kuwo.+
46 Waphindze waya eKhana yaseGalile, lapho bekagucule khona emanti aba liwayini.+ Kuleyondzawo bekunenceku yenkhosi lebeyigulelwa yindvodzana yayo eKhaphanawume.
47 Ngesikhatsi lendvodza iva kutsi Jesu sewusukile eJudiya futsi sewuseGalile, yaya kuye yamcela kutsi ehle ayokwelapha indvodzana yayo, ngobe beyigulela kufa.
48 Nanobe kunjalo, Jesu watsi kuyo: “Ngaphandle kwekutsi nibone tibonakaliso nobe timangaliso, ngeke nikholwe.”+
49 Lenceku yenkhosi yatsi kuye: “Nkhosi, ngicela ute, asengakafi umntfwanami.”
50 Jesu watsi kuyo: “Hamba ngobe indvodzana yakho seyiphilile.”+ Lendvodza yawakholwa lamavi aJesu yase iyahamba.
51 Yatsi nayisendleleni lebuyela emuva tisebenti tayo tayihlangabeta titoyitjela kutsi lomntfwana sewuphilile.*
52 Ngako lenceku yabuta sikhatsi lomntfwana labe ncono ngaso. Tona tatsi: “Lomkhuhlane ube ncono itolo nasekusondzela insimbi yekucala emini.”*
53 Lobabe wati kutsi leso bekungulesikhatsi Jesu lebekatsite ngaso: “Indvodzana yakho seyiphilile.”+ Ngako yena nabo bonkhe bendlu yakhe bakholwa kuJesu.
54 Lesi kwaba simangaliso sesibili+ Jesu lasenta eGalile nakesuka eJudiya.
Imibhalo lengentansi
^ NgesiGriki kutsi, “li-awa lesitfupha.”
^ NgesiGriki kutsi, “Rabi.”
^ Nobe “sewuncono.”
^ NgesiGriki kutsi, “li-awa lesi-7.”
