Kulandzisa KwaJohane 11:1-57
11 Bekunendvodza lebeyigula, libito layo kunguLazaro, futsi beyiyaseBhetani, lokulidolobha lakuboMariya naMata+ longudzadzewabo.
2 LoLazaro lebekagula bekangumnakabo Mariya lowagcobisa iNkhosi ngemafutsa lanemakha waphindze wesula tinyawo tayo ngetinwele takhe.+
3 Ngako bodzadzewabo batfumela umlayeto kuJesu, batsi: “Nkhosi, umngani wakho lomtsandza kakhulu uyagula.”
4 Nakeva loku, Jesu watsi: “Siphetfo salokugula ngeke kube kufa, kepha kutawuba kukhatinyuliswa kwaNkulunkulu,+ nekutsi iNdvodzana yaNkulunkulu ikhatinyuliswe ngako.”
5 Jesu bekabatsandza boMata nadzadzewabo, kanye naLazaro.
6 Kodvwa watsi nakeva kutsi Lazaro uyagula, wahlala emalanga lamabili kulendzawo lebekakuyo.
7 Ngemuva kwaloko, watsi kubafundzi bakhe: “Asibuyeleni eJudiya.”
8 Bona batsi: “Mfundzisi,*+ akukapheli malanga mangakhi bantfu baseJudiya bafuna kukugcoba ngematje,+ kodvwa utsi asibuyele khona?”
9 Jesu wabaphendvula watsi: “Angitsi imini inema-awa langu-12?+ Umuntfu nakahamba emini akagilwa lutfo, ngobe ubona kukhanya kwemhlaba.
10 Kodvwa nangabe umuntfu ahamba ebusuku, uyagileka, ngobe usuke asebumnyameni.”
11 Ngemuva kwekusho loku, wachubeka watsi: “Umngani wetfu Lazaro ulele,+ kodvwa ngiya khona kuze ngimvuse.”
12 Bafundzi bakhe batsi kuye: “Nkhosi, nangabe alele utawululama.”
13 Ecinisweni Jesu bekasho kutsi ufile, kodvwa bona bebacabanga kutsi ukhuluma ngekulala lokuvamile.
14 Ngemuva kwaloko Jesu wabacacisela watsi: “Lazaro ufile,+
15 futsi ngiyajabula kutsi bengingekho lapho, ngobe nyalo kukholwa kwenu kutawucina. Kodvwa asambeni siye kuye.”
16 Tomase, lobekabitwa ngekutsi Liphahla, watsi kulalabanye bafundzi: “Natsi asambeni, kuze sife naye.”+
17 Ngesikhatsi Jesu efika, wakhandza kutsi besekwendlule emalanga lamane Lazaro angcwatjiwe ethuneni.
18 IBhetani beyisondzelene neJerusalema, bekungaba ngemakhilomitha lamatsatfu* kusuka eJerusalema uye eBhetani.
19 EmaJuda lamanyenti bekete kuboMata naMariya kuze abalilele ngekushona kwemnakabo.
20 Ngesikhatsi Mata eva kutsi Jesu usendleleni, wamhlangabeta, kodvwa Mariya+ wasala ekhaya.
21 Mata wabese utsi kuJesu: “Nkhosi, kube bewukhona, umnaketfu ngabe akakafi.
22 Kodvwa-ke ngiyati kutsi Nkulunkulu ukunika tonkhe tintfo loticela kuye.”
23 Jesu watsi kuye: “Umnakenu utawuvuka.”
24 Mata watsi: “Ngiyati kutsi utawuvuka ngelilanga lekugcina nasekuvuswa labafile.”+
25 Jesu watsi kuye: “Mine ngikuvuka nekuphila.+ Loyo lokholwa ngimi, ngisho nobe angafa, utawuphindze avuke;
26 futsi wonkhe umuntfu lophilako, akholwe ngimi ngeke aze afe.+ Wena uyakukholwa yini loko?”
27 Yena watsi: “Yebo Nkhosi; ngiyakholwa kutsi unguKhristu iNdvodzana yaNkulunkulu, leyo lokufanele ite emhlabeni.”
28 Ngemuva kwekusho loku, wajika wayobita dzadzewabo longuMariya, wakhuluma naye babodvwa watsi: “UMfundzisi+ sewukhona futsi uyakubita.”
29 Mariya watsi nakeva loko, wasukuma ngekushesha waya kuJesu.
30 Jesu bekasengakefiki kulelidolobha, kodvwa bekasekulendzawo lapho bekahlangane khona naMata.
31 LamaJuda lebekasendlini atodvudvuta Mariya amlandzela nakambona asukuma ngekushesha aphuma, ngobe bekacabanga kutsi uya ethuneni+ uyokhalela khona.
32 Mariya watsi nakefika lapho bekunaJesu khona futsi ambona, waguca embikwakhe watsi kuye: “Nkhosi, kube bewukhona, umnaketfu ngabe akakafi.”
33 Ngesikhatsi Jesu abona Mariya nalamaJuda lebekahamba nawo bakhala, wadvonsa umoya kabuhlungu* futsi weva buhlungu kakhulu.
34 Watsi: “Nimbekephi?” Bona batsi kuye: “Nkhosi, wota utewubona.”
35 Ngako Jesu wakhala tinyembeti.+
36 LamaJuda atsi: “Bukani kutsi bekamtsandza kwani!”
37 Kodvwa labanye batsi: “Lomuntfu wavula emehlo endvodza lebeyingaboni,+ pho bekangeke yini avimbe kutsi lona angafi?”
38 Ngemuva kwekutsi Jesu aphindze wadvonsa umoya kabuhlungu, wase ufika ethuneni. Ecinisweni belingumhume, futsi belivalwe ngelitje.
39 Jesu watsi: “Susani lelitje.” Mata, dzadzewabomufi watsi kuye: “Nkhosi, kungenteka kutsi nyalo sewuyanuka, ngobe sekwendlule emalanga lamane.”
40 Jesu watsi kuye: “Angikakutjeli yini kutsi nangabe ukholwa utawubona inkhatimulo yaNkulunkulu?”+
41 Ngako balisusa lelitje. Jesu wase ubuka ezulwini,+ watsi: “Babe, ngiyabonga ngekutsi ungivile.
42 Ngiyati kutsi uhlale ungiva; kodvwa ngikhulume ngenca yalesicumbi lesilapha, kuze sikholwe kutsi ungitfumile.”+
43 Ngemuva kwekusho loku, wamemeta watsi: “Lazaro, phuma!”+
44 Lomuntfu lobekafile waphuma, tinyawo netandla takhe betigigwe ngetindvwangu, nebuso bakhe bebuvalwe ngendvwangu. Jesu wabese utsi kubo: “Mkhumuleni, nimyekele ahambe.”
45 Ngako emaJuda lamanyenti lebekete kuMariya futsi lebekabone loko Jesu lebekakwentile, akholwa kuye,+
46 kodvwa lamanye awo aya kubaFarisi abatjela loko Jesu lebekakwentile.
47 Ngako baphristi labakhulu nebaFarisi babitela ndzawonye emalunga eNkantolo YemaJuda, batsi: “Sitawenta njani ngobe lomuntfu wenta timangaliso letinyenti?+
48 Nasimyekela achubeka ngalendlela, bonkhe bantfu batawukholwa kuye, nemaRoma atawuta atsatse lendzawo* kanye nalesive setfu.”
49 Kodvwa lomunye wabo, lokutsiwa nguKhayafase,+ lebekangumphristi lophakeme ngalowo mnyaka, watsi kubo: “Nine anati lutfo,
50 futsi aniboni kutsi kuzuzisa nine kutsi umuntfu munye afele bonkhe bantfu, kunekutsi kubhubhe sive sonkhe.”
51 Loku lebekakusho bekungesuki kuye; kodvwa ngenca yekutsi bekangumphristi lophakeme kulowo mnyaka, waphrofetha kutsi Jesu bekatawufela sive.
52 Bekangeke afele sive kuphela, kepha bekatawuphindze abutsele ndzawonye bantfwana baNkulunkulu labasakatekile.
53 Ngako kusukela ngalelolanga bakha licebo lekubulala Jesu.
54 Ngenca yaloko, Jesu bekangasahambi lapho bekangabonwa khona bantfu labanyenti,* kodvwa wesuka lapho waya esifundzeni lesisedvute nelihlane, edolobheni lokutsiwa yi-Efrayimu,+ wahlala lapho nebafundzi bakhe.
55 LiPhasika+ lemaJuda beselisedvute, futsi bantfu labanyenti lebebaphuma emaphandleni bakhuphukela eJerusalema usengakefiki loMkhosi weliPhasika, kuze bayotihlambulula.
56 Labantfu bebafuna Jesu, futsi babutana bodvwa nabasethempelini batsi: “Nicabangani? Nisho kutsi ngeke ete nhlobo kulomkhosi?”
57 Baphristi labakhulu nebaFarisi bebakhiphe umyalo wekutsi nobe ngubani lowatiko kutsi Jesu ukuphi, ababikele kuze bayombamba.*
Imibhalo lengentansi
^ NgesiGriki kutsi, “Rabi.”
^ NgesiGriki kutsi, “ngemastadiya langaba ngu-15.” Stadiya sisinye besilingana nemamitha langu-185. Fundza Sandzisanchazo B14.
^ NgesiGriki kutsi, “wadzabuka emoyeni.”
^ Lokusho, lithempeli.
^ NgesiGriki kutsi, “ngemaJuda.”
^ Nobe “bayombopha.”
