Genesisi 1:1-31
1 Ekucaleni Nkulunkulu wadala emazulu nemhlaba.+
2 Umhlaba bewute lutfo futsi kute lobekuhlala kuwo. Bekunemanti lashonako kuyo yonkhe indzawo futsi kumnyama,+ umoya waNkulunkulu*+ wawehla wenyuka ngetulu kwemanti.+
3 Nkulunkulu watsi: “Akube nekukhanya.” Ngako kukhanya+ kwaba khona.
4 Ngemuva kwaloko Nkulunkulu wabona kutsi kukhanya kuhle, ngako wabese wehlukanisa kukhanya nebumnyama.
5 Nkulunkulu wabita kukhanya ngekutsi Yimini, kodvwa bumnyama wabubita ngekutsi Busuku.+ Ngako kwahlwa kwaphindze kwasa; leli bekulilanga lekucala.
6 Nkulunkulu wabese utsi: “Akube nemkhatsi+ lotawehlukanisa emanti, wehlukanise emanti langephansi nemanti+ langetulu.”
7 Ngako Nkulunkulu wabese wenta umkhatsi, wehlukanisa emanti langephansi kwalomkhatsi+ nalawo langetulu. Kwavele kwaba njalo.
8 Nkulunkulu wabita lomkhatsi ngekutsi Sibhakabhaka.* Ngako kwahlwa kwaphindze kwasa; leli bekulilanga lesibili.
9 Nkulunkulu wabese utsi: “Emanti langephansi kwemazulu akabutsane ndzawonye, kuvele umhlabatsi lowomile.”+ Kwavele kwaba njalo.
10 Nkulunkulu wabita umhlabatsi lowomile ngekutsi nguMhlaba,+ kodvwa lamanti wawabita ngekutsi Lwandle.+ Nkulunkulu wabona kutsi loku kuhle.+
11 Nkulunkulu wabese utsi: “Umhlaba awuvete tjani, uvete netitjalo letikhipha inhlanyelo kanye netihlahla tetitselo ngetinhlobo tato, titsele titselo futsi tikhiphe nenhlanyelo.” Kwavele kwaba njalo.
12 Ngako umhlaba wabese uveta tjani, netitjalo+ letikhipha inhlanyelo, kanye netihlahla tetitselo letikhipha inhlanyelo, kuye ngetinhlobo tato. Nkulunkulu wabona kutsi loku kuhle.
13 Ngako kwahlwa kwaphindze kwasa; leli bekulilanga lesitsatfu.
14 Nkulunkulu wabese utsi: “Akube netibane+ emazulwini* kuze tehlukanise imini nebusuku,+ futsi titawuba sibonakaliso, tikhombise tikhatsi temnyaka, emalanga kanye neminyaka.+
15 Titawuba semazulwini,* tikhanyisele umhlaba.” Kwavele kwaba njalo.
16 Ngako Nkulunkulu wenta lilanga nenyeti,* lilanga belitawukhanyisa emini+ kantsi inyeti beyitawukhanyisa ebusuku, futsi wenta netinkhanyeti.+
17 Nkulunkulu watibeka emazulwini* kuze tikhanyise emhlabeni,
18 tikhanyise emini nasebusuku futsi tehlukanise bumnyama nekukhanya.+ Nkulunkulu wabona kutsi loku kuhle.
19 Ngako kwahlwa kwaphindze kwasa; leli bekulilanga lesine.
20 Nkulunkulu wabese utsi: “Emanti akagcwale tilwane,* futsi tilwane letindizako atindize esibhakabhakeni, ngetulu kwemhlaba.”+
21 Ngako Nkulunkulu wadala tilwane letinkhulu taselwandle nato tonkhe tilwane* letihamba emantini ngetinhlobo tato, nato tonkhe tilwane letindizako ngetinhlobo tato. Nkulunkulu wabona kutsi loku kuhle.
22 Nkulunkulu wabese uyatibusisa, watsi: “Talanani nandze nigcwale elwandle,+ netilwane letindizako atigcwale emhlabeni.”
23 Ngako kwahlwa kwaphindze kwasa; leli bekulilanga lesihlanu.
24 Nkulunkulu wabese utsi: “Umhlaba awuvete tilwane* ngetinhlobo tato, tilwane letifuywako, netilwane letihumako* kanye netilwane tesiganga ngetinhlobo tato.”+ Kwavele kwaba njalo.
25 Ngako Nkulunkulu wabese wenta tilwane tesiganga ngetinhlobo tato, netilwane letifuywako ngetinhlobo tato kanye nato tonkhe tilwane letihumako ngetinhlobo tato. Nkulunkulu wabona kutsi loku kuhle.
26 Nkulunkulu wabese utsi: “Asente+ bantfu bafane natsi,*+ basifute,+ futsi babuse tinhlanti taselwandle, tilwane letindiza esibhakabhakeni, netilwane letifuywako, babuse wonkhe umhlaba kanye nato tonkhe tilwane letihumako letikhona kuwo.”+
27 Ngako Nkulunkulu wadala bantfu ngemfanekiso wakhe, bafana naye; wabadala kwaba ngulomdvuna nalomsikati.+
28 Nkulunkulu wabese uyababusisa, watsi kubo: “Talanani nandze nigcwale emhlabeni+ futsi niwuncobe,+ nibuse+ tinhlanti taselwandle, tilwane letindiza esibhakabhakeni, nato tonkhe tilwane letikhona emhlabeni.”
29 Nkulunkulu wabese utsi: “Ngininika tonkhe titjalo letikhipha inhlanyelo letikhona kuwo wonkhe umhlaba kanye nato tonkhe tihlahla letinetitselo letikhipha inhlanyelo, futsi titawuba kudla kwenu.+
30 Tonkhe tilwane tesiganga letikhona emhlabeni, tonkhe tilwane letindiza esibhakabhakeni nato tonkhe tintfo letiphilako* letihamba emhlabeni, ngitinika tonkhe titjalo letiluhlata kutsi tibe kudla kwato.”+ Kwavele kwaba njalo.
31 Ngemuva kwaloko Nkulunkulu wakubona konkhe lebekakwentile, futsi kwakukuhle kakhulu.+ Ngako kwahlwa kwaphindze kwasa; leli bekulilanga lesitfupha.
Imibhalo lengentansi
^ Nobe “emandla aNkulunkulu.”
^ Nobe “Lizulu.”
^ NgesiHebheru kutsi, “emkhatsini wemazulu.”
^ NgesiHebheru kutsi, “semkhatsini wemazulu.”
^ NgesiHebheru kutsi, “tibane letimbili.”
^ NgesiHebheru kutsi, “emkhatsini wemazulu.”
^ Nobe “imiphefumulo lephilako.”
^ Nobe “imiphefumulo lephilako.”
^ Nobe “imiphefumulo lephilako.”
^ Nobe “tilwane letihambako,” lokungenteka kutsi tihlanganisa imihumane kanye naletinye tinhlobo tetilwane letehlukile kuleti letibaliwe.
^ NgesiHebheru kutsi, “babe ngumfanekiso wetfu.”
^ Nobe “kuphila lokungumphefumulo; umphefumulo lophilako.”
