2 Tikhronike 32:1-33
32 Ngemuva kwaletintfo kanye netento taHezekiya tekwetsembeka,+ iNkhosi Senaheribi yase-Asiriya yefika yahlasela live lakaJuda. Yavimbetela emadolobha labiyelwe ngenjongo yekudzabula ekhatsi kuwo futsi iwancobe.+
2 Ngesikhatsi Hezekiya abona kutsi Senaheribi sewufikile futsi ufuna kulwa neJerusalema,
3 wabonisana netindvuna takhe nemasotja akhe langemachawe, wase uncuma kuvimba imitfombo yemanti lebeyingephandle kwelidolobha+ futsi babambisana naye kuloko.
4 Bantfu labanyenti bahlanganiswa ndzawonye, bavimba yonkhe imitfombo yemanti nemfudlana lebewugeleta kulelive, batsi: “Kungani emakhosi ase-Asiriya kufanele ete afike atfole emanti lamanyenti?”
5 Ngetulu kwaloko, ngekutimisela wakha lubondza lebeselubhidlikile, waphakamisa nemibhoshongo kulo futsi ngephandle wakha lolunye lubondza. Waphindze walungisa liGcuma*+ Lelidolobha laDavide, wakha tikhali* letinyenti nemahawu lamanyenti.
6 Wabese ukhetsa tindvuna telibutfo, watihlanganisa endzaweni yekuhlangana yesive lesegedeni lelidolobha, watikhutsata watsi:
7 “Banini nesibindzi nicine. Ningesabi nome netfuke ngenca yenkhosi yase-Asiriya+ kanye naso sonkhe lesicuku sebantfu lesikanye nayo ngobe banyenti labangakitsi kunalabo labangakuyo.+
8 Yona inemkhono wenyama* kodvwa tsine sinaJehova Nkulunkulu wetfu lotasisita aphindze asilwele etimphini.”+ Lamavi lashiwo yiNkhosi Hezekiya yakaJuda,+ abacinisa labantfu.
9 Ngemuva kwaloko, ngesikhatsi iNkhosi Senaheribi yase-Asiriya iseseLakhishi+ nalo lonkhe libutfo layo lelinemandla, yatfumela tinceku tayo eJerusalema eNkhosini Hezekiya yakaJuda nakuso sonkhe sive sakaJuda lesiseJerusalema,+ yatsi:
10 “Naku lokushiwo yiNkhosi Senaheribi yase-Asiriya, ‘Netsembeni lolokunenta nihlale eJerusalema ibe ivinjetelwe?+
11 Akanidukisi yini Hezekiya futsi akanibangeli yini kutsi nibulawe yindlala nekoma nakatsi: “Jehova Nkulunkulu wetfu utasikhulula esandleni senkhosi yase-Asiriya”?+
12 Akusuye yini loHezekiya lona lowasusa tindzawo letiphakeme+ taNkulunkulu wenu nema-al’thare akhe+ wabese utsi esiveni sakaJuda nakubantfu baseJerusalema: “Kufanele niguce embikweli-al’thare linye futsi kufanele nente umhlatjelo wekushiswa kulo”?+
13 Anikwati yini loko mine nabokhokho bami lesakwenta kubo bonkhe bantfu balamave?+ Bonkulunkulu betive kulamave bakhona yini kuvikela emave abo esandleni sami?+
14 Ngubani kubo bonkhe labonkulunkulu baletive lababhujiswa bokhokho bami lowakhona kusindzisa bantfu bakhe esandleni sami, lokungenta kutsi Nkulunkulu wenu anisindzise esandleni sami?+
15 Ningavumi kuyengwa nguHezekiya nome anidukise ngalendlela!+ Ningabeki litsemba lenu kuye ngobe kute nkulunkulu wanome ngabe ngusiphi sive nome umbuso lowakhona kusindzisa bantfu bakhe esandleni sami nasesandleni sabokhokho bami. Kangakanani-ke loNkulunkulu wenu, anganisindzisa yini esandleni sami?’”+
16 Letinceku takhe takhuluma tintfo letinyenti letimbi ngaJehova Nkulunkulu weliciniso nangaHezekiya inceku yaNkulunkulu.
17 Senaheribi waphindze wabhala tincwadzi+ etfuka Jehova Nkulunkulu wema-Israyeli+ futsi akhuluma kabi ngaye, atsi: “Njengobe bonkulunkulu betive talamave bangazange bakhone kusindzisa bantfu babo esandleni sami,+ naNkulunkulu waHezekiya, angeke abasindzise bantfu bakhe esandleni sami.”
18 Tachubeka timemeta ngelulwimi lwemaJuda kubantfu baseJerusalema lebebaselubondzeni kuze tibesabise futsi tibetfuse khona titewutfumba lelidolobha.+
19 Takhuluma kabi ngaNkulunkulu waseJerusalema talingisa indlela lebetikhuluma kabi ngayo ngabonkulunkulu bebantfu basemhlabeni, labangumsebenti wesandla semuntfu.
20 Kodvwa iNkhosi Hezekiya nemphrofethi Isaya+ indvodzana ya-Amozi, bachubeka bathantaza futsi bakhala emazulwini bacela lusito mayelana naloko.+
21 Jehova wabese utfumela ingilosi futsi yabulala onkhe emasotja latingwazi,+ baholi kanye netindvuna lebetisenkambu yenkhosi yase-Asiriya kangangekutsi yabuyela eveni layo ihlazekile. Ngekuhamba kwesikhatsi yangena endlini* yankulunkulu wayo, khona lapho lamanye emadvodzana ayo ayihlasela ayibulala ngenkemba.+
22 Jehova wamsindzisa ngaleyo ndlela-ke Hezekiya nebantfu baseJerusalema esandleni seNkhosi Senaheribi yase-Asiriya nasetandleni tabo bonkhe labanye futsi wabaniketa kuthula kuyo yonkhe indzawo.
23 Bantfu labanyenti baletsa tipho kuJehova eJerusalema netintfo telikhetselo eNkhosini Hezekiya yakaJuda+ futsi lenkhosi yahlonishwa kakhulu bantfu bato tonkhe tive kusukela ngaleso sikhatsi.
24 Kulawo malanga, Hezekiya wahlatjwa kugula, futsi besekagulela kufa. Wathantaza kuJehova,+ wamphendvula waphindze wamnika luphawu.*+
25 Kodvwa Hezekiya akazange akhombise kubonga ngetintfo letinhle labekentelwe tona, ngobe inhlitiyo yakhe beseyigcwele kutati, watiletsela yena intfukutselo kanye nesive sakaJuda neJerusalema.
26 Nobe kunjalo, Hezekiya watitfoba kulokutigcabha lobekusenhlitiyweni yakhe+ nebantfu baseJerusalema batitfoba, lokwenta intfukutselo yaJehova yangabavutseli ngemalanga ekuphila kwaHezekiya.+
27 Hezekiya waba nemcebo lomnyenti futsi wadvuma kakhulu.+ Watakhela tindlu tekubeka+ lisiliva lakhe, ligolide, ematje laligugu, emafutsa ebhalisamu, emahawu kanye nato tonkhe tintfo latitsandzako.
28 Waphindze wakha tindzawo tekubeka sivuno salokutinhlavu, liwayini lelisha nemafutsa, wakha netibaya tekugcina lonkhe luhlobo lwemfuyo netibaya temihlambi yetilwane.
29 Waphindze watakhela emadolobha futsi waba nemfuyo lenyenti, ngobe Nkulunkulu wamnika tintfo letinyenti kakhulu.
30 NguHezekiya lowamisa imitfombo yemanti+ lengenhla yaseGihoni,+ wawacondzisa entansi ngasenshonalanga neliDolobha laDavide+ futsi waphumelela kuyo yonkhe imisebenti yakhe.
31 Nome kunjalo, ngalesikhatsi bakhulumeli betindvuna taseBhabhulona batfunywe kutobuta ngaloluphawu*+ lobelubonakele eveni,+ Nkulunkulu weliciniso wamshiya kuze amvivinye+ aphindze abone konkhe lobekusenhlitiyweni yakhe.+
32 Lomunye umlandvo waHezekiya nemisebenti yakhe yekwetsembeka,*+ kubhaliwe embonweni wa-Isaya+ umphrofethi, indvodzana ya-Amozi, eNcwadzini yeMakhosi akaJuda newaka-Israyeli.+
33 Hezekiya wabese uyafa, wangcwatjwa lapho kwangcwatjwa khona bokhokho bakhe. Bamngcwaba endzaweni leyenyukelako labekungcwatjwa khona emadvodzana aDavide;+ futsi sonkhe sive sakaJuda nebantfu baseJerusalema bamhlonipha ekufeni kwakhe. Indvodzana yakhe Manase yaba yinkhosi esikhundleni sakhe.
Imibhalo lengentansi
^ Nobe “iMilo.” NgesiHebheru leligama lisho “kugcwalisa.”
^ Nobe “imicibisholo.”
^ Nobe “inemandla emuntfu.”
^ Nobe “ethempelini.”
^ Nobe “sibonakaliso.”
^ Nobe “sibonakaliso.”
^ Nobe “yelutsandvo lolucotfo.”
