Incwadzi Yesibili YaPhetro 2:1-22
2 Kodvwa kwake kwaba khona baphrofethi bemanga emkhatsini webantfu, njengobe nje kutawuba nebafundzisi bemanga emkhatsini wenu.+ Laba batawuletsa emahlelo layingoti ngekunyenya, futsi batawuphika ngisho nemnikati wabo lowabatsenga,+ batiletsele kubhujiswa lokusheshako.
2 Ngetulu kwaloko, labanyenti batawulandzela kona kwabo lokuhambisana nekwedzelela,*+ futsi ngenca yabo kutawukhulunywa kabi ngendlela yeliciniso.+
3 Ngekuba bukhali kwabo, batanicaphata ngemavi lakhohlisako. Kodvwa kwehlulelwa kwabo lokwahlelwa kusukela endvulo+ ngeke kwephute, nekubhujiswa kwabo kutawufika nakanjani.+
4 Ecinisweni Nkulunkulu akayekelanga kujezisa tingilosi letona,+ kodvwa watijika eThartharusi,*+ watibopha ngetinketane* ebumnyameni lobukhulu kuze tigcinelwe kwehlulelwa.+
5 Akayekelanga kujezisa live lasendvulo,+ kodvwa walondvolota Nowa umshumayeli wekulunga,+ wamgcina aphephile kanye nalabanye labangu-7,+ ngesikhatsi aletsa zamcolo eveni lebeligcwele bantfu labangamesabi Nkulunkulu.+
6 Wayilahla iSodoma neGomora, wayishisa yaphela nya yaba ngumlotsa,+ abeka sibonelo setintfo letitawehlela bantfu labangamesabi Nkulunkulu.+
7 Wasindzisa Loti lolungile,+ lobekacindzeteleke kakhulu ngenca yekona lokuhambisana nekwedzelela* lobekwentiwa bantfu labephula umtsetfo,
8 ngobe ngesikhatsi asahlala emkhatsini walabantfu, lomuntfu lolungile bekakubona kwephula kwabo umtsetfo futsi akuva nalebebakusho, loko bekumvisa buhlungu kakhulu* onkhe malanga.
9 Ngako Jehova* uyakwati kubakhulula ekulingweni bantfu labatinikele kuye,+ kepha labo labangakalungi ubagcinela kubhujiswa* ngelilanga lekwehlulelwa,+
10 ikakhulukati labo labafuna kungcolisa labanye+ nalabedzelela labo labanemagunya.*+
Banenkhani futsi bayatigabatisa, abesabi nekukhuluma kabi ngalabangcwele,
11 kepha nanobe tingilosi tinelikhono nemandla lamakhulu kakhulu, atibabeki licala ngemavi lahlambalatako, ngenca yekutsi tiyamhlonipha Jehova.*+
12 Kodvwa njengetilwane letingenangcondvo letenta ngekuvumelana nemvelo, naletitalelwe kubanjwa nekubulawa, labantfu bakhuluma kabi ngetintfo labangatati.+ Batawubhujiswa ngembhubhiso leletfwa kutiphatsa kwabo lokubi,
13 bahlupheke ngenca yekutiphatsa kwabo lokulimatako.
Kuyabajabulisa kutitika ngemphilo lentofontofo,+ ngisho nasemini imbala. Banjengemabala langcolile emphahleni nanjengetilondza ebusweni, futsi bajatjuliswa* timfundziso tabo tekukhohlisa babe bahlanganyela nani edzilini.+
14 Bahlale bafisa kuphinga,*+ bayehluleka kuyekela kwenta sono, futsi bakhohlisa lababutsakatsaka. Tinhlitiyo tabo batifundzise kuba bukhali. Bacalekisiwe.
15 Ngenca yekutsi balahle indlela lecondzile, badukisiwe. Balandzele indlela yaBhalamu+ indvodzana yaBheyori, lobekatsandza umvuzo webubi,+
16 kodvwa wekhutwa ngenca yekwephula umtsetfo.+ Imbongolo lengakhulumi yakhuluma ngelivi lemuntfu, yavimba kuhlanya kwalomphrofethi.+
17 Labantfu bayimitfombo lete emanti, bangemafu lapheshulwa sivunguvungu lesinemandla, futsi bagcinelwe bumnyama lobukhulu.+
18 Bakhuluma tintfo letibonakala tibalulekile kodvwa letilite. Benta tono letihambisana nekwedzelela* futsi benta kutsi bantfu baphindze babe netifiso letimbi,+ babakhohlise kuze bente tintfo labasandza nje kutiyekela.+
19 Nanobe babetsembisa inkhululeko, kepha kwabona batigcili tekonakala.+ Ngobe nangabe umuntfu ancotjwa ngulotsite, uba sigcili sakhe.*+
20 Ecinisweni nangabe ngemuva kwekuphunyuka ekungcoleni kwalelive+ ngelwati lolungulonalona ngeNkhosi neMsindzisi, Jesu Khristu, baphindze bente tona letintfo futsi bancotjwe, simo sabo sekugcina sibi kakhulu kunesekucala.+
21 Bekutawuba ncono ngabo kutsi bangayati kahle indlela yekulunga kunekutsi ngemuva kwekuyati bafulatsele umyalo longcwele labawemukela.+
22 Sekwentekile kubo loko lokushiwo saga lesiliciniso lesitsi: “Inja seyibuyele emahlanteni ayo, nengulube legeziwe seyitigicite eludzakeni.”+
Imibhalo lengentansi
^ Nobe “kwenta tintfo letenyanyekako ungenamahloni.” NgesiGriki kutsi a·selʹgei·a. Fundza Tinchazelo Temagama.
^ Fundza Tinchazelo Temagama.
^ Kungaphindze kubekwe ngekutsi, “watifaka emigodzini.”
^ Nobe “kwenta tintfo letenyanyekako ungenamahloni.” NgesiGriki kutsi a·selʹgei·a. Fundza Tinchazelo Temagama.
^ NgesiGriki kutsi, “bekuwuvisa buhlungu kakhulu umphefumulo wakhe.” Fundza Tinchazelo Temagama.
^ Fundza Sandzisanchazo A5.
^ NgesiGriki kutsi, “kujutjwa.”
^ Nobe “labababukela phansi labo labasetikhundleni.”
^ Nobe “tiyahlonipha embikwaJehova.” Fundza Sandzisanchazo A5.
^ Nobe “batitika.”
^ Nobe “Emehlo abo agcwele kuphinga.”
^ Nobe “kwenta tintfo letenyanyekako ungenamahloni.” NgesiGriki kutsi a·selʹgei·a. Fundza Tinchazelo Temagama.
^ Nobe “ancotjwa ngulokutsite, uba sigcili sako.”
