Yekucala KubaseKhorinte 9:1-27
9 Mine angikakhululeki yini? Angisuye yini umphostoli? Angizange ngimbone yini Jesu loyiNkhosi yetfu?+ Nine anisiwo yini umsebenti wami eNkhosini?
2 Ngisho nome ngingasuye umphostoli kulabanye, kodvwa-ke nginguye kini. Ngobe nine niluphawu lolufakazela kutsi ngingumphostoli lomelele iNkhosi.
3 Nayi indlela lengitiphendvulela ngayo kulabo labangiphenyako:
4 Site yini lilungelo* lekudla nelekunatsa?
5 Site yini lilungelo lekuhamba nebafati+ betfu labakholwako njengabo bonkhe baphostoli, nebanakabo beNkhosi+ kanye naKhefase?*+
6 Nobe ngimi naBhanabasi+ kuphela yini lesite lilungelo lekuyekela umsebenti wekutiphilisa?
7 Likhona yini lisotja lelingasebenta ngetindleko talo? Ukhona yini longahlanyela insimu yemagilebisi kodvwa angatidli titselo tayo?+ Nobe ukhona yini longelusa umhlambi kodvwa angalunatsi lubisi lwawo?
8 Letintfo ngitisho ngekwembono wemuntfu yini? UMtsetfo nawo awutisho yini?
9 Ngobe eMtsetfweni waMosi kubhaliwe kwatsiwa: “Ungayifaki sifonyo inkhabi nayibhula.”+ Nkulunkulu ukhatsateka ngetinkhabi yini?
10 Loku akakusho yini ngenca yetfu? Ecinisweni letintfo tabhalwa ngenca yetfu, ngobe umuntfu lohlanyelako naloyo lobhulako kufanele ente kanjalo anelitsemba lekudla.
11 Nangabe sihlanyele tintfo letivela kuNkulunkulu emkhatsini wenu, kukabi yini kutsi semukele tintfo lesitidzingako letivela kini?+
12 Nangabe labanye bantfu banalelilungelo lekunakekelwa ngini, tsine site yini lelikhulu kunalelo labanalo? Nanobe kunjalo, asikalisebentisi lelilungelo,*+ kodvwa sibeketelela tonkhe tintfo kuze singativimbeli nganobe nguyiphi indlela tindzaba letimnandzi letimayelana naKhristu.+
13 Anati yini kutsi bantfu labenta imisebenti lengcwele badla tintfo letisethempelini, nekutsi labo labahlale benta imisebenti e-al’thare batfola incenye letsite kulo?+
14 Ngendlela lefanako, iNkhosi yayala labo labamemetela tindzaba letimnandzi kutsi baphile ngetindzaba letimnandzi.+
15 Kodvwa angikasebentisi ngisho nalinye lalamalungiselelo.+ Ecinisweni, loku angikakubhaleli kutsi letintfo tentelwe mine, ngobe bekutawuba ncono kufa kunekuvumela lotsite kutsi angemuke lilungelo lami lekutigabatisa.+
16 Nangabe ngimemetela tindzaba letimnandzi, ngite sizatfu sekutigabatisa, ngobe loku kufanele ngikwente. Kodvwa maye kimi nangabe ngingatimemeteli letindzaba letimnandzi!+
17 Nangabe loku ngikwenta ngekutitsandzela, ngitawutfola umvuzo; kodvwa ngisho nobe ngiwenta ngingatsandzi, kufanele ngiwente ngobe ngiphatsisiwe.+
18 Yini-ke lengitayitfola? Umvuzo wami kutawuba kumemetela tindzaba letimnandzi ngaphandle kwekubhadalwa, kuze ngibalekele kusebentisa kabi lilungelo lenginalo kuletindzaba letimnandzi.
19 Ngobe nanobe ngikhululekile kubo bonkhe bantfu, ngitente sigcili sabo bonkhe, kuze ngizuze labanyenti.
20 KumaJuda ngaba njengemJuda, kuze ngizuze emaJuda;+ kulabangephansi kwemtsetfo ngaba njengalongephansi kwemtsetfo, ngisho nobe ngingekho ngephansi kwemtsetfo, kuze ngizuze labangephansi kwemtsetfo.+
21 Kulabete umtsetfo ngaba njengalote umtsetfo, nanobe mine ngingasuye lote umtsetfo kuNkulunkulu kodvwa ngingephansi kwemtsetfo kuKhristu,+ kuze ngizuze labete umtsetfo.
22 Kulababutsakatsaka ngaba butsakatsaka, kuze ngizuze lababutsakatsaka.+ Ngibe ngiko konkhe kuto tonkhe tinhlobo tebantfu, kuze kutsi ngisindzise labatsite nakungenteka.
23 Ngenta tonkhe tintfo ngenca yetindzaba letimnandzi, kuze ngitotishumayela kulabanye.+
24 Anati yini kutsi emncintiswaneni tingijimi tigijima tonkhe, kodvwa yinye kuphela letfola umklomelo? Gijimani ngendlela letawunenta nitfole lomklomelo.+
25 Bonkhe bantfu labangenele umncintiswane bayatibamba kuto tonkhe tintfo. Bona bakwentela kutfola umchele lowonakalako,+ kodvwa tsine sikwentela kutfola umchele longonakali.+
26 Ngako-ke angigijimisi kwemuntfu lote umgomo;+ futsi nangigadla ngesibhakela akubi shengatsi ngigadla umoya;
27 kodvwa ngiyawucindzetela* umtimba wami+ futsi ngiwenta sigcili, kuze kutsi ngemuva kwekushumayela kulabanye kube bete lokungenta ngilahlwe.*
Imibhalo lengentansi
^ NgesiGriki kutsi, “ligunya.”
^ Ubitwa nangekutsi nguPhetro.
^ NgesiGriki kutsi, “leligunya.”
^ Nobe “ngiyawujezisa; ngiwekhuta kamatima.”
^ Nobe “ngingasafaneleki.”
