Incwadzi Yekucala YemaKhosi 22:1-53
22 Kwaphela iminyaka lemitsatfu solo kute imphi emkhatsini wemaSiriya nema-Israyeli.
2 Ngemnyaka wesitsatfu, iNkhosi Jehoshafati+ yakaJuda yewuka yaya enkhosini yaka-Israyeli.+
3 Inkhosi yaka-Israyeli yabese itsi etincekwini tayo: “Niyati yini kutsi iRamothi-gileyadi+ ngeyetfu? Kodvwa solo siyangabata kuyoyitsatsa enkhosini yaseSiriya.”
4 Lenkhosi yabese itsi kuJehoshafati: “Utawuhamba nami yini kuyolwa eRamothi-gileyadi?” Jehoshafati waphendvula inkhosi yaka-Israyeli watsi: “Mine ngifana nawe. Bantfu bami bafana nebantfu bakho. Emahhashi ami afana nemahhashi akho.”+
5 Kodvwa Jehoshafati watsi enkhosini yaka-Israyeli: “Ngicela ucale ngekubuta+ Jehova.”+
6 Ngako inkhosi yaka-Israyeli yahlanganisa baphrofethi, cishe emadvodza langu-400, yase itsi kubo: “Kufanele yini ngiyolwa neRamothi-gileyadi nome ngingayi?” Bona batsi: “Khuphuka, futsi Jehova utayinikela esandleni senkhosi.”
7 Jehoshafati wase utsi: “Kute yini lapha umphrofethi waJehova? Asesibute nakuye.”+
8 Inkhosi yaka-Israyeli yase itsi kuJehoshafati: “Kukhona indvodza yinye lesele lengasibutela kuJehova;+ kodvwa ngiyayitondza+ ngobe ayikaze iphrofethe tintfo letinhle ngami, iphrofetha letimbi todvwa.+ Ligama layo nguMikhaya indvodzana yaJimla.” Kodvwa Jehoshafati watsi: “Inkhosi akukafaneli ikhulume kanjena.”
9 Ngako inkhosi yaka-Israyeli yabita lenye yetindvuna tayo yatsi: “Letsa Mikhaya indvodzana yaJimla ngekushesha.”+
10 Inkhosi yaka-Israyeli naJehoshafati inkhosi yakaJuda bebahleli etihlalweni tabo tebukhosi bagcoke tembatfo temakhosi, basebaleni lekubhulela esangweni laseSamariya futsi bonkhe baphrofethi bebaphrofetha embikwabo.+
11 Sedekiya indvodzana yaKhenana wabese utentela timphondvo tensimbi, wase utsi: “Naku lokushiwo nguJehova, ‘Ngaletimphondvo utawuhlaba* emaSiriya uze uwacotfule.’”
12 Bonkhe lalabanye baphrofethi nabo bebaphrofetha intfo lefanako batsi: “Khuphukela eRamothi-gileyadi futsi utawuncoba; Jehova utayinikela esandleni senkhosi.”
13 Ngako lesitfunywa lesahamba sayobita Mikhaya satsi kuye: “Emavi lashiwo baphrofethi ayafanana futsi ayayijabulisa inkhosi. Ngicela kutsi nawe lokushoko kufane nekwalabaphrofethi futsi ukhulume ngendlela letawujabulisa inkhosi.”+
14 Mikhaya watsi: “Ngifunga Jehova Nkulunkulu lophilako ngitsi noma ngabe yini Jehova layishoko kimi ngitayikhuluma.”
15 Mikhaya wabese uyefika enkhosini, yona yambuta yatsi: “YeMikhaya, siye yini kuyolwa neRamothi-gileyadi noma singayi?” Ngekushesha wayiphendvula watsi: “Khuphukela khona futsi utawuncoba; Jehova utayinikela esandleni senkhosi.”
16 Inkhosi yabese itsi kuye: “Ngitakufungisa kuze kube kangakhi kutsi ungakhulumi noma ngabe yini kodvwa ukhulume liciniso kuphela egameni laJehova?”
17 Mikhaya wabese utsi: “Ngibona onkhe ema-Israyeli asakatekele etintsabeni+ njengetimvu letingenamelusi. Jehova utsite: ‘Labantfu bete inkhosi. Nguloyo naloyo akabuyele ekhaya lakhe ngekuthula.’”
18 Inkhosi yaka-Israyeli yase itsi kuJehoshafati: “Angikakutjeli yini ngatsi: ‘Angeke aphrofethe tintfo letinhle ngami kodvwa utawuphrofetha letimbi todvwa’?”+
19 Mikhaya wabese utsi: “Lalela livi laJehova: Ngibone Jehova ahleli esihlalweni+ sakhe sebukhosi futsi lonkhe libutfo lasemazulwini belime eceleni kwakhe, ngesekudla nangesencele sakhe.+
20 Jehova wabese utsi: ‘Ngubani lotawuyenga Ahabi kuze akhuphuke ayokulwa futsi afele eRamothi-gileyadi?’ Lenye ingilosi beyisho lokunye, nalenye isho lokunye.
21 Kwabese kusondzela lenye ingilosi*+ yema embikwaJehova yatsi, ‘Mine ngitamyenga.’ Jehova wayibuta watsi, ‘Utakwenta kanjani loko?’
22 Yaphendvula yatsi, ‘Ngitawuhamba futsi ngitawuba ngumoya lokhohlisako lotawungena emilonyeni yabo bonkhe baphrofethi bakhe.’+ Nkulunkulu watsi kuyo, ‘Utamkhohlisa, futsi utawuphumelela. Hamba uyokwenta loko.’
23 Nyalo, Jehova sewufake umoya lokhohlisako emilonyeni yabo bonkhe labaphrofethi bakho+ kodvwa Jehova umemetele inhlekelele letakwehlela.”+
24 Sedekiya indvodzana yaKhenana wasondzela kuMikhaya wafike wambhamula ngemphama esihlatsini wase utsi: “Lomoya waJehova uhambe ngakuphi nawendlula kimi utokhuluma nawe?”+
25 Mikhaya wamphendvula watsi: “Utawubona ngalelilanga lotawungena ngalo ekamelweni lelingekhatsi uyobhaca kutsi wendlule ngakuphi!”
26 Inkhosi yaka-Israyeli yabese itsi: “Tsatsani Mikhaya nimmikise ku-Amoni indvuna yelidolobha nakuJowashi indvodzana yenkhosi.
27 Nibofike nibatjele nitsi, ‘Naku lokushiwo yinkhosi: “Valelani lendvodza ejele,+ niyinike sinkhwa lesincane nemanti lamancane kuze kube ngulapho ngibuya ngekuthula.”’”
28 Kodvwa Mikhaya watsi: “Nangabe ubuya ngekuthula, Jehova utawube akakakhulumi nami.”+ Wengeta watsi: “Ngicela nonkhe nikunake loko.”
29 Ngako inkhosi yaka-Israyeli naJehoshafati inkhosi yakaJuda bakhuphukela eRamothi-gileyadi.+
30 Inkhosi yaka-Israyeli yatsi kuJehoshafati: “Ngitakuya emphini ngigcoke ngendlela yekutsi bangaboni kutsi ngiyinkhosi kodvwa wena kufanele ugcoke tembatfo takho tebukhosi.” Ngako lenkhosi yaka-Israyeli yagcoka ngendlela yekutsi ingabonakali+ kutsi ingubani futsi yabese iya emphini.
31 Inkhosi yaseSiriya beyinike tindvuna tayo tetincola temahhashi letingu-32 umyalo lotsi:+ “Ningalwi namuntfu, nome ngulomncane nome ngulomkhulu, ngaphandle kwenkhosi yaka-Israyeli.”
32 Ngekushesha nje letindvuna natibona Jehoshafati, takhuluma todvwa tatsi: “Nakanjani lena ngiyo inkhosi yaka-Israyeli.” Ngako tagucuka tayokulwa naye; futsi Jehoshafati wacala kukhalela lusito.
33 Ngesikhatsi letindvuna tibona kutsi akasiyo inkhosi yaka-Israyeli, tamyekela ngekushesha.
34 Kodvwa lenye indvodza lebeyitidubulela nje* ngebutjoki bayo, yadubula inkhosi yaka-Israyeli lapho kuhlangana khona sembatfo sayo semphi sekutivikela. Ngako inkhosi yatsi kuloyo lebekashayela incola yayo: “Jika ungisuse lakulemphi* ngobe ngilimele kakhulu.”+
35 Lemphi yachubeka ishubile lonkhe lelolanga futsi lenkhosi kwadzingeka kutsi bayisekele njengobe beyihleli kulencola ibuke emaSiriya. Ingati lebeyiphuma kulelinceba beyehlela ekhatsi kulencola yemphi futsi lenkhosi yagcine ifile ekushoneni kwelilanga.+
36 Nakushona lilanga, kwamenyetelwa kulenkambu kwatsiwa: “Wonkhe umuntfu akabuyele edolobheni lakubo! Wonkhe umuntfu akabuyele endzaweni yakubo!”+
37 Yafa kanjalo-ke lenkhosi yase iletfwa eSamariya; bayingcwaba khona eSamariya.
38 Ngalesikhatsi bawasha lencola yemphi eceleni kwelichibi laseSamariya, tinja takhotsa ingati yalenkhosi netingwadla tageza khona lapho,* ngekuvumelana nelivi lelakhulunywa nguJehova.+
39 Lomunye umlandvo wa-Ahabi, konkhe lakwenta, nendlu* layakha ngematinyo endlovu+ kanye nawo onkhe emadolobha lawakha, kubhaliwe encwadzini yemlandvo wangetikhatsi temakhosi aka-Israyeli.
40 Ahabi wase uyangcwatjwa lapho kwangcwatjwa khona bokhokho bakhe;+ futsi indvodzana yakhe Ahaziya+ yaba yinkhosi ngemuva kwakhe.
41 Jehoshafati+ indvodzana ya-Asa waba yinkhosi kaJuda ngemnyaka wesine wekubusa kweNkhosi Ahabi yaka-Israyeli.
42 Jehoshafati bekaneminyaka lengu-35 ngesikhatsi aba yinkhosi futsi wabusa iminyaka lengu-25 eJerusalema. Libito lamake wakhe bekungu-Azubha indvodzakati yaShilhi.
43 Wachubeka ahamba ngendlela yababe wakhe Asa.+ Akazange aphambuke kuyo futsi wenta lokuhle emehlweni aJehova.+ Nome kunjalo, tindzawo letiphakeme atizange tisuswe futsi bantfu bebasolo banikela kuto baphindze bente imihlatjelo yekushiswa kuletindzawo letiphakeme.+
44 Jehoshafati wahlalisana ngekuthula nenkhosi yaka-Israyeli.+
45 Lomunye umlandvo waJehoshafati, imisebenti yakhe yemandla nendlela lalwa ngayo timphi, kubhaliwe encwadzini yemlandvo wangetikhatsi temakhosi akaJuda.
46 Waphindze wasusa tonkhe tingwadla letindvuna tasethempelini+ kulendzawo lebetisele ngesikhatsi kusabusa Asa babe wakhe.+
47 Bekute inkhosi ka-Edomu+ ngaleso sikhatsi; kodvwa beyibanjelwe lisekela.+
48 Jehoshafati watfumela imikhumbi lebeyiya eThashishi* kutsi iye e-Ofiri iyolandza ligolide+ kodvwa ayikhonanga kufika khona ngobe lemikhumbi yaphukela e-Esiyoni-geberi.+
49 Ahaziya indvodzana ya-Ahabi wakhuluma ngaleso sikhatsi naJehoshafati watsi: “Tinceku takho atihambe kanye netinceku tami ngalemikhumbi,” kodvwa Jehoshafati akazange avume.
50 Jehoshafati wabese uyafa futsi wangcwatjwa lapho kwangcwatjwa khona bokhokho bakhe,+ wangcwatjwa eDolobheni laDavide khokho wakhe; indvodzana yakhe Jehoramu+ yaba yinkhosi ngemuva kwakhe.
51 Ahaziya+ indvodzana ya-Ahabi waba yinkhosi yaka-Israyeli eSamariya ngemnyaka wesi-17 wekubusa kweNkhosi Jehoshafati yakaJuda, futsi wabusa ema-Israyeli iminyaka lemibili.
52 Wachubeka enta lokubi emehlweni aJehova futsi wahamba endleleni yababe wakhe+ neyamake wakhe+ neyaJerobowamu indvodzana yaNebati, lowabangela ema-Israyeli kutsi one.+
53 Ahaziya wachubeka akhonta Bhali,+ amkhotsamela futsi wachubeka atfukutselisa Jehova Nkulunkulu wema-Israyeli+ njengobe nje bekwente babe wakhe.
Imibhalo lengentansi
^ Nobe “utawufuca.”
^ NgesiHebheru kutsi, “umoya.”
^ NgesiHebheru kutsi, “enkambu.”
^ Nobe “ingakahlosi.”
^ Kungaphindze kubekwe ngekutsi, “labekugeza khona tingwadla, tinja takhotsa ingati yayo.”
^ Nobe “sigodlo.”
^ Fundza Tinchazelo Temagama.
