Kwati naliciniso kutakudvudvuta: Nkulunkulu uyakubona kuhlupheka lokusemhlabeni futsi sekusedvute akucedze. (Tihlabelelo 72:13, 14) EVini lakhe liBhayibheli, Nkulunkulu wetsembisa kutsi ‘nine lenihluphekako utawuniletsela kuphumula.’ Kutakwenteka nini loku? “Ekwembulweni kweNkhosi Jesu ivela ezulwini, ikanye netingilosi tayo letinemandla .  . . njengobe Nkulunkulu aletsa imphindziselo kulabo labangamati nakulabangatilaleli tindzaba letimnandzi letimayelana neNkhosi yetfu Jesu.” (2 Thesalonika 1:7, 8) Lokwembulwa kwaJesu kutakwenteka esikhatsini lesitako, liBhayibheli lelisibita ngekutsi yimphi “yelilanga lelikhulu laNkulunkulu Somandla,” leliphindze libitwe nangekutsi yi-Amagedoni.​—Sembulo 16:14, 16.

Lemphi letako yaNkulunkulu angeke iliwe bantfu kodvwa itawuliwa yiNdvodzana yakhe Jesu Khristu ikanye netingilosi, labatawube balwa nebantfu lababi. Emabutfo asezulwini atawucedza konkhe kuhlupheka.​—Isaya 11:4; Sembulo 19:11-16.

Kuze kube ngulamuhla Nkulunkulu solo akashintji, usengayisebentisa imphi kuze acedze bubi nekucindzeteleka. NguNkulunkulu kuphela loncumako kutsi ngubani lotakulwa nekutsi kutawuliwa nini, njengobe bekwenteka nakadzeni. Njengobe  sesifundzile, Nkulunkulu sewuvele uncumile kutsi imphi letawucedza kuhlupheka itawuliwa yiNdvodzana yakhe Jesu Khristu esikhatsini lesitako. Loku kusikhombisa kutsi Nkulunkulu akatisekeli timphi letikhona lamuhla ngisho noma kungatsiwa tiyevakala letizatfu tekulwa.

Cabanga nganasi sibonelo: Telamani tisele todvwa ekhaya futsi ticala kulwa. Tiyayekela lokulwa sikhashana bese tishayela babe wato. Lolomunye atsi usukelwe ngulona lomunye bese kutsi lolomunye yena atsi ngulona lomunye lomcalile. Nguloyo ufuna kutsi lobabe avune yena. Ngemuva kwekubalalela bobabili labantfwana bakhe, lobabe ubatjela kutsi abayekele lokulwa aze abuye, atovisisa kahle kutsi babangani. Nembala labantfwana bayekele kulwa. Kodvwa kutsi kungakapheli nemizuzu nje lembalwa bacalele phansi futsi balwe. Nakabuya ekhaya lobabe akajabuli futsi kute lamvunako, abashaye bobabili ngobe abakamlaleli.

Lamuhla tive letilwako tiyaye ticele Nkulunkulu kutsi atisekele. Kodvwa Nkulunkulu kute umuntfu lamsekelako kubantfu labalwako ngobe eVini lakhe liBhayibheli utsi: “Ningaphindziseli lokubi ngalokubi kunobe ngubani,” uphindze atsi “ningatiphindziseleli.” (Roma 12:17, 19) Uphindze watjela bantfu kutsi ‘bamlindzele ngesineke’ ngobe utawucedza konkhe kuhlupheka ngemphi yakhe i-Amagedoni. (Tihlabelelo 37:7) Nangabe tive tehluleka kulalela Jehova, tikhetsa kulwa ,tisuke tikhombisa kutsi atimhloniphi futsi loko akumjabulisi. Ngako nge-Amagedoni, Nkulunkulu utawukhombisa lulaka lwakhe, acedze netincabano emkhatsini wetive letilwako ngekutsi ‘acedze timphi emhlabeni wonkhe jikelele.’ (Tihlabelelo 46:9; Isaya 34:2) I-Amagedoni yimphi yaNkulunkulu letawucedza tonkhe timphi.

Kuphela kwetimphi kungulesinye sibusiso lesitawuletfwa nguMbuso waNkulunkulu. Jesu wakhuluma ngaloMbuso emthantazweni wakhe lowatiwa kakhulu watsi: “UMbuso wakho awute. Intsandvo yakho ayentiwe emhlabeni njengasezulwini.” (Matewu 6:10) UMbuso waNkulunkulu angeke ucedze timphi kuphela kodvwa utawususa bonkhe bantfu lababi lababangela kutsi kube netimphi. a (Tihlabelelo 37:9, 10, 14, 15) Kungako balandzeli baJesu batibuke ngalabovu tibusiso lesitatitfola nasekubusa uMbuso waNkulunkulu.​—2 Phetro 3:13.

Kutawuze kube ngunini solo silindzele kutsi Nkulunkulu acedze konkhe kuhlupheka, kucindzeteleka kanye nato tonkhe tintfo letimbi? Indlela tintfo letenteka ngayo tigcwalisa tiphrofetho letiseBhayibhelini letikhombisa kutsi siphila “emalangeni ekugcina.” (2 Thimothi 3:1-5) b Sekusedvute kutsi emalanga ekugcina aphele, atawuphela nakufika i-Amagedoni letawuletfwa nguMbuso waNkulunkulu.

Njengobe sifundzile ekucaleni, ‘labangatilaleli tindzaba letimnandzi letimayelana neNkhosi yetfu Jesu’ batawubhujiswa. (2 Thesalonika 1:8) Kodvwa kufanele sikhumbule kutsi Nkulunkulu akajabuli nakabona bantfu bafa, ngisho kungatsiwa bebenta tintfo letimbi. (Hezekeli 33:11) Njengoba ‘angakujabuleli kufa kwalomubi,’ Jehova utfume bantfu bakhe kutsi bashumayele “emhlabeni wonkhe, kuze kube bufakazi etiveni tonkhe,” ngaphambi kwekutsi abhubhise bonkhe bantfu labangamlaleli. (2 Phetro 3:8, 9; Matewu 24:14; 1 Thimothi 2:3, 4) Umsebenti wekushumayela lowentiwa BoFakazi BaJehova lamuhla uniketa bantfu litfuba lekwati Nkulunkulu naJesu kanye nelitfuba lekubona Nkulunkulu acedza timphi.