Kubulima yini kucabanga kutsi labafile batawuvuka? Umphostoli Pawula abengacabangi kanjalo. Nkulunkulu wamphefumulela kutsi abhale atsi: “Nangabe setsembela kuKhristu kulokuphila loku kuphela, sibekudzatjukelwa kwendlula bonkhe bantfu. Kodvwa Khristu uvusiwe kulabafile, wekucala kubo bonkhe labafile.” (1 Khorinte 15:19, 20) Pawula abeciniseka mbamba kutsi labafile batawuvuswa. Ecinisweni, loko kwafakazelwa kuvuswa kwaJesu. a (Imisebenti 17:31) Kungaleso sizatfu Pawula abita Jesu ngekutsi “wekucala,” ngobe nguye lowaba wekucala kuvuswa kute aphile phakadze. Nangabe Jesu aba wekucala, kunengcondvo-ke kwephetsa ngekutsi bekutawuba nalabanye labatawuvuswa.

Nasi lesinye sizatfu lesingakwenta uciniseke ngekuvuswa kwalabafile. Jehova unguNkulunkulu weliciniso. ‘Nkulunkulu ngeke acale emanga.’ (Thithusi 1:2) Jehova akakaze awacale emanga, futsi angeke aze akwente loko. Angetsembisa yini kutsi utawuvusa labafile, aze akhombise nekutsi angakhona, kodvwa bese akasabavusi? Ngeke ayente intfo lenjalo!

Yini leyente Jehova wahlela kuvusa bantfu labafile esikhatsini lesitako? Loko ukwente ngenca yekutsi uyasitsandza. Jobe wabuta watsi: “Nangabe umuntfu afa, uyawuphindze aphile yini?” Wase utsi: “Uyawungibita, mine ngikuphendvule. Uyawufisa kubona leso sidalwa lesentiwa tandla takho.” (Jobe 14:14, 15) Jobe abeciniseka kutsi Babe wakhe wasezulwini uyafisa kumvusa. Nkulunkulu sewushintjile yini? Jehova utsi: “Mine . . . angigucuki.” (Malakhi 3:6) Nkulunkulu usakulangatelela kuvusa bantfu labafile, ababone baphilile futsi bajabulile. Loku kuyafana nendlela umtali lativa ngayo nakafelwa ngumntfwanakhe lamtsandzako. Kodvwa-ke umehluko  kutsi Nkulunkulu unawo emandla ekufeza sifiso sakhe.​—Tihlabelelo 135:6.

Jehova utawunika iNdvodzana yakhe emandla ekuvusa bantfu labafile, lokutawuletsa injabulo kubantfu labake bafelwa. Jesu utiva njani ngekuvuswa kwebantfu labafile? Nakasengakamvusi Lazaro, Jesu walubona lusizi lwabodzadzewabo Lazaro kanye nelwebangani bakhe, waze naye “wakhala tinyembeti.” (Johane 11:35) Ngalelinye lilanga, Jesu wahlangana nemfelokati waseNayini lobekafelwe yindvodzana yakhe lekukuphela kwayo. INkhosi Jesu “yamhawukela, yatsi kuye: ‘Ungakhali.’” Ngekushesha wayivusa lendvodzana yalomfelokati. (Lukha 7:13) Ngako-ke, kufa nekulila kumvisa buhlungu kakhulu Jesu. Kutamjabulisa kakhulu kushintja lusizi lwebantfu lube yinjabulo lengapheli emhlabeni wonkhe!

Uke wabuva yini buhlungu bekufelwa? Kungenteka uva shengatsi kufa kute sisombululo. Sisombululo luvuko Nkulunkulu lataluletsa ngeNdvodzana yakhe. Khumbula kutsi Nkulunkulu ufuna nawe usibone lesetsembiso nasigcwaliseka. Ufuna ube khona futsi wemukele tihlobo takho lotitsandzako. Cabanga nje senihlela tintfo lenitawutenta naseniphila phakadze, ningeke nisaphindze nehlukaniswe kufa!

Lionel, lokuke kwakhulunywa ngaye, utsi: “Ngekuhamba kwesikhatsi, ngabese ngifundza ngeluvuko. Ekucaleni, bekumatima kukukholwa loko, futsi angizange ngimetsembe lomuntfu lobekangicocela ngako. Kepha ngase ngihlola liBhayibheli, ngakhandza kutsi vele kuliciniso! Ngilangatelela kuphindze ngimbone mkhulu wami.”

Ungatsandza yini kwati lokunyenti? BoFakazi BaJehova bangakujabulela kukukhombisa eBhayibhelini lakho kutsi kungani baciniseka ngeluvuko lwesikhatsi lesitako. b