Jairo watalwa aneluhlobo lwe-cerebral palsy lokutsiwa spastic quadriplegia. a Ngaleso sizatfu akakhoni kulawula titfo letinyenti emtimbeni wakhe. Ingcondvo yakhe iyehluleka kutfumela imilayeto lecacile emisipheni, ngako kuvele kutentakalele nje kutsi imikhono nemilente yakhe inyakate nobe igobeke. Ngalesinye sikhatsi loku kubangela kutsi atilimate. Bantfu labaseceleni kwakhe nabo bangalimala nangabe bangakanaki. Ngako-ke, imikhono nemilente yakhe kufanele kuhlale kuboshelwe encoleni yakhe yekuhamba kuze kuvikelwe loku.

Kukhula kwaJairo kube buhlungu kakhulu. Ngesikhatsi anetinyanga letintsatfu budzala wacala kunklinklita, lobekumenta agcine anganyakati futsi angaphefumuli. Esikhatsini lesinyenti make abemtsatsa amsondzete esifubeni futsi amphutfumise esibhedlela, asatitjela kutsi ufile.

Ngekuhamba kwesikhatsi, lokunklinklita kwenta kutsi ematsambo aJairo akhubateke. Ngesikhatsi aneminyaka lengu-16, wakhumuka inyonga futsi kuze ilungiswe kwadzingeka kutsi ahlindvwe etsangeni, nasengculwini. Ngisamkhumbula ngesikhatsi aselulama, akhala onkhe emalanga ebusuku aphetfwe tinhlungu.

Lokukhubateka kumenta angakhoni sanhlobo kutentela tintfo, ngako kudzingeka asitwe kuze adle, agcoke futsi agibele embhedzeni. Esikhatsini lesinyenti bomake nababe ngibo labamsitako. Nanobe Jairo adzinga kusitwa ngaso sonkhe sikhatsi, babe namake bahlale bamkhumbuta kutsi angetsembeli kubantfu kuphela kuze aphile kodvwa etsembele nakuNkulunkulu.

Batali betfu baBoFakazi BaJehova, futsi kusukela ngesikhatsi Jairo asesemncane, bebasolo bamfundzela tindzaba letiseBhayibhelini. Bebasolo bati kutsi kuphila kuba nenjongo kakhulu nangabe umuntfu anebuhlobo naNkulunkulu. Nanobe umtimba waJairo ubutsakatsaka futsi unyakata ngendlela lengalawuleki, bebaciniseka kutsi angaba nalo litsemba lelicinile ngelikusasa. Kodvwa-ke, esikhatsini lesinyenti bebatibuta kutsi Jairo uyaticondza yini tintfo lafundziswa tona eBhayibhelini.

Ngalelinye lilanga ngesikhatsi Jairo asesemncane, babe watsi: “Jairo ngicela umane ukhulume nami.” Wachubeka watsi: “Nangabe ungitsandza mbamba, ngicela ukhulume.” Ngesikhatsi babe amncenga kutsi amane akhiphe nje lokungenani ligama linye, emehlo aJairo ahlengetela tinyembeti. Nanobe etama kuveta indlela lativa ngayo, wamane nje wakhipha imisindvo lengavakali. Babe weva buhlungu kakhulu ngekutsi umkhalisile. Kodvwa loko Jairo lakwenta kwakhombisa kutsi  abekucondza loko babe lakushoko, inkinga nje bekukutsi akakhoni kukhuluma.

Kungakahambi sikhatsi lesingakanani, bobabe namake banaka kutsi ngaletinye tikhatsi Jairo uhambisa emehlo akhe ngekushesha kuze avete loko lakucabangako kanye nendlela lativa ngayo. Bekumkhatsata kakhulu Jairo kutsi abengakhoni kubenta bakucondze loko labekucabanga ngaso sonkhe sikhatsi. Kodvwa ngesikhatsi batali betfu sebakhona kucondza loko labekusho ngemehlo akhe futsi bakhone nekumentela loko labekudzinga, buso bakhe bebugcwala injabulo futsi amamatseke. Bekuyindlela yakhe yekusho kutsi uyabonga.

Lomunye dokotela losita bantfu labanenkinga yekukhuluma watsi kuze sikwati kukhulumisana kancono naJairo, kufanele siphakamise tandla tetfu totimbili nangabe sifuna aphendvule ngekutsi yebo nobe cha. Sandla sangesekudla sisho kutsi yebo, bese sangesencele sisho kutsi cha. Ngako-ke, abetawukhona kusho loko lakufisako ngekubuka leso sandla lesifanele.

Katsatfu ngemnyaka, BoFakazi BaJehova baba nemihlangano lemincane nalemikhulu lapho kwetfulwa khona tinkhulumo letisekelwe eBhayibhelini kubantfu labanyenti labasuke bakhona. Jairo abejabula kakhulu nakwetfulwa inkhulumo yalabo labatawubhajatiswa. Ngalelinye lilanga nasaneminyaka lengu-16 budzala, babe wambuta watsi: “Jairo, uyafuna yini kubhajatiswa?” Wavele wabuka sandla sababe sangesekudla, kwabonakala kutsi abenaso sifiso sekubhajatiswa. Babe wachubeka watsi: “Uthantazile yini wametsembisa Nkulunkulu kutsi utamkhonta kuze kube phakadze?” Jairo waphindze wasibuka wasitsi njo sandla sababe sangesekudla. Kwacaca kutsi Jairo abesavele akunikele kuphila kwakhe kuJehova.

Ngemuva kwekutsi ahlolwe kusetjentiswa liBhayibheli, kwacaca kutsi Jairo abekucondza kutsi kubaluleke ngani kubhajatiswa. Ngako-ke nga-2004, waphendvula umbuto lobaluleke kunayo yonkhe lake wabutwa yona, lowawutsi: “Sewutinikele yini kuNkulunkulu kute wente intsandvo yakhe?” Jairo waphendvula lombuto ngekuphakamisa emehlo abuke etulu. Lena kwakuyindlela lokwakuhlelwe kutsi utawuphendvula ngayo nakatsi yebo. Ngako-ke, watsi nakanemnyaka lengu-17 budzala, wabhajatiswa waba ngulomunye waBoFakazi BaJehova.

Nga-2011, kwatfolakala indlela lensha Jairo labetawukhuluma ngayo​—ngcondvomshini lolawulwa ngemehlo. Longcondvomshini uyakhona kulandzelela kuhambahamba kwenhlavu yeliso lakhe lokwenta kutsi avule noma yini lafuna kuyisebentisa kuwo. Kucwabita nobe kubuka sitfombe saloko lafuna kukusebentisa kufanana nekuchafata i-mouse yangcondvomshini. Kulongcondvomshini wakhe kwafakwa titfombe letimelela emagama nobe  imisho kuze tisite Jairo akhone kukhuluma. Nakacwabita abuke sinye saletitfombe, longcondvomshini uvele ushintje loko lokubhaliwe kube livi.

Njengobe indlela Jairo lacondza ngayo liBhayibheli itfutfuka, sakhula nesifiso sakhe sekusita labanye ebuhlotjeni babo naNkulunkulu. Nasilungiselela imihlangano njengemndeni maviki onkhe, Jairo uvame kungibuka aphindze abuke nangcondvomshini wakhe. Leyo kusuke kuyindlela yakhe yekungikhumbuta kutsi kufanele ngibhale timphendvulo langatisho etincenyeni temihlangano yetfu yebuKhristu letinemibuto netimphendvulo.

Nasesisemihlanganweni, Jairo ubuka sitfombe lasifunako kulongcondvomshini wakhe kuze sichafateke bese labo labakhona beva livi lelikulongcondvomshini laloko lafuna kukusho. Umoyitela ngenjabulo ngaso sonkhe sikhatsi nakaphendvulile wakhutsata emalunga elibandla. Alex, longulomunye webangani bakhe labasebancane, utsi: “Ngijabula kakhulu nangiva timphendvulo taJairo letimayelana nendzaba letsite leseBhayibhelini.”

Jairo uphindze asebentise emehlo akhe kuze acocele labanye ngetinkholelo takhe. Lenye indlela lakwenta ngayo loko kutsi abuke sitfombe lesiveta ingadze lenhle lenetilwane kanye nebantfu labavela kuto tonkhe tinhlanga labaphila ngekuthula bese leso sitfombe siyachafateka. Nakwenteka loko, livi lelikungcondvomshini wakhe livakala litsi: “Litsemba leliseBhayibhelini likutsi umhlaba utawuba lipharadisi lapho kungeke kusaba khona kugula nekufa, njengobe kusho Sembulo 21:4.” Nangabe loyo lolalele akhombisa inshisekelo, Jairo uphindze achafate lesinye sitfombe, bese lelivi litsi: “Ungatsandza yini kutsi ngikuchubele sifundvo seliBhayibheli?” Samangala ngesikhatsi mkhulu wetfu avuma kufundzelwa nguJairo. Kuyajabulisa kubona Jairo afundzisa mkhulu liBhayibheli kancane kancane, akanye nalomunye umzalwane. Lokunye lokujabulisako kutsi mkhulu ubese uyabhajatiswa emhlanganweni wesifundza lobewuseMadrid nga-August 2014.

Bothishela basesikolweni saJairo bayakubona kutinikela kwakhe kuNkulunkulu. Rosario, longulomunye wabodokotela labasita Jairo kulenkinga yekukhuluma, watsi: “Nakungenteka ngicabange kuba lilunga lenkholo, ngingaba ngulomunye waBoFakazi BaJehova. Ngiyibonile indlela kukholwa kwaJairo lokumnike ngayo injongo ekuphileni, ngisho nobe akulesimo lesimatima kangaka.”

Emehlo aJairo agcwala injabulo ngaso sonkhe sikhatsi nangimfundzela nasi setsembiso seliBhayibheli lesitsi: “Labachutako bayawusuka emagonso njengenyamatane, nelulwimi lwesimungulu luyawumemeta ngenjabulo.” (Isaya 35:6) Nanobe advumateka ngaletinye tikhatsi, kodvwa uhlala ajabulile esikhatsini lesinyenti. Lokumenta ajabule kutsi uhlale amatasatasa ngemsebenti waNkulunkulu futsi sikhatsi lesinyenti usicitsa akanye nebangani bakhe labangemaKhristu. Kuhlala kwakhe ajabulile kanye nekukholwa lokucinile kubufakazi bekutsi kukhonta Jehova kwenta umuntfu achubeke aphila ngisho nobe kuphila kwakhe kumatima.