Fundza EVini LaNkulunkulu

Lesihloko siphakamisa imibuto lokungenteka kutsi uke watibuta yona futsi siveta nekutsi ungatitfolaphi timphendvulo eBhayibheli lakho. BoFakazi BaJehova batawukujabulela kucoca nawe ngaletimphendvulo.

1. Ungubani Jesu Khristu?

Ngalokwehlukile kubantfu, Jesu waphila ezulwini njengesidalwa semoya ngembikwekutsi ete emhlabeni. (Johane 8:23) Abeyindalo yaNkulunkulu yekucala, futsi wafaka sandla ekudalweni kwato tonkhe tintfo. Nguye kuphela lowadalwa nguJehova ngalokucondzile, kungako abitwa ngekutsi yiNdvodzana yaKhe ‘letelwe yodvwa.’ Wasebenta njengeMkhulumeli waNkulunkulu, ngesizatfu saloko, uphindze abitwe ngekutsi ‘nguLivi.’​—Johane 1:1-3, 14; fundza Taga 8:22, 23, 30; Kholose 1:15, 16.

2. Kungani Jesu eta emhlabeni?

Nkulunkulu watfumela iNdvodzana yakhe emhlabeni ngekutsi atsatse kuphila kwayo kwasezulwini akufake esibeletfweni sentfombi lengumJuda, libito layo lokunguMariya. Ngako-ke, Jesu abete babe longumuntfu. (Lukha 1:30-35) Jesu weta emhlabeni kute (1) afundzise liciniso ngaNkulunkulu, (2) abeke sibonelo sekwenta intsandvo yaNkulunkulu, kanye nekutsi (3) anikele ngekuphila kwakhe lokute sono, kute kube ‘sihlengo.’​—Fundza Matewu 20:28, NW; Johane 18:37.

3. Kungani sisidzinga sihlengo?

Sihlengo yintfo lekhokhwako kute kukhululwe umuntfu ekugcilatweni. Kufa kanye nekuguga bekungasiyo injongo yasekucaleni Nkulunkulu labenayo ngebantfu. Sikwati njani loko? Nkulunkulu watjela umuntfu wekucala Adamu, kutsi nakwenteka ona, abetawukufa. Kube Adamu akazange one, abengeke afe. Nanobe Adamu angazange afe kwate kwaba semakhulwini eminyaka lalandzela, wacala kufa kusukela ngelilanga lona ngalo kuNkulunkulu. (Genesisi 2:16, 17; 5:5) Adamu wendlulisela kubo bonkhe bantfwana bakhe sono kanye nesigwebo saso, lesikufa. Ngesizatfu saloko, kufa ‘kwangena’ kubantfu nga-Adamu. Kungako-ke sisidzinga sihlengo.​—Fundza Roma 5:12; 6:23.

  4. Kungani Jesu afa?

Ngubani lobekangakhokha sihlengo kute asikhulule ekufeni? Nasifa, sisuke sibhadala sikweleti setono tetfu kuphela. Kute umuntfu lonesono longakwati kukhokhela tono talabanye bantfu.​—Fundza Tihlabelelo 49:7-9.

Njengobe Jesu angazange azuze sono kubabe longumuntfu, akazange afe ngesizatfu setono takhe, kodvwa wafela tono talabanye. Nkulunkulu watfumela iNdvodzana yakhe kutsi itewusifela kute avete lutsandvo lwaKhe lolukhulu labenalo ngatsi. NaJesu waveta kutsi uyasitsandza ngekutsi alalele Babe wakhe futsi anikele ngekuphila kwakhe ngesizatfu setono tetfu.​—Fundza Johane 3:16; Roma 5:18, 19.

5. Yini Jesu layentako nyalo?

Ngekwelapha labagulako, kuvusa labafile, kanye nangekusindzisa bantfu labebasengotini, Jesu abeveta loko labetawukwentela bantfu labalalelako madvutane. (Lukha 18:35-42; Johane 5:28, 29) Ngemuva kwekutsi Jesu afe, Nkulunkulu wamvusa njengesidalwa semoya. (1 Phetro 3:18) Jesu wabese ulindza ngesekudla saNkulunkulu, kwate kwaba ngulapho Jehova amniketa emandla ekubusa njengeNkhosi emhlabeni wonkhe. (Hebheru 10:12, 13) Jesu sewubusa njengeNkhosi ezulwini, futsi balandzeli bakhe labasemhlabeni bamemetela tindzaba letinhle emhlabeni wonkhe.​—Fundza Danyela 7:13, 14; Matewu 24:14.

Madvutane, Jesu utawusebentisa emandla akhe njengeNkhosi kute acedze konkhe kuhlupheka kanye nalabo labakubangelako. Tigidzi tebantfu letinekukholwa kuJesu futsi letimlalelako, titawujabulela kuphila emhlabeni lolipharadisi.​—Fundza Tihlabelelo 37:9-11.

Kute utfole kwatiswa lokubanti, fundza sehluko 4 salencwadzi Lifundzisani Mbambambamba LiBhayibheli?, leshicilelwa boFakazi BaJehova.

[Sitfombe ekhasini 11]

Tigidzi tebantfu letinekukholwa kuJesu futsi letimlalelako, titawujabulela kuphila emhlabeni lolipharadisi