Fundza EVini LaNkulunkulu

Ungubani Nkulunkulu?

Lesihloko siphakamisa imibuto lokungenteka wake watibuta yona futsi siveta nalapho ungatitfola khona timphendvulo eBhayibhelini lakho. BoFakazi BaJehova batawukujabulela kucoca nawe ngaletimphendvulo.

1. Ungubani Nkulunkulu?

Nkulunkulu weliciniso unguMdali wato tonkhe tintfo. LiBhayibheli limbita ngekutsi ‘yiNkhosi yaphakadze,’ lokusho kutsi ute sicalo futsi angeke abe naso siphetfo. (Sembulo 15:3) Njengobe Nkulunkulu anguMtfombo wekuphila, kufanele sikhonte yena yedvwa.—Fundza Sembulo 4:11.

2. Unjani Nkulunkulu?

Kute umuntfu lowase wabona Nkulunkulu ngobe unguMoya, loku kusho kutsi uneluhlobo lwekuphila loluphakeme kunalolo lwetidalwa letinemtimba wenyama letiphila emhlabeni. (Johane 1:18; 4:24) Buntfu baNkulunkulu sibubona etintfweni latidalile. Nasi sibonelo: Nasicabanga ngekwakheka kanye nekwehlukahluka kwetitselo netimbali, sibona lutsandvo lwaNkulunkulu kanye nekuhlakanipha kwakhe. Bukhulu bendzawo yonkhe busitjela ngemandla akhe.—Fundza Roma 1:20.

Singafundza ngisho nalokunyenti eBhayibhelini ngebuntfu baNkulunkulu. Sibonelo saloku kutsi lisitjela ngaloko Nkulunkulu lakutsandzako nangaloko langakutsandzi, indlela labaphatsa ngayo bantfu, kanye nendlela lasabela ngayo etimeni letehlukehlukene.—Fundza Tihlabelelo 103:7-10.

3. Nkulunkulu unalo yini libito?

Jesu watsi: “Babe wetfu losezulwini, alingcweliswe libito lakho.” (Matewu 6:9) Nanobe nje Nkulunkulu aneticu letinyenti, unelibito lelilodvwa kuphela. Lulwimi ngalunye lunendlela yalo leyehlukile yekulibita. NgeSiswati sitsi “Jehova.”—Fundza Tihlabelelo 83:18, catsanisa ne-NW.

EmaBhayibhelini lamanyenti, libito laNkulunkulu likhishiwe kwase kufakwa ticu letitsi Nkhosi nobe Nkulunkulu. Ngesikhatsi liBhayibheli libhalwa, libito laNkulunkulu belivela tikhatsi letingaba ngu-7 000. Jesu walenta latiwa lelibito ngekutsi alisebentise nakachaza liVi laNkulunkulu kubantfu. Wasita bantfu kutsi bamati Nkulunkulu.—Fundza Johane 17:26.

  4. Uyasikhatsalela yini Jehova?

Jehova uveta kusikhatsalela kwakhe ngekutsi yena matfupha alalele imithandazo yetfu. (Tihlabelelo 65:2) Kwandza kwekuhlupheka kusho kutsi Nkulunkulu akanendzaba yini natsi? Labanye bantfu batsi Nkulunkulu usibangela kutsi sihlupheke kute asivivinye, kodvwa loko akusilo liciniso. LiBhayibheli litsi: “Akube khashane naNkulunkulu kuba ngumenti walokubi.”—Jobe 34:10; fundza Jakobe 1:13.

Nkulunkulu unike bantfu lilungelo lekutikhetsela. Asibongi yini ngenkhululeko lesinayo yekutikhetsela kukhonta Nkulunkulu? (Joshuwa 24:15) Kuhlupheka kuyandza ngobe bantfu labanyenti bakhetsa kwenta tintfo letimbi kulabanye. Kumvisa buhlungu Jehova kubona kungalungi lokunjalo.—Fundza Genesisi 6:5, 6.

Madvutane, Jehova utawusebentisa Jesu kutsi asuse konkhe kuhlupheka kanye nalabo labakubangelako. Kwanyalo, Jehova unesizatfu lesihle sekuvumela lokuhlupheka kwesikhashana. Lesinye sihloko saloluchungechunge sitawuchaza kutsi kungani Nkulunkulu avumela kuhlupheka.—Fundza Isaya 11:4.

5. Yini Nkulunkulu lafuna siyente?

Jehova wasidala saba nelikhono lekufuna kumati kanye nekumtsandza. Ufuna kutsi sifundze liciniso ngaye. (1 Thimothi 2:4) Nangabe sitadisha liBhayibheli, Nkulunkulu sitawumati njengeMngani.—Fundza Taga 2:4, 5.

Njengobe Jehova asinikete kuphila, kufanele simtsandze kwendlula indlela lesitsandza ngayo nobe ngubani. Singakhombisa Nkulunkulu kutsi siyamtsandza ngekutsi sikhulume naye ngemthandazo futsi sente loko lafuna sikwente. (Taga 15:8) Jehova ufuna kutsi siphatse labanye bantfu ngelutsandvo.—Fundza Makho 12:29, 30; 1 Johane 5:3.

[Emavi lahambisana nesitfombe ekhasini 23]

Kute utfole lwati lolwengetiwe, fundza sehluko 1 salencwadzi Lifundzisani Mbambambamba LiBhayibheli?, leshicilelwa boFakazi BaJehova.

[Sitfombe ekhasini 23]

Sikhona yini sizatfu sekuvumela kuhlupheka kwesikhashana?