ASEWUTICABANGE usensimini lenhle. Kute tintfo letikuphatamisako kanye nemsindvo lomkhulu lovela edolobheni. Lensimi yinkhulu, futsi kute lokuphatamisa kuthula kwayo. Lokujabulisako kutsi kute lokukukhatsatako, umtimba wakho awuhlushwa ngunobe ngabe ngukuphi kugula kanye nebuhlungu. Utiva ukhululekile kuba kuleyo ndzawo.

Ujabulela kubona timbali letinemibalabala leyehlukehlukene tichakata, kugeleta kwemanti emifudlaneni, emacembe laluhlata netjani lobuselangeni kanye nasemtfuntini. Ushaywa ngumoya lopholile futsi uva liphunga lawo lelimnandzi. Uva kukhwashata kwemacembe, kugeleta kwemanti lehla emadvwaleni, kunswininita nekuhlabela kwetinyoni, kanye nemsindvo wetilwanyana letenta umsebenti wato. Njengobe ucabanga ngaloko, awutiva yini ufisa kuphila endzaweni lenjena?

Bantfu emhlabeni wonkhe bakholelwa kutsi ekucaleni bantfu bebahlala endzaweni lefanana nalena. Sekungemakhulu eminyaka emalunga enkholo yebuJuda, eTinkholo Letitsi TebuKhristu, kanye newemaMoslem afundziswa ngensimi yase-Edeni, lapho Nkulunkulu abeka khona Adamu na-Eva kutsi bahlale kuyo. LiBhayibheli litsi bebaphila ngekuthula nangekujabula. Bebanekuthula bobabili, netilwane, kanye naNkulunkulu lobekabanike ngemusa litsemba lekuphila phakadze kuleyondzawo lenhle.​—Genesisi 2:15-24.

EmaHindu nawo anenchazelo yawo leyehlukile ngelipharadisi lasendvulo. Ema-Buddha akholelwa kutsi baholi bawo labakhulu labamimoya nobe bo-Buddha, bavela ngesikhatsi umhlaba usenjengelipharadisi. Tinkholo letinyenti tase-Afrika tifundzisa ngetindzaba leticishe tifanane neya-Adamu na-Eva.

Ecinisweni, umbono welipharadisi lasekucaleni ufundziswa tinkholo letinyenti kanye nemasiko. Lomunye umbhali watsi: “Tive letinyenti tikholelwa kutsi lipharadisi lasendvulo belatiwa ngekungabi nesono, linenkhululeko, kuthula, injabulo, inala, lite kucindzeteleka, kukhatsateka, kanye nekucabana. . . . Lenkholelo yente bantfu labanyenti bafuna lipharadisi lelalahleka futsi bafuna nendlela yekulenta liphindze libe khona.”

 Tinemsuka lowodvwa yini letindzaba kanye nalamasiko? Kungenteka yini kutsi “bantfu labanyenti” bahungwe yintfo leyake yaba khona mbamba? Yake yaba khona yini insimi yase-Edeni esikhatsini lesidze lesengcile, futsi bake baba khona mbamba yini bo-Adamu na-Eva?

Bantfu labaphikisako bayakungabata loku. Kulesikhatsi sentfutfuko ngekwesayensi, bantfu labanyenti bacabanga kutsi kulandzisa lokunjalo kumane nje kuyinganekwane. Lokumangalisako kutsi kulabantfu labaphikisako labanye babo bangemakholwa. Baholi labanyenti benkholo benta bantfu bangakholelwa ensimini yase-Edeni. Batsi akukaze kube nendzawo lenjalo. Batsi lokulandzisa kumane kuyinganekwane nje nobe umfanekiso.

Kuliciniso kutsi liBhayibheli linayo imifanekiso. NaJesu washo imifanekiso ledvume kuyendlula yonkhe leke yaba khona. Nanobe kunjalo, liBhayibheli lilandzisa ngendzaba lemayelana ne-Edeni, hhayi njengemfanekiso, kodvwa njengemlandvo loliciniso. Nangabe letentakalo lokukhulunywa ngato kulokulandzisa tingakake tenteka, singalitsemba njani-ke lonkhe liBhayibheli? Asesihlole kutsi kungani labanye bakungabata kutsi yake yaba khona insimi yase-Edeni, bese siyabona kutsi tizatfu tabo tiyaphatseka yini. Ngemuva kwaloko, sitawucoca ngekutsi kungani lokulandzisa kusitsintsa sonkhe.