Imibuto Lemine Lemayelana Nekuphela, Iyaphendvulwa

JESU KHRISTU wakhuluma ngesikhatsi ‘kuphela lobekutawufika ngaso.’ Nakachaza leso sikhatsi watsi: “Ngobe lapho kuyawuba khona kuhlupheka lokukhulu lokungazange sekube khona kusukela seloku kwasekelwa umhlaba, kuze kube ngulamuhla, futsi akuseyiwuba khona.”—Matewu 24:14, 21.

Inkhulumo yaJesu lemayelana nekuphela, kanye nemavesi eliBhayibheli lakhuluma ngako, kokubili kuphakamisa imibuto leminyenti lebalulekile. Kungani ungavuli liBhayibheli lakho kute utfole timphendvulo talemibuto?

1 Yini Letawuphela?

LiBhayibheli alifundzisi kutsi lomhlaba lesihlala kuwo utawubhujiswa. Umhlabeli wabhala: “[Nkulunkulu] wasimisa umhlaba etikwetisekelo tawo, kuze ungatanyatanyiswa, phakadze naphakadze.” (Tihlabelelo 104:5) LiBhayibheli alifundzisi kutsi konkhe lokuphilako lokusemhlabeni kutawushiswa ngemlilo. (Isaya 45:18) Jesu watsi bakhona bantfu labatawusindza nakufika kuphela. (Matewu 24:21, 22) Kodvwa liBhayibheli litsi yini letawuphela?

Kubusa kwabohulumende bebantfu lokwehlulekile kutawuphela. Nkulunkulu waphefumulela umphrofethi Danyela kutsi abhale: “Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze, kodvwa wona uyawukuma kuze kube phakadze.”—Danyela 2:44.

Imphi kanye nekungcoliswa kwemhlaba, kutawuphela. Natichaza loko Nkulunkulu latawukwenta, Tihlabelelo 46:9 titsi: “Uvimba acedze timphi kutsi tichubeke emhlabeni wonkhe jikelele. Ufohlota butjoki, ephule sikhali, tincola atishise ngemlilo.” LiBhayibheli liphindze lifundzise kutsi Nkulunkulu ‘utawubhubhisa babhubhisi bemhlaba.’—Sembulo 11:18.

Bugebengu nekungalungi kutawuphela. LiVi laNkulunkulu liyetsembisa: “Bantfu labacotfo labatawukwakha kulelive; ngulabetsembekile bodvwa labayawuhlala kulo. Kodvwa  lababi bayawususwa eveni, nalabanemacebo bayawusishulwa kulo.”—Taga 2:21, 22.

2 Kutawufika Nini Kuphela?

Nkulunkulu Jehova ubeke “leso sikhatsi” lahlose ngaso kucedza bonkhe bubi, aphindze aletse uMbuso wakhe. (Makho 13:33) LiBhayibheli likubeka ebaleni kutsi angeke sikhone kusati ngco sikhatsi sekufika kwekuphela. Naku lokwashiwo nguJesu ngalendzaba: “Noko kute lowatiko kutsi lelo langa nemzuzu kuyawafika nina, ngisho netingilosi ezulwini neNdvodzana ayati, lowatiko nguBabe kuphela.” (Matewu 24:36) Jesu kanye nebafundzi bakhe bahluba indlubu ekhasini mayelana nesimo umhlaba loyakuba ngiso ngembikwekutsi Nkulunkulu afikise kuphela. Kuphela kutawube kusemnyango nangabe tonkhe letintfo lokwatsiwa titawenteka setenteka tonkhe ngesikhatsi lesifanako emhlabeni wonkhe jikelele.

Tingucuko tepolitiki temvelo netenhlalakahle letiyingoti, tenteka ngelizinga lelisetulu futsi ticopha umlandvo. Aphendvula imibuto yebafundzi bakhe lemayelana nekuphela, Jesu watsi: “Sive siyawuvukela lesinye sive, umbuso uvukele lomunye umbuso, kuyawuba nekutamatama kwemhlaba tindzawo ngetindzawo, kuyawuba netindlala. Loko kuyawube kukucala kwetinsizi, kube njengemhelo walomsikati nasatawuteta.” (Makho 13:8) Umphostoli Pawula wabhala watsi: “Emalangeni ekugcina kuyawufika tikhatsi letimatima. Bantfu bayawutitsandza, batsandze imali, batigcabhe, batigabatise, balulate Nkulunkulu ngenhlamba. Bayawuba ngulabangalaleli batali babo, bangabongi, babete bungcwele, babete lutsandvo, bangatsetselelani. Bayawuba tinyoka, bangatitsibi, babe nebulwane, batondze lokuhle, batsengise ngalabanye bantfu, babe nemawala, bakhukhumukiswe kutatisa, batsandze kutijabulisa kunekutsi babe ngulabatsandza Nkulunkulu.”—2 Thimothi 3:1-5.

Umsebenti wekushumayela lowentiwa ngetilwimi letinyenti, sewusukunyisiwe. Jesu washo nankha emavi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.”—Matewu 24:14.

3 Yini Letawulandzela Ngemuva Kwekufika Kwekuphela?

LiBhayibheli alifundzisi kutsi bonkhe bantfu labakholwako labasemhlabeni batawuphelela ezulwini, bahlale lapho unomphela. Ngalokuphambene naloyo mbono, Jesu wafundzisa kutsi inhloso yaNkulunkulu itawuphumelela. Naku lakusho: “Babusisiwe labamnene, ngobe bayawudla lifa lemhlaba.” (Matewu 5:5; 6:9, 10) LiBhayibheli letsembisa kutsi batawuvuswa bantfu lokutawufika kuphela basasemathuneni. (Jobe 14:14, 15; Johane 5:28, 29) Yini letawulandzela ngemuva kwekufika kwekuphela?

Jesu utawubusa njengeNkhosi yeMbuso waNkulunkulu asezulwini. Abhala ngalendzaba, umphrofethi Danyela watsi: “Embonweni wami wasebusuku, ngabona embikwami kwakume umuntfu labenjengendvodzana yemuntfu [Jesu lovusiwe], abehla ngemafu asezulwini. Wasondzela kuloLophila Phakadze Naphakadze [Nkulunkulu Jehova], waholela ebukhoneni bakhe. Wanikwa emandla ekubusa [Jesu], nenkhatimulo, nebukhosi. Bonkhe bantfu, netive nebantfu bato tonkhe tilwimi bakhotsama kuye bamkhonta. Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.”—Danyela 7:13, 14; Lukha 1:31, 32; Johane 3:13-16.

Takhamuti teMbuso waNkulunkulu titawuphila saka, tibe nenhlalakahle lengapheli kanye nekuphila lokuphakadze. Naku lokwabhalwa ngumphrofethi Isaya ngalendzaba: “Bantfu bayakwakha tindlu, bahlale kuto, bayawuhlanyela tivini, badle titselo tato. Bangeke baphindze bakhe tindlu, bese kuhlala labanye bantfu kuto, nobe bahlanyele, bese kudla labanye.” (Isaya 65:21-23) Umphostoli Johane wabhala: “Nalo likhaya laNkulunkulu likubantfu.  Nkulunkulu utawuhlala emkhatsini wabo, bona babe bantfu bakhe. Nkulunkulu cobo lwakhe uyawuhlala nabo, abe nguNkulunkulu wabo. Uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.”—Sembulo 21:3, 4.

4 Yini Lokufanele Uyente Kute Usindze Nakufika Kuphela?

Umphostoli Phetro wavuma kutsi bantfu labanyenti labaphila emalangeni ekugcina batakuhleka bulima kutsi Nkulunkulu utawungenela etinkingeni bantfu lababhekene nato kulomhlaba. (2 Phetro 3:3, 4) Nobe kunjalo, Phetro uncenga bantfu labaphila esikhatsini salamuhla kutsi batsatse letinyatselo letilandzelako.

Fundza kuloko lokwenteka esikhatsini lesendlulile. Phetro wabhala kutsi Nkulunkulu “akazange awuyekele umhlaba wakadzeni, kodvwa wamlondvolota Nowa, umshumayeli wekulunga, kanye nalabanye lababesikhombisa, ngesikhatsi aletsa zamcolo emhlabeni walababengamesabi Nkulunkulu.” (2 Phetro 2:5) Ngalokumayelana nalabo labahleka bulima, Phetro watsi: “Ngobe batsandza kukhohlwa kutsi emazulu abevele asakhona kadzenidzeni, nekutsi Nkulunkulu wakhuluma ngelivi lakhe, kwavela umhlaba emantini, wabasemkhatsini wemanti. Kwabuye kwaba ngiwo lawo manti, umhlaba lowabuye wabhujiswa ngawo. Kepha  ngalo lelivi emazulu nemhlaba a lokukhona nyalo kugcinelwe umlilo ngelilanga lekwehlulelwa, lapho kuyawubhujiswa khona labangamesabi Nkulunkulu.”—2 Phetro 3:5-7.

Tiphatse ngendlela levumelana netimiso taNkulunkulu. Labo labafisa kusindza ekupheleni ‘kufanele batinikele ngalokuphelele kuNkulunkulu, baphile ngekumesaba yena,’ kubhala Phetro. (2 Phetro 3:11) Naka kutsi Phetro ugcizelela ‘kutinikela ngalokuphelele’ kanye ‘nekuphila ngekumesaba yena.’ Kunyenti lokudzingeka kutsi ukwente, kunekumane ugomele ngekutsi unekukholwa nobe wakhe buhlobo naNkulunkulu ngesizatfu sekutsi ubalekela imbhubhiso.

Ngutiphi tintfo Nkulunkulu latemukelako? Sicela ucabange ngaloko losewuvele ukwati bese ufundza loko lokufundziswa liBhayibheli ngalendzaba. BoFakazi BaJehova bavule tandla kute bakusite. Bacele kutsi bakukhombise eBhayibhelini lakho kutsi batitsatsa kuphi letimphendvulo. Kwenta njalo kungakusita ukwati kubhekana nelikusasa ngesibindzi nangekutetsemba, nanobe kunekwesaba lokunyenti kulomhlaba lesiphila kuwo.

[Umbhalo longentansi]

[Emavi lacashuniwe lasekhasini 7]

Umhlaba wona phaca angeke ubhujiswe, kodvwa bantfu labawonako labatawubhujiswa