Kubhajatiswa Egameni Labani Nelani?

‘Ngako-ke hambani, nente tive tonkhe tibe bafundzi . . . , nibabhabhatise egameni leYise, neleNdvodzana, nelemoya longcwele.’—MAT. 28:19.

1, 2. (a) Yini leyenteka eJerusalema ngeliPhentekhoste ngemnyaka wanga-33 C.E.? (b) Yini leyabangela labanyenti kulesicumbi kutsi bafune kubhajatiswa?

 EJERUSALEMA kwakugcwele ticumbi tebantfu labebachamuka etindzaweni letinyenti. NgeliPhentekhoste ngemnyaka wanga-33 C.E., sibhimbi lesibalulekile sasichubeka eJerusalema futsi tivakashi letinyenti tatihlanganyele kuso. Kodvwa kunentfo letsite lengakavami leyenteka ngemuva nje kwekutsi umphostoli Phetro etfule inkhulumo leyashiya tilaleli tibambe longentasi. EmaJuda langu-3 000 kanye nalabanye lababephendvukele enkholweni yemaJuda, baphendvuka futsi babhajatiswa emantini. Ngaleyo ndlela bangena ebandleni lebuKhristu lelalisandza kusungulwa. (Imis. 2:41) Kubhajatiswa kwebantfu labanyenti kangaka emachibini nasemadanyini aseJerusalema, kufanele kutsi kwaba yindzaba lesematseni.

² Yini leyabangela kutsi bantfu labanyenti kangaka babhajatiswe? Ekuseni ngalelolanga, ‘kwachamuka umsindvo lomkhulu esibhakabhakeni lowevakala shengatsi kuhhusha kwemoya lomkhulu.’ Bafundzi baJesu labangu-120, bagcwaliswa ngemoya longcwele kulelikamelo lelisetulu lebebahleli kulo. Ngemuva kwaloko, emadvodza nebafati babutsana ndzawonye futsi banesifiso sekulalela bafundzi “bakhuluma ngaletinye tilimi.” Labanyenti “bahlabeka etinhlitiyweni” nabeva loko lokwakushiwo nguPhetro, lokufaka ekhatsi ngisho naloko lakusho mayelana nekufa kwaJesu. Yini lokwakufanele bayente? Phetro waphendvula: “Phendvukani nibhajatiswe nonkhe ngamunye ngamunye egameni laJesu Khristu . . . , nemukeliswe nesipho lesingumoya longcwele.”—Imis. 2:1-4, 36-38.

3. Ngelilanga lePhentekhoste, emaJuda laphendvukile etonweni kanye nalabo lababephendvukele enkholweni yemaJuda, yini lokwakumelwe bayente?

³ Ase ucabange ngesimo senkholo salamaJuda  kanye nalabo lababephendvukele enkholweni yemaJuda labeva inkhulumo yaPhetro. Besevele amati Jehova njengaNkulunkulu wawo. Ngesizatfu sekutsi besebafundzile emiBhalweni yesiHebheru, bebawati umoya longcwele kutsi ungemandla aNkulunkulu lasebentako, lawasebentisa endalweni nangemuva kwaloko. (Gen. 1:2; Khu. 14:5, 6; 1 Sam. 10:6; Hla. 33:6) Kodvwa abedzinga lokungetulu kwaloko. Kwakubalulekile ngawo kutsi acondze futsi emukele indlela yaNkulunkulu yekusindzisa ngaMesiya longuJesu. Kungako-ke Phetro asiveta ebaleni sidzingo sekutsi ‘abhajatiswe onkhe egameni laJesu Khristu.’ Emalangeni lambalwa ngembi kwaloko, Jesu lovusiwe wayala Phetro kanye nalabanye bafundzi kutsi babhabhatise bantfu ‘egameni leYise, neleNdvodzana, nelemoya longcwele.’ (Mat. 28:19, 20) Loku kwakusho lokutsite lokubalulekile ekhulwini lekucala leminyaka, ngisho nalamuhla solo kunjalo. Kuyini loku?

Egameni LeYise

4. Nguluphi lushintjo lolwaselwentekile mayelana nebantfu labebanebuhlobo naJehova?

⁴ Njengobe kuvetiwe ekucaleni, labo labalalela loko lokwakushiwo yinkhulumo yaPhetro bebavele bamkhonta Jehova futsi bebake baba nebudlelwane naye. Bebenta imetamo yekulandzela iMitsetfo yakhe, nguleso kanye sizatfu lesenta labanye besuka kuletinye tindzawo baya eJerusalema. (Imis. 2:5-11) Nobe kunjalo, Nkulunkulu abente lushintjo lolutsite lolubalulekile endleleni labesebentelana ngayo nebantfu. Wasilahla sive semaJuda njengesive sakhe labesikhetsile; kugcina kwaso uMtsetfo, kwase kungasho lutfo kuye. (Mat. 21:43; Khol. 2:14) Kunentfo letsite labo labebalalele inkhulumo yaPhetro lokwadzingeka kutsi bayente kute babe nebuhlobo lobuchubekako naJehova.

5, 6. EmaJuda kanye nalabo lababephendvukele enkholweni yemaJuda ngelikhulu lekucala leminyaka, kwadzingeka kutsi benteni kute babe nebudlelwane naNkulunkulu?

⁵ Ecinisweni kwakungakafaneli kutsi bamshiye Jehova, uMniki Kuphila wabo. (Imis. 4:24) Labo labalalela loko lokwashiwo nguPhetro babona ngalokusebaleni kutsi Jehova nguBabe lonemusa. Watfumela Mesiya kutsi atewubakhulula futsi abetimisele kutsetselela labo Phetro latsi kubo: “Bonkhe bantfu baka-Israyeli, kufanele bati kahle kutsi nguye yena loJesu, lenambetsela [elugodvweni], Nkulunkulu lasamente iNkhosi naKhristu!” Ecinisweni, labo labasebentisa emavi aPhetro bebangaba netizatfu letivakalako tekubonga Nkulunkulu ngaloko lakwentele bonkhe labafuna kuba nebuhlobo naye.—Fundza Imisebenti 2:30-36.

⁶ Kuliciniso kutsi lamaJuda nalabo lababephendvukele enkholweni yemaJuda, bebangabona kutsi buhlobo naJehova bufaka ekhatsi kumcaphela njengaloyo lowabalungisela sihlengo ngaJesu. Nanyalo ungacondza kutsi kungani baphendvuka etonweni tabo letatifaka ekhatsi kubulala Jesu. Kuvakala kahle nekutsi ngelilanga lelilandzelako “bacinisela njalo bahlanganyela etimfundzisweni tebaphostoli.” (Imis. 2:42) Kungenteka kutsi bebafuna ‘kusondzela ngesibindzi esihlalweni semusa.’—Heb. 4:16.

7. Labanyenti lamuhla bawushintje njani umbono wabo ngaNkulunkulu futsi babhajatiswa egameni leYise?

⁷ Lamuhla, tigidzi tebantfu labachamuka etindzaweni letehlukahlukene tilifundzile eBhayibhelini liciniso mayelana naJehova. (Isa. 2:2, 3) Labanye bebangakholelwa kutsi Nkulunkulu ukhona, a kodvwa batfole lusito futsi bati kutsi uMdali labangakha budlelwane lobuhle naye ukhona. Labanye bebakholwa kutsi Nkulunkulu mtsatfu amunye, bakhonta ngisho netithico letehlukahlukene. Bafundzile kutsi Jehova nguye kuphela Nkulunkulu somandla, futsi bambita ngelibito lakhe. Loku kuhambelana kahle naloko Jesu lakusho kubafundzi bakhe kutsi kufanele babhajatiswe egameni leYise.

8. Yini labo labebangati ngesono sa-Adamu lokudzingeke kutsi bayicondze ngeYise?

⁸ Lokunye labakufundzile kutsi batfole sono ku-Adamu. (Rom. 5:12) Loko kube kusha kubo futsi kudzingeke bakwemukele njengaloko lokuliciniso. Bantfu labanjalo singabafanisa  nendvodza legulako kodvwa lengati kutsi iyagula. Kusenekwenteka ike yativa timphawu talokugula, njengebuhlungu lehle ibuva emtimbeni. Kodvwa njengobe singatfolakali ngco sifo lesiyiphetse, ingahle icabange kutsi iphile saka. Nobe kunjalo, emaciniso angaveta lokutsite lokwehlukile. (Catsanisa 1 Khorinte 4:4) Kutsiwani-ke nasingatfolwa lesifo lesiphetse lendvodza, angeke yini kube kuhlakanipha ngayo kutsi ifune indlela lekahle yekuselapha? Ngendlela lefananako, ngalesikhatsi sebafundze liciniso ngesono lesasizuza, labanyenti bemukele “kwelashwa” lokuvela eBhayibhelini futsi bacondza kutsi “lokwelashwa” kuvela kuNkulunkulu. Bonkhe labo labatehlukanisa neYise badzinga kubuyela kuloyo longakhona “kubelapha.”—Ef. 4:17-19.

9. Yini Jehova layenta kute kube melula ngatsi kwakha buhlobo naye?

⁹ Nangabe sewunikele imphilo yakho kuNkulunkulu Jehova futsi sewungumKhritsu lobhajatisiwe, uyati kutsi kuyintfo lejabulisa kangakanani kuba nebuhlobo lobuhle naye. Nyalo ungajabulela lutsandvo Babe wakho Jehova lanalo. (Fundza Roma 5:8.) Nobe nje bo-Adamu na-Eva bona, Nkulunkulu wenta konkhe lokusemandleni akhe kute intalelwane yabo—lefaka ekhatsi natsi—ikhone kuba nebuhlobo lobuhle naye. Ngekwenta njalo, Nkulunkulu kwadzingeka kutsi abeketelele buhlungu lobukhulu bekubona iNdvodzana yakhe ihlupheka kabuhlungu futsi ekugcineni ifa. Kwati loko akusisiti yini kutsi semukele ligunya laNkulunkulu futsi silalele nemitsetfo yakhe yelutsandvo? Nangabe usengakakwenti loko, unetizatfu letivakalako tekutinikela kuNkulunkulu futsi ubhajatiswe.

Egameni LeNdvodzana

10, 11. (a) Ubonisa njani kutsi uyambonga Jesu? (b) Utiva njani ngekufa kwaJesu abe sihlengo setfu?

¹⁰ Ase uphindze ucabange ngaloko Phetro lakusho kulesicumbi. Wagcizelela kwemukela Jesu, ngobe kwenta njalo kuhlobene nekubhajatiswa ‘egameni . . . leNdvodzana.’ Kungani kwakubalulekile kwenta njalo ngaleso sikhatsi, futsi kungani kubalulekile nalamuhla? Ecinisweni, kwemukela Jesu kanye nekubhajatiswa egameni lakhe kusho kutsi siyasicaphela sikhundla sakhe ebuhlotjeni betfu neMdali. Jesu kwadzingeka kutsi alengiswe esigodvweni sekuhlushwa kute asuse sicalekiso seMtsetfo kumaJuda; nobe kunjalo, kufa kwakhe kwaba lusito lolukhulu. (Gal. 3:13) Wavuma kwentiwa umhlatjelo wesihlengo lowawudzingwa bantfu bonkhe. (Ef. 2:15, 16; Khol. 1:20; 1 Joh. 2:1, 2) Kute akwati kwenta loku, Jesu wabeketelela tintfo letingakalungi, kutondvwa, kuhlushwa ekugcineni wabeketelela nekufa. Ungabonisa njani kutsi uyabonga ngalomhlatjelo wakhe? Ase uticabange ungumfana loneminyaka lengu-12 budzala uhabamba nge-Titanic, umkhumbi lowashayisa lichwa ekhatsi elwandle nga-1912 wase uyacwila. Wetama kugibela sikebhe lesisindzisa kuphila, kodvwa sigcwele. Kusenjalo indvodza letsite lekulesikebhe lesisindzisa kuphila, icabuze umfati wayo yehle kulesikebhe ngemuva kwaloko igibelise wena. Bewungativa njani? Nakanjani bewungayibonga ungacedzi lendvodza! Sewuyacondza kutsi umfana lowabhekana nesimo lesinjalo wativa njani. b Nobe kunjalo, Jesu wakwentela lokungetulu kwaloko. Wafa kute wena utfole kuphila lokungapheli.

¹¹ Wativa njani ngalesikhatsi sewufundze ngaloko iNdvodzana yaNkulunkulu lekwentele kona? (Fundza 2 Khorinte 5:14, 15.) Nakanjani wativa ugcwele kubonga lokukhulu. Ngako-ke, loko kukwente wanikela kuphila kwakho kuNkulunkulu futsi ‘wangasatiphileli wena, kodvwa waphilela loyo lowakufela.’ Kubhajatiswa egameni leNdvodzana kusho kutsi uyabonga ngaloko Jesu lakwentele kona futsi wemukela ligunya lakhe ‘njengeMtfombo Wemphilo.’ (Imis. 3:15; 5:31) Esikhatsini lesendlulile, bewute buhlobo neMdali, futsi bewute ngisho nelitsemba. Kodvwa ngekuba nekukholwa engatini yaJesu Khristu leyacitseka futsi ubhajatiswe, sewunebuhlobo neYise. (Ef. 2:12, 13) Umphostoli Pawula wabhala: “Nani-ke benikadze nikhashane naNkulunkulu nititsa takhe ngemicabango nangemisebenti yenu lemibi. Kodvwa nyalo Nkulunkulu  sewubuyisene nani ngekucitsa ingati yaJesu [elugodvweni], kuze kutsi animise ningcwele, ningenasici, ningenacala embikwakhe.”—Khol. 1:21, 22.

12, 13. (a) Kungani kubhajatiswa egameni leNdvodzana kutsintsa indlela lowenta ngayo nangabe lotsite akucansula? (b) NjengemKhristu lobhajatiswe egameni laJesu, yini lokudzingeka uyente?

¹² Nanobe ubhajatiswe egameni leNdvodzana, uyawucaphela umuva nesifiso sakho sekwenta lokubi. Kucaphela loko kulusito malanga onkhe. Sibonelo saloku kutsi nangabe umuntfu akucansula, uyakhumbula yini kutsi nobabili nitoni? Nobabili nidzinga kutsetselelwa nguNkulunkulu, ngako nani kufanele nitsetselele labanye. (Mak. 11:25) Kute agcizelele lesidzingo, Jesu wenta nangu umfanekiso: Inkhosi yesula sikweledi sesisebenti sayo lesingemarandi (nobe emalangeni) latigidzi letinyenti. Kodvwa ngalelolanga, lesisebenti sala kukhulula sisebenti lesikanye naso lebesisikweleta emarandi (nobe emalangeni) lalishumi. Jesu wase uveta naliliphuzu: Jehova angeke amtsetselele loyo longamtsetseleli umnakabo. (Mat. 18:23-35) Kuliciniso, kubhajatiswa egameni leNdvodzana kusho kutsi siyalicaphela ligunya laJesu futsi silwela kulandzela sibonelo sakhe, timfundziso takhe kanye nekulungela kutsetselela labanye.—1 Phet. 2:21; 1 Joh. 2:6.

¹³ Njengobe wenta emaphutsa, angeke ukwati kulingisa Jesu ngendlela lephelele. Nobe kunjalo, ngesizatfu sekutinikela kwakho kuNkulunkulu ngenhlitiyo yakho yonkhe, ubonisa kutsi ufuna kulingisa Jesu ngawo onkhe emandla akho. Loku kufaka ekhatsi kuchubeka ulahla buntfu lobudzala ngemva kwaloko wembatse lobusha. (Fundza Efesu 4:20-24) Nakutiwa endzabeni yekuhlonipha umngani wakho, uyetama kufundza esibonelweni sakhe kanye nasetimfanelweni takhe letinhle. Nangendlela lefananako, ufuna kufundza kuKhristu uphindze umlingise.

14. Ungakhombisa njani kutsi uyalicaphela ligunya laJesu njengeNkhosi yasezulwini?

¹⁴ Kunalenye indlela longakhombisa ngayo kutsi uyakucondza loko lokudzingekile kute ubhajatiswe egameni leNdvodzana. “Nkulunkulu wabeka konkhe ngaphansi kwemandla akhe [Jesu], wambeka kutsi abe yinhloko etikwako konkhe ebandleni.” (Ef. 1:22) Ngako-ke, kufanele uhloniphe indlela Jesu lacondzisa ngayo bantfu labatinikele kuJehova. Khristu usebentisa bantfu labenta emaphutsa ebandleni, ikakhulukati emadvodza lakhulile ngakamoya, labadzala labamisiwe. Sizatfu lesenta kumiswe lamadvodza lanjena kutsi “labangcwele bahlonyiselwe umsebenti wabo wekukhonta, kuze kwakheke umtimba waKhristu.” (Ef. 4:11, 12) Nanobe umuntfu lonesono enta liphutsa, Jesu njengeNkhosi yeMbuso wasezulwini uyakwati kulungisa inkinga ngesikhatsi sakhe futsi ngendlela yakhe. Uyakwetsemba yini loku?

15. Nangabe usengakabhajatiswa, ngutiphi tibusiso lotawutitfola ngemuva kwekubhajatiswa?

¹⁵ Labanye kusenekwenteka kutsi basengakatinikeli kuJehova futsi babhajatiswa. Nangabe nawe usengakakwenti loko, ubonile yini lapha ngenhla kutsi kucaphela iNdvodzana kubalulekile futsi kuyintfo lenhle lokufanele uyente? Kubhajatiswa egameni leNdvodzana kutakuletsela tibusiso letinyenti.—Fundza Johane 10:9-11.

Egameni Lemoya Longcwele

16, 17. Kusho kutsini kuwe kubhajatiswa egameni lemoya longcwele?

¹⁶ Kusho kutsini kubhajatiswa egameni lemoya longcwele? Njengobe sibonile ekucaleni, labo labebalalele Phetro ngelilanga lePhentekhoste bebati kutsi umoya longcwele ukhona.  Ecinisweni, batibonela ngewabo kutsi Nkulunkulu uchubeka asebentisa umoya longcwele. Phetro abengulomunye walabo ‘labagcwaliswa ngemoya longcwele futsi wacala kukhuluma ngaletinye tilimi.’ (Imis. 2:4, 8) Lenkhulumo letsi “egameni lemoya” ayikacondziswa egameni lemuntfu lotsite. Nalamuhla tintfo letinyenti tentiwa “egameni lahulumende,” longesuye umuntfu. Letintfo tentiwa ngeligunya lahulumende. Nangendlela lefananako, loyo lobhajatiswa egameni lemoya longcwele uyacaphela kutsi umoya longcwele awusuye umuntfu, kodvwa ungemandla aJehova lawasebentisela kwenta intsandvo yakhe. Kubhajatiswa lokunjalo kusho kutsi umuntfu uyavuma kutsi umoya longcwele unendzima lenkhulu enjongweni yaNkulunkulu.

¹⁷ Akungabateki kutsi sewufundzile ngemoya longcwele eBhayibhelini. Sibonelo saloko kutsi sewuyacondza kutsi imiBhalo iphefumulelwe ngemoya longcwele. (2 Thim. 3:16) Njengobe utfutfuka ngakamoya, mhlawumbe sewuyacondza kutsi ‘Babe losezulwini uyawubanika umoya longcwele labo labawucelako’ lokufaka ekhatsi nawe. (Luk. 11:13) Kusenekwenteka kutsi sewuke wabona usebenta ekuphileni kwakho umoya longcwele. Ngakulolunye luhlangotsi, nangabe sewutawubhajatiswa egameni lemoya longcwele, sicinisekiso saJesu sekutsi Babe unika umoya longcwele, sisho kutsi utawutfola tibusiso lokungito sibili ngalesikhatsi utfola umoya longcwele.

18. Ngutiphi tibusiso letitfolwa ngulabo lababhajatiswa egameni lemoya longcwele?

¹⁸ Nalamuhla, kunebufakazi bekutsi Jehova ucondzisa aphindze ahole libandla lebuKhristu ngemoya wakhe. Lomoya ungasisita nasemisebentini yetfu yamalanga onkhe. Kubhajatiswa kwetfu egameni lemoya longcwele kufaka ekhatsi kucondza indzima yawo ekuphileni kwetfu kanye nekusebentelana nawo kahle. Labanye bangatibuta kutsi singaphila njani ngekuvumelana nekutinikela kwetfu kuJehova nendlela umoya longcwele lohlobene ngayo naloko. Sitawufundza ngaloko esihlokweni lesilandzelako.

[Imibhalo lengentasi]

Usakhumbula?

• Yini lefaka ekhatsi kubhajatiswa egameni leYise?

• Kusho kutsini kubhajatiswa egameni leNdvodzana?

• Ukhombisa njani kutsi uyakujabulela loko lokushiwo kubhajatiswa egameni leYise neleNdvodzana?

• Kusho kutsini kubhajatiswa egameni lemoya longcwele?

[Imibuto Yesihloko Lesifundvwako]

[Titfombe ekhasini 12]

Ngemuva kweliPhentekhoste langemnyaka wanga 33 C.E., bafundzi labasha baba nabuphi buhlobo naBabe?

[Emavi laveta Umtfombo walentfo]

By permission of the Israel Museum, Jerusalem