Hamba Ngemoya Futsi Uphile Ngekuvumelana Nekutinikela Kwakho

‘Hambani ngemoya, khona ningetiwufeza tinkhanuko tenyama.’—GAL. 5:16.

1. Nguluphi lubhabhatiso lolwenteka ngelilanga lePhentekhoste?

 KUKHULUMA ngetilwimi kwebalandzeli baJesu ngelilanga lePhentekhoste ngemnyaka wanga 33 C.E., kwenteka ngemuva kwekuba sebabhajatiswe ngemoya longcwele. Babonakalisa sipho lesimangalisako semoya longcwele. (1 Khor. 12:4-10) Lesipho kanye nenkhulumo leyetfulwa ngumphostoli Phetro kwaba nayiphi indzima? Labanyenti “bahlabeka etinhlitiyweni.” Loko lokwashiwo nguPhetro kulenkhulumo, kwabenta baphendvuka base bayabhajatiswa. Umlandvo utsi: ‘Labo labalemukela livi lakhe babhajatiswa; bekubantfu labacishe babengu-3 000 labengeteka ngalelo langa.’ (Imis. 2:22, 36-41 NW) Njengobe Jesu abeyalile, bekufanele babhajatiswe emantini egameni leYise, leNdvodzana, nelemoya longcwele.—Mat. 28:19.

2, 3. (a) Ase uchaze umehluko lokhona emkhatsini wekubhajatiswa ngemoya longcwele kanye nekubhajatiswa “egameni” lemoya longcwele. (b) Bonkhe lababa ngemaKhristu eliciniso lamuhla, kungani sibuke kutsi babhajatiswe ngemanti?

 ² Noko-ke, ukhona yini umehluko emkhatsini wekubhajatiswa ngemoya longcwele kanye nekubhajatiswa “egameni” lemoya longcwele? Yebo ukhona. Labo lababhajatiswa ngemoya longcwele batalwa kabusha njengemadvodzana aNkulunkulu latelwe ngemoya. (Joh. 3:3) Bayagcotjwa kutsi babe ngemakhosi kanye nebapristi eMbusweni waNkulunkulu wasezulwini, futsi bayincenye yemtimba wakamoya waKhristu. (1 Khor. 12:13; Gal. 3:27; Semb. 20:6) Ngako-ke, lolubhabhatiso—kubhajatiswa ngemoya longcwele, ngulolo lolwasetjentiswa nguJehova ngelilanga lePhentekhoste nangemva kwalo, wakhetsa labatsite kutsi babe tindlalifa naKhristu. (Rom. 8:15-17) Kodvwa kutsiwani ngekubhajatiswa ngemanti “egameni” lemoya longcwele, lokuyintfo leyentiwa njalo emihlanganweni lemincane nalemikhulu yebantfu baJehova lamuhla?

³ Lubhabhatiso lwemanti lusinyatselo lesitsantfwa ngemaKhristu eliciniso lesikhombisa kutinikela kwawo kuNkulunkulu Jehova ngekungatigodli. Kunjalo nangalabo labanelitsemba lekuyophila ezulwini, kufanele basitsatse leso sinyatselo. Lubhabhatiso lwemanti luphindze lube sinyatselo lesibalulekile lamuhla etigidzini tebantfu labanelitsemba lekuphila emhlabeni phakadze. Ngisho nobe umuntfu analiphi litsemba, kubhajatiswa ngemanti ‘egameni leYise, neleNdvodzana, nelemoya longcwele,’ kusinyatselo lesibalulekile kute umuntfu emukeleke kuNkulunkulu. Onkhe emaKhristu labhajatisiwe kubukwe ngalabovu kutsi ‘achubeke ahamba ngemoya.’ (Fundza Galathiya 5:16) Uhamba ngemoya yini, futsi uyaphila yini ngekuvumelana nekutinikela kwakho?

Loko Lokushiwo ‘Kuhamba Ngemoya’

4. Kusho kutsini ‘kuhamba ngemoya’?

⁴ ‘Kuhamba ngemoya’ kufaka ekhatsi kwemukela emandla emoya longcwele kanye nekuwuvumela kutsi usebente kuwe. Ngalamanye emavi kusho kubuswa ngumoya longcwele ekuphileni kwakho kwamalanga onkhe. Incwadzi yaGalathiya 5 iveta umehluko emkhatsini wekulawulwa ngumoya longcwele kanye nekulawulwa yimisebenti yenyama.—Fundza Galathiya 5:17, 18.

5. Ngumiphi imisebenti lesiyibalekelako nangabe sisetjentiswa ngumoya longcwele?

⁵ Nangabe usetjentiswa ngumoya longcwele, uyayibalekela imisebenti yenyama. Yona ifaka ekhatsi imikhuba ‘lenjengebugwadla, buphingi, kungcola, emanyala, kukhonta tithico, kutsakatsa, butsa, inkhani, umona, lulaka, kubanga, kwehlukana, kuhlubuka, kuhawukela, kudzakwa kanye nebudli.’ (Gal. 5:19-21) Ngalamanye emavi, ‘ubulala imisebenti yenyama ngemoya.’ (Rom. 8:5, 13) Loko kutawusita wena kute ucabange ngetintfo temoya futsi usebentisane kahle nawo, kunekutsi uvumele kucondziswa tifiso tenyama.

6. Fanekisa kutsi yini ledzingekako kute ube netitselo temoya longcwele.

⁶ Njengobe umoya longcwele usebenta kuwe, uba netimfanelo taNkulunkulu, ‘titselo temoya.’ (Gal. 5:22, 23) Uyacaphela nekutsi loko kudzinga kutsi wente imetamo letsite. Ase sifananise: Umlimi uyayilima insimi yakhe  aphindze ayihlanyele. Kuliciniso kutsi lilanga nemanti nako kubalulekile ngobe ngaphandle kwako, angeke asitfole sivuno. Umoya longcwele ufanana nelilanga. Siyawudzinga kute sibe netitselo temoya. Nanobe kunjalo, yini lengakhicitwa yinsimi nangabe umlimi avilapha? (Taga 10:4) Ngako-ke, indlela lolima ngayo lomhlabatsi loyinhlitiyo yakho, yenta umehluko lomkhulu elinanini nasebuhleni betitselo temoya longcwele letikuwe. Ngako-ke, tibute, ‘Ngiyawuvumela yini umoya longcwele kutsi utsele titselo tawo ngekutsi ngisebentisane nawo?’

7. Kungani kufundza nekuzindla kubalulekile nangabe ufuna kuba netitselo temoya longcwele?

⁷ Kute balimi batfole sivuno lesihle, kufanele bayinisele insimu yabo. Kute ukwati kuba netitselo temoya, udzinga emanti eliciniso leliseBhayibhelini nalelitfolakala ebandleni lebuKhristu lamuhla. (Isa. 55:1) Bakhona nebantfu losewubakhombisile kutsi imiBhalo leNgcwele iphefumulelwe ngemoya waNkulunkulu. (2 Thim. 3:16) Sisebenti lesetsembekile nalesihlakaniphile siphindze sinikete kucondza lokudzingekako kwemanti lahlobile eliciniso leBhayibheli. (Mat. 24:45-47) Kuliciniso kutsi kute umoya longcwele usebente kitsi, kufanele sifundze liVi laNkulunkulu futsi sizindle ngalo. Nangabe wenta njalo, ulingisa tibonelo letinhle tebaphrofethi ‘labaphenyisisa’ ngelwati labanikwa lona. Kuyabonakala nekutsi ngisho netingilosi tiwajabulela kakhulu emaciniso akamoya lamayelana nembewu letsenjisiwe kanye nelibandla lemaKhristu lagcotjiwe.—Fundza 1 Phetro 1:10-12.

Ungakusebentisa Njani Wena Umoya Longcwele?

8. Kubaluleke ngani kucela Jehova akuphe umoya wakhe longcwele?

⁸ Kusentjentiswa ngumoya akusho nje kutsi utawugcina ngekutadisha imiBhalo futsi uzindle ngayo. Kudzingeka uchubeke ucela lusito nesicondziso saJehova. Unemandla “ekwenta lokukhulu kakhulu kunako konkhe lesikucelako nome lesikucabangako.” (Ef. 3:20; Luk. 11:13) Ungamphendvula njani umuntfu lobuta atsi, “Kungani kudzingeka ngichubeka ngicela kuNkulunkulu nangabe vele ‘akwati kucala lengikudzingako ngingakakuceli’?” (Mat. 6:8) Khumbula kutsi ngekuthandazela umoya longcwele, uyavuma kutsi wetsembele kuJehova. Asewucabange nganasi sibonelo, nangabe kufika umuntfu acele lusito kuwe, bewungenta nobe ngabe yini kute umsite, ngobe akucelile futsi wakhombisa kukwetsemba. (Catsanisa neTaga 3:27.) Ngendlela lefananako, Jehova uyajabula nangabe ucela umoya longcwele, futsi utakunika.—Taga 15:8.

9. Kubakhona emihlanganweni yebuKhristu kungakusita njani kutsi usetjentiswe ngumoya longcwele waNkulunkulu?

⁹ Lenye indlela yekusetjentiswa ngumoya longcwele waNkulunkulu ifaka ekhatsi kuba khona emihlanganweni yelibandla, emihlanganweni lemincane kanye nalemikhulu. Kubaluleke kakhulu kwenta imetamo yekuba khona futsi ulalelisise njengobe luhlelo lwawo luchubeka. Kwenta njalo kuyawukusita ucondze “ngisho nalokujulile kwaNkulunkulu.” (1 Khor. 2:10) Kuphindze kuzuzise kakhulu nekuphendvula njalo. Asewuphindze ucabange ngemihlangano loyijabulele emavikini lamane lengcile. Usiphakamise kangakhi sandla sakho, ufuna kuniketa timphendvulo kute uvakalise kukholwa kwakho? Uyasibona yini sidzingo  sekutfutfukisa kulendzaba? Nangabe sikhona, bona kutsi yini longayenta ngaloko emavikini letako. Jehova utawusibona sifiso sakho sekuphendvula futsi akunikete umoya wakhe longcwele kute ukusite uzuze kakhulu emihlanganweni.

10. Kuhamba ngemoya kusho kwendlulisa siphi simemo kulabanye?

¹⁰ Kuhamba ngemoya kufaka ekhatsi kwemukela lesimemo lesisifundza kuSembulo 22:17 lesitsi: ‘Umoya namakoti batsi: “Kota!” Wonkhe umuntfu lovako akatsi: “Kota!” Lowo lowomile akete; nalowo lofuna emanti ekuphila, akawanatse mahhala.’ Usebenta ngesigaba samakoti logcotjiwe, umoya wendlulisa lesimemo lesimayelana nemanti ekuphila. Nangabe sewusemukele lesimemo lesitsi, “kota!” utimisele yini nawe kutsi “Kota!”? Kulilungelo lelihle kakhulu kuhlanganyela kulomsebenti losindzisa kuphila!

11, 12. Umoya longcwele unayiphi indzima emsebentini wekushumayela?

¹¹ Lomsebenti lobalulekile lamuhla uba yimphumelelo ngekucondzisa kwemoya longcwele. Sifundza indlela umoya longcwele ekhulwini lekucala leminyaka lowahlanganyela ngayo ekusungulweni kwemasimi lamasha etitfunywa telivangeli. ‘Umoya longcwele wabalela kushumayela livi leNkhosi eveni lase-Asiya’ bomphostoli Pawula nalabehamba nabo. Waphindze wangabavumeli kutsi baye e-Bhithiniya. Asati kutsi umoya longcwele wabavimbela njani kutsi bahambe baye kuletindzawo, kodvwa kuyacaca kutsi waholela Pawula encenyeni lenkhulu yase-Europe. Wabona umbono wendvodza yase Masedoniya icela lusito.—Imis. 16:6-10.

¹² Kuyafanana nalamuhla, umoya waJehova ucondzisa umsebenti wekushumayela lowentiwa emhlabeni wonkhe. Ticondziso atiniketwa ngemibono lesimangaliso, kodvwa esikhundleni saloko, Jehova ucondzisa labagcotjiwe ngemoya wakhe longcwele. Lomoya uphindze ukhutsate bazalwane nabodzadze kutsi bente konkhe labangakwenta ekushumayeleni nasekufundziseni. Asingabati kutsi nawe uyahlanganyela kulomsebenti lobalulekile. Ungayandzisa yini injabulo yakho kulomsebenti lojabulisa kangaka?

13. Ungakuvumela njani kucondziswa ngumoya longcwele? Niketa sibonelo.

¹³ Ungavumela kucondziswa ngumoya longcwele ngekusebentisa lwati loluniketwa bantfu baNkulunkulu. Asewucabange ngaMihoko intfombatana leseyincane yaseJapane. Njengelihlahlandlela leliselisha, abetiva angakufaneli kubuyela kubantfu labekacoca nabo, abetiva shengatsi angeke akhone kukhuluma ngendlela letawubangela kutsi bantfu bamlalelisise. Masinyane, kwavela emacebiso lasebentako ekubuyela kubantfu loke wacoca nabo ethulusini: Umsebenti Wetfu WeMbuso. Kwase kushicilelwa incwajana letsi A Satisfying Life—How to Attain It. Yaba lusito lolukhulu ensimini yaseJapane. Mihoko wawasebentisa lamacebiso alencwajana ekucoceni kahle nalabekabuyela kubo. Masinyane wase ucala tifundvo teliBhayibheli nebantfu labebangenandzaba nekufundza liBhayibheli. Utsi, “ngaba netifundvo letinyenti—kulamanye emahlandla ngaba naletingu-12, kwate kwadzingeka kutsi labanye babo ngicele kubabona ngalesinye sikhatsi.” Nawuhamba ngemoya futsi usebentisa ticondziso Jehova latinikete tikhonti takhe, ungatfola tibusiso.

 Tsembela Emoyeni Longcwele WaNkulunkulu

14, 15. (a) Kungenteka njani kutsi bantfu labanesono baphile ngekuvumelana nekutinikela kwabo? (b) Ungabatfola njani bangani labancono kakhulu?

¹⁴ Njengesikhonti saNkulunkulu, unemsebenti lokufanele uwente. (Rom. 10:14) Ungahle utive shengatsi awukakulungeli kahle kutfwala lomtfwalo. NguNkulunkulu lowenta siphumelele, ngendlela lenta ngayo kulabagcotjiwe. (Fundza 2 Khorinte 3:5.) Ungaphila ngekuvumelana nekutinikela kwakho, wente lokuncono kakhulu futsi wetsembele emoyeni longcwele waNkulunkulu.

¹⁵ Siyavuma, akusimelula ngatsi njengebantfu labanesono kutsi siphile ngekuvumelana nekutinikela kuNkulunkulu wetfu lote sono, Jehova. Lenye inkinga kutsi labanye bantfu lebesitihlanganise nabo ingabamangalisa indlela yetfu lensha yekuphila bate ‘basetfuke.’ (1 Phet. 4:4) Nanobe kunjalo, ungalibukeli phansi liciniso lekutsi sewutitfolele bangani labasha, lababaluleke kakhulu kubo nguJehova naJesu Khristu. (Fundza Jakobe 2:21-23.) Kumcoka futsi nekwati bazalwane nabodzadze ebandleni lenu, labayincenye ‘yebazalwane’ bemhlaba wonkhe. (1 Phet. 2:17; Taga 17:17) Ngemoya wakhe, Jehova utawukusita kutsi ube nebangani labatawuchubeka bakukhutsata kutsi wente lokuhle.

16. Kungenteka njani kutsi nawe njengaPawula, ‘wenetiswe butsakatsaka’ bakho?

¹⁶ Ngisho nobe unebangani labalusito kuwe ebandleni, ungachubeka ukutfola kulukhuni kulwisana netinkinga telilanga nelilanga. Letinkinga lokudzingeka ulwisane nato ngaletinye tikhatsi tingahle tikushiye ucobekile, kube shengatsi usemgodzini wato lomkhulu. Leso-ke sikhatsi lokufanele kutsi uye ngaso kakhulu kuJehova, ucele umoya wakhe longcwele. Umphostoli Pawula wabhala: “Ngobe nangibutsakatsaka, kulapho ngiba nemandla khona.” (Fundza 2 Khorinte 4:7-10; 12:10.) Pawula bekati kutsi umoya waNkulunkulu ungenta butsakatsaka bebantfu bubencono, ngisho nobe buvela ngaluphi luhlobo. Ngako-ke, emandla Nkulunkulu lawasebentisako ekwenteni tintfo angakucinisa nawutiva ubutsakatsaka nobe udzinga lusito. Pawula wabhala kutsi ‘abenetiswa butsakatsaka.’ Nakabutsakatsaka, abekuva kusebenta kwemoya longcwele kuye. Nawe ungativa ngendlela lefananako!—Rom. 15:13.

17. Umoya longcwele ungakusita njani njengobe wetama kufinyelela umgomo wakho?

¹⁷ Sidzinga umoya waNkulunkulu kute sikwati kuphila imphilo yekutinikela kuye. Asewuticabange ungukaputeni wemkhumbi. Umgomo wakho kukhonta Jehova phakadze. Umoya longcwele unjengemoya lodzingekako kute lomkhumbi uhambe futsi nawe ufike endzaweni loya kuyo uphephile. Awufuni kushoniswa lena nalena ngumoya welive laSathane. (1 Khor. 2:12) Lokufanele ukwente kunye-vo, kwati umoya lofanele. Lomoya lofanele, ngumoya longcwele. NgeliVi laNkulunkulu nangenhlangano yakhe lecondziswa ngumoya, umoya longcwele ungakuholela endleleni lokungiyo sibili.

18. Utimisele ngani nyalo, futsi leni?

¹⁸ Njengobe bewufundza naboFakazi BaJehova, ujabulela bungani bakamoya nabo, kusasele tinyatselo letimcoka—kutinikela nekubhajatiswa, ungatibuta nangu umbuto, ‘ngingabatelani?’ Nawuyibona indzima yemoya longcwele ekuphumeleleni kwentsandvo yaJehova lamuhla futsi ukujabulela kusebenta kwawo, tsatsa tinyatselo letifanele lofundze ngato. Jehova utakubusisa kakhulu. Utakuniketa umoya wakhe longcwele ngesihle. Nangabe wabhajatiswa eminyakeni leminyenti leyengcile, sewutibonele kusebenta kwemoya longcwele. Ubonile futsi wativela kutsi Nkulunkulu angakucinisa njani ngemoya wakhe. Loko kungachubeka kube njalo ngisho nasesikhatsini lesitako. Ngako-ke, timisele kuchubeka uhamba ngemoya longcwele.

Usakhumbula Yini?

• Kusho kutsini ‘kuhamba ngemoya’?

• Yini lengakusita kutsi ‘uchubeke uhamba ngemoya’?

• Ungaphila njani ngekuvumelana nekutinikela kwakho?

[Imibuto Yesihloko Lesifundvwako]

[Sitfombe ekhasini 17]

Kulima umhlabatsi wenhlitiyo yakho kudzinga umetamo

[Titfombe ekhasini 18, 19]

Umoya longcwele waNkulunkulu uyasebenta yini kuwe?