1. Kubaluleke kangakanani kukholwa? (Buka sitfombe lesisekucaleni kwalesihloko.)

UKE watibuta yini umbuto lotsi, ‘Jehova utangisindzisa yini ngesikhatsi sekuhlupheka lokukhulu?’ Umphostoli Pawula washo kutsi sidzinga kukholwa kute sisindze. Watsi: “Ngaphandle kwekukholwa ngeke kwenteke kutsi umuntfu amjabulise Nkulunkulu.” (Hebheru 11:6) Loko kungahle kubonakale kumelula, kodvwa liciniso likutsi “akusibo bonkhe bantfu labanekukholwa.” (2 Thesalonika 3:2) Lemibhalo lemibili isisita sicondze indlela lokubaluleke ngayo kucinisa kukholwa kwetfu.

2, 3. (a) Kubaluleke kangakanani kukholwa kwetfu? (b) Yini lesitawucoca ngayo kulesihloko?

² Umphostoli Phetro wakhuluma ngekukholwa ‘lokuvivinyiwe.’ (Fundza 1 Phetro 1:7.) Kuhlupheka lokukhulu sekusedvute kakhulu, futsi sifuna kuba bantfu “labanekukholwa, lokuholela ekulondvolotweni kwemphefumulo.” (Hebheru 10:39) Ngako kudzingeka sisebente ngekutimisela kute sicinise kukholwa kwetfu. Sifuna kuba sekhatsi kwalabo labatawuniketwa imihlomelo ngesikhatsi Jesu Khristu, iNkhosi yetfu yembulwa. Ngako, njengalendvodza leyacela kutsi Jesu ayiphe kukholwa lokucinile, natsi singasho kutsi: “Ngisite ngicinise kukholwa kwami!” (Makho 9:24) Singasho futsi njengebaphostoli  sitsi: “Cinisa kukholwa kwetfu.”—Lukha 17:5.

³ Kulesihloko, sitawufundza ngalamaphuzu lalandzelako: singakwakha njani kukholwa kwetfu, singakhombisa njani kutsi kukholwa kwetfu kucinile, futsi kungani kufanele siciniseke kutsi Nkulunkulu utasiphendvula nasimcela kutsi asiphe kukholwa lokucinile.

4. Tibonelo tabobani letingasisita kutsi sicinise kukholwa kwetfu?

⁴ Ngenca yekutsi kukholwa kubalulekile, Jehova usinikete tibonelo letinyenti eBhayibhelini letimayelana nako. Letibonelo “tabhalelwa kufundzisa tsine.” (Roma 15:4) Tibonelo tabo-Abrahama, Sara, Isaka, Jakobe, Mosi, Rahabi, Gideyoni, Bharaki nalabanye labanyenti tingasisita kutsi sicinise kukholwa kwetfu. (Hebheru 11:32-35) Ngetulu kwetibonelo tasendvulo, siphindze sibe naletinye tibonelo letinhle tekukholwa kwebazalwane betfu nabodzadze lamuhla. * (Fundza umbhalo longentansi.)

5. Elija wakhombisa njani kutsi unekukholwa lokucinile kuJehova, futsi yini lesingatibuta yona?

⁵ Lesinye sibonelo lesiseBhayibhelini lesimayelana nekukholwa, semphrofethi Elija. Njengobe uzindla ngesibonelo sakhe, cabanga ngetimo letisihlanu lakhombisa kuto kutsi unekukholwa lokucinile kuJehova. (1) Ngesikhatsi Elija atjela iNkhosi Ahabi kutsi Jehova utawuletsa somiso, washo ngesibindzi watsi: “Ngelibito [laJehova], Nkulunkulu lophilako wema-Israyeli, lengimkhontako, ngiyakutjela ngitsi kungeke kube khona ematolo ngisho nemvula kuleminyaka lembalwa letako.” (1 Emakhosi 17:1) (2) Abekholwa kutsi Jehova utawubaniketa lebebakudzinga njengobe bekunesomiso. (1 Emakhosi 17:4, 5, 13, 14) (3) Elija abekholwa nekutsi Jehova angayivusa indvodzana yemfelokati. (1 Emakhosi 17:21) (4) Abeciniseka kutsi umlilo waJehova utawushwabadzela umnikelo wakhe lawunikela eNtsabeni iKhameli. (1 Emakhosi 18:24, 37) (5) Ngisho nangaphambi kwekutsi imvula ine, Elija washo ngekuciniseka ku-Ahabi watsi: “Hamba, uyekudla unatse, ngobe kukhona umsindvo wemvula lenkhulu.” (1 Emakhosi 18:41) Ngako njengobe sesifundzile ngesibonelo sa-Elija, singatibuta sitsi, ‘Kukholwa kwami kucine njengekwakhe yini?’

6. Yini lokudzingeka siyicele kuJehova kute isisite sakhe kukholwa kwetfu?

⁶ Njengobe singeke sikhone kutakhela kukholwa kwetfu, kufanele sicele umoya longcwele waNkulunkulu. Kungani? Kungobe kukholwa kuyincenye yetitselo temoya. (Galathiya 5:22) Kukuhlakanipha kulandzela umyalo waJesu wekuthantazela  umoya longcwele. Jesu wetsembisa kutsi Jehova ‘utawubapha umoya longcwele labo labawucelako.’—Lukha 11:13.

7. Chaza kutsi singachubeka njani sicinisa kukholwa kwetfu.

⁷ Nase sinekukholwa lokucinile kuNkulunkulu, kufanele sikulondvolote. Kukholwa singakufananisa nemlilo. Nasibasa umlilo, ucale ube nemalangabi lamakhulu. Nobe kunjalo, nangabe singawukhweteli ungalotsa futsi ucishe. Kodvwa nasichubeka siwukhwetela, singawugcina uvutsa. Kungendlela lefanako nangekukholwa kwetfu. Nangabe sichubeka sifundza liVi laNkulunkulu onkhe emalanga futsi silidadisha, indlela lesitsandza ngayo liBhayibheli naJehova itawukhula. Loko kutasenta silondvolote kukholwa kwetfu futsi sikucinise.

8. Yini letakusita kutsi wakhe futsi ulondvolote kukholwa kwakho?

⁸ Kufanele ungagcini nje ngetintfo lowatifundza ngaphambi kwekutsi ubhajatiswe. (Hebheru 6:1, 2) Kufundza ngetiphrofetho teliBhayibheli lesetigcwalisekile kutakusita kutsi wakhe kukholwa kwakho uphindze ukulondvolote. Ungaphindze usebentise liVi laNkulunkulu kute ubone kutsi kukholwa kwakho kucine mbamba yini.—Fundza Jakobe 1:25; 2:24, 26.

9, 10. Kukholwa kwetfu kuciniswa njani (a) bangani labakahle? (b) yimihlangano yelibandla? (c) kushumayela?

⁹ Umphostoli Pawula watsi njengobe singemaKhristu kufanele “sikhutsatane, nguloyo akhutsateke ngekukholwa kwalomunye.” (Roma 1:12) Kusho kutsini loko? Kusho kutsi nangabe sicitsa sikhatsi sinebazalwane nabodzadzewetfu, singacinisana ekukholweni. Loko kuliciniso, ikakhulukati nangabe sicitsa sikhatsi nalabo labake ‘bavivinywa’ ekukholweni. (Jakobe 1:3) Bangani lababi bayakucedza kukholwa kwetfu, kodvwa bangani labakahle bayakwakha. (1 Khorinte 15:33) Kungako sikhutsatwa kutsi siye njalo emihlwanganweni. Nasifika khona siyachubeka ‘sikhutsatana.’ (Fundza Hebheru 10:24, 25.) Ngetulu kwaloko, ticondziso lesititfola emihlanganweni ticinisa kukholwa kwetfu. LiBhayibheli litsi “kukholwa kulandzela kuva.” (Roma 10:17) Ngako tibute: ‘Imihlangano yebuKhristu iyincenye yekuphila kwami yini?’

¹⁰ Siphindze sicinise kukholwa kwetfu nasishumayela tindzaba letimnandzi letiseBhayibhelini. NjengemaKhristu angelikhulu lekucala, natsi siyametsemba Jehova futsi sikhuluma ngesibindzi ngisho sikusiphi simo.—Imisebenti 4:17-20; 13:46.

11. Yini leyenta boKhalebi naJoshuwa baba nekukholwa lokucinile, futsi singabalingisa njani?

¹¹ Kukholwa kwetfu kuJehova kuyacina nasibona indlela lasisita ngayo nalaphendvula ngayo imithantazo yetfu. Nguloko lokwenteka kuKhalebi naJoshuwa. Bakhombisa kukholwa kuJehova ngesikhatsi baye kuyewuhlola Live Lesetsembiso. Njengobe sikhatsi sichubeka, kukholwa kwabo bekucina ngaso sonkhe sikhatsi  nababona indlela Jehova labekabasita ngayo. Joshuwa abengawatjela ngekuciniseka ema-Israyeli atsi: “Kute nome sinye setsembiso lesingazange sifezeke kuto tonkhe letetsembiso letinhle Simakadze Nkulunkulu wenu laninike tona.” Ngemuva kwaloko watsi: “Ngako yesabani Simakadze [Jehova] nimkhonte ngekwetsembeka konkhe.” Wengeta watsi: “Mine nendlu yami sitawukhonta” Jehova. (Joshuwa 23:14; 24:14, 15) Nasetsembela kuJehova futsi sibone indlela lasisita ngayo ekuphileni kwetfu, kukholwa kwetfu kutawucina.—Tihlabelelo 34:8.

12. Sikhombisa njani kutsi sinekukholwa lokucinile?

¹² Singakhombisa njani kutsi sinekukholwa lokucinile? Umfundzi Jakobe watsi: “Ngitakukhombisa kukholwa kwami ngemisebenti.” (Jakobe 2:18) Indlela lesenta ngayo itawukhombisa kutsi sinekukholwa lokucinile. Asesibone kutsi kanjani.

13. Sikukhombisa njani kukholwa kwetfu nasishumayela?

¹³ Kushumayela kuyindlela lehamba embili yekukhombisa kukholwa kwetfu. Kungani kunjalo? Kungobe nasishumayela sikhombisa kutsi siyakholwa kutsi kuphela sekusondzele nekutsi ‘ngeke kwephute.’ (Habakhuki 2:3) Kute sibone kutsi kukholwa kwetfu kucinile yini, singatibuta kutsi: ‘Kubaluleke kangakanani kushumayela kimi? Ngenta konkhe lokusemandleni ami yini kute ngitjele labanye ngaNkulunkulu? Ngiyatifuna yini letinye tindlela kute ngente lokunyenti emsebentini waJehova?’ (2 Khorinte 13:5) Asikhombise kutsi sinekukholwa lokucinile ngekuvuma ‘embikwebantfu bese siyasindziswa.’ Loko sikwenta ngekushumayela  tindzaba letimnandzi.—Fundza Roma 10:10.

14, 15. (a) Singakukhombisa njani kukholwa ekuphileni kwetfu? (b) Shano sibonelo lesikhombisa kuba nekukholwa lokucinile.

¹⁴ Siphindze sikhombise kutsi siyakholwa kuJehova nasibeketelela tinkinga lesibhekana nato kulelive. Nasigula, sidvumatekile, sicindzetelekile, siphuyile nome sinaletinye tinkinga, kufanele sikholwe kutsi Jehova naJesu ‘batasisita ngesikhatsi lesifanele.’ (Hebheru 4:16) Sikhombisa kukholwa kuJehova nasimcela kutsi asisite. Jesu watsi singamcela Jehova kutsi asiphe “sinkhwa setfu kuye ngetidzingo tetfu.” (Lukha 11:3) Tindzaba letiseBhayibhelini tifakazela kutsi Jehova angasipha nome yini lesiyidzingako. Nasi sibonelo: Ngesikhatsi kunesomiso lesikhulu ka-Israyeli, Jehova wapha Elija kudla nemanti. LiBhayibheli litsi “emahhwabayi abemletsela sinkhwa nenyama njalo ekuseni nasentsambama, bese unatsa kulowo mfudlana.” (1 Emakhosi 17:3-6) Natsi siyakholwa kutsi Jehova angasipha nome yini lesiyidzingako.

¹⁵ Siyaciniseka kutsi nangabe sisebentisa timiso teliBhayibheli, sitawukhona kunakekela tidzingo temindeni yetfu. Rebecca, longudzadze loshadile wase-Asia, uchaza indlela yena nemndeni wakhe labasebentisa ngayo timiso letiku-Matewu 6:33 nakuTaga 10:4. Utsi indvodza yakhe beyibona shengatsi umsebenti wayo  bewubeka buhlobo babo naJehova engotini. Ngako yawuyekela lomsebenti. Kodvwa bebanebantfwana labane lobekufanele babanakekele, ngako bacala kupheka kudla labatakutsengisa. Ngenca yekusebenta kwabo ngekutimisela, bebatfola imali leyenele kute banakekele umndeni wabo. Rebecca utsi: “Sabona kutsi Jehova akasilahli. Asizange silale singakadli.” Kukhona yini lokufanana naloku lokwentekile kuwe, lokucinise kukholwa kwakho?

16. Yini letawenteka nasetsembela kuNkulunkulu?

¹⁶ Akukafaneli singabate kutsi Jehova utasisita nasilandzela ticondziso takhe. Pawula wacaphuna emavi aHabakhuki latsi: “Lolungile utawuphila ngenca yekukholwa.” (Galathiya 3:11; Habakhuki 2:4) Kungako kufanele sibe nekukholwa lokucinile kuLoyo lotasisita. Pawula usikhumbuta kutsi Nkulunkulu ‘unguloyo lokutsi ngemandla akhe lasebenta kitsi akwati kwenta lokukhulu kakhulu kunato tonkhe tintfo lesiticelako nobe lesiticabangako.’ (Efesu 3:20) Tinceku taJehova tenta konkhe lokusemandleni ato kute tente intsandvo yakhe, kodvwa tiyati kutsi tinemandla lamancane. Sijabula kakhulu ngekutsi Nkulunkulu unatsi nekutsi ubusisa yonkhe imetamo yetfu.

17. (a) Jesu wabaphendvula njani baphostoli? (b) Kungani singalindzela kutsi Jehova utatiphendvula ticelo tetfu letimayelana nekukholwa lokucinile?

¹⁷ Kuloko lesesicoce ngako, singahle sitive njengebaphostoli ngesikhatsi bacela Jesu batsi: “Cinisa kukholwa kwetfu.” (Lukha 17:5) Jesu wabaphendvula ngendlela lekhetsekile baphostoli bakhe ngeliPhentekhoste langemnyaka wa-33, ngesikhatsi bemukela umoya longcwele futsi bayicondza kabanti inchazelo lemayelana nenjongo yaNkulunkulu. Loku kwacinisa kukholwa kwabo. Waba yini umphumela? Ngaleso sikhatsi bacala umsebenti lomkhulu wekushumayela. (Kholose 1:23) Singalindzela yini kutsi ticelo tetfu letimayelana nekukholwa lokucinile tiphendvulwe? Jehova usetsembisa kutsi singakwenta loko nangabe ‘sicela ngekwentsandvo yakhe.’—1 Johane 5:14.

18. Jehova ubabusisa njani bantfu labacinisa kukholwa kwabo?

¹⁸ Nangabe Jehova simetsemba mbamba, utawujabula ngatsi. Utasiphendvula sicelo setfu lesimayelana nekukholwa lokucinile, futsi ‘sitawufanela uMbuso wakhe.’—2 Thesalonika 1:3, 5.