Lomunye babe waseBrazil utsi: “Tingcondvo tetfu tisuke setikuloko lesikwentako eKukhonteni Kwemndeni kwakusihlwa kangangekutsi size sicedze ebusuku kakhulu nangabe ngingakasimisi lesifundvo.” Lenye inhloko yemndeni yaseJapan itsi indvodzana yayo leneminyaka lelishumi budzala ayitihluphi ngekunaka sikhatsi futsi isuke isafuna kuchubeka. Kungani yenta njalo? Lobabe utsi: “Iyakhutsateka futsi loko kuyengetela injabulo.”

Nanobe kunjalo, akusibo bonkhe bantfwana labativa ngalendlela futsi ecinisweni, labanye bangase bangakujabuleli kukhonta kwemndeni. Yini lebangela loko? Naku lokwashiwo ngulomunye babe waseTogo: “Kukhonta Jehova akukafaneli kube yintfo lengajabulisi.” Nangabe kunjalo, loko ngeke yini kusho kutsi kukhonta kwemndeni akwentiwa kahle? Imindeni leminyenti itfole kutsi kukhonta kwemndeni kungaba ‘yinjabulo,’ njengobe kwasho Isaya mayelana neliSabatha.—Isa. 58:13, 14.

Bobabe labangemaKhristu batfole kutsi kuze kukhonta kwemndeni kujabulise, kudzingeka wonkhe umuntfu ative akhululekile. Ralf, lonemadvodzakati lamatsatfu nendvodzana yinye, utsi kukhonta kwabo kwemndeni kuba shengatsi bayaticocela nje, akubi ngatsi sifundvo, futsi wonkhe umuntfu uba nencenye. Kuliciniso kutsi akusimelula ngaso sonkhe sikhatsi kwenta wonkhe umuntfu akujabulele kukhonta kwemndeni futsi abe nencenye kuko. Lomunye make uyavuma: “Ngaletinye tikhatsi ngiba bete umdlandla wekwenta kukhonta kwemndeni kujabulise njengobe bengingatsandza.” Ungakhona yini kuncoba lenkinga?

Lomunye babe waseJalimane lonebantfwana lababili utsi: “Kudzingeka sivumelane netimo.” Natalia, longumake lonebantfwana lababili utsi: “Intfo lebaluleke kakhulu emndenini wetfu kwenta tintfo letehlukahlukene.” Imindeni leminyenti yehlukanisa kukhonta kwemndeni kube  tincenye letehlukahlukene. Cleiton, longubabe waseBrazil lonebantfwana lababili labaseminyakeni yekutfomba utsi: “Loko kwenta lesifundvo sibe mnandzi kakhulu futsi onkhe emalunga emndeni ayahlanganyela kuso.” Ngekwehlukanisa lesifundvo, batali bangatfola litfuba lekutsi banake tidzingo temntfwana ngamunye nangabe bashiyana kakhulu ngeminyaka. Batali bangacoca nelilunga ngalinye lemndeni ngetidzingo talo futsi bangashintjashintja nabakhetsa loko lokutawufundvwa nendlela lokutakwentiwa ngayo.

Labanye benta njani kute bente tintfo letehlukahlukene ekukhonteni kwabo kwemndeni? Labanye bacala ngekuhlabela tingoma teMbuso. Juan waseMexico utsi: “Loko kwenta wonkhe umuntfu akhululeke kuphindze kwente tingcondvo tetfu tilungele loko lesitakufundza.” Umndeni wakhe ukhetsa tingoma letihambelana naloko lokutawube kufundvwa ngalelo langa.

Imindeni leminyenti ifundza incenye letsite leseBhayibhelini ndzawonye. Kuze ente lokwehlukile, emalunga emndeni afundza tindzima tebantfu labehlukahlukene labakuleyo ndzaba. Lomunye babe eJapan wavuma kutsi “ekucaleni kufundza ngaleyo ndlela bekuyintfo lengaketayeleki” kuye. Kodvwa emadvodzana akhe lamabili bekakujabulela kubona batali bawo bajabula ngekwenta lokutsite nawo. Leminye imindeni ize idlale ema-drama ngetindzaba letiseBhayibhelini. Roger, longubabe waseNingizimu Afrika lonemadvodzana lamabili, utsi: “Bantfwana ngalesinye sikhatsi babona tintfo eBhayibhelini tsine batali lebesingakatiboni.”

Lenye indlela yekwenta tintfo letehlukahlukene kutsi umndeni usebente ndzawonye wakhe lokutsite, njengemkhumbi waNowa nobe lithempeli laSolomoni. Kwenta loku kudzinga kutsi ucwaninge futsi loko kungajabulisa. Nasi sibonelo: Kulomunye umndeni wase-Asia, intfombatanyana leneminyaka lesihlanu budzala beyinebatali bayo kanye nagogo wayo endlini yekuphumula. Bebadlala lomunye umdlalo lokhombisa luhambo lwemphostoli Pawula lwetitfunywa telivangeli. Leminye imindeni idlala imidlalo lesekelwe etindzabeni letisencwadzini ya-Eksodusi. Donald waseTogo loneminyaka lengu-19 budzala utsi: “Kwenta tintfo letehlukahlukene kwente kukhonta kwetfu kwemndeni kwajabulisa, nemndeni wetfu wajabula.” Ukhona yini umdlalo lowucabangako longenta kukhonta kwemndeni wakho kujabulise kakhudlwana?

Nanobe kwenta tintfo letehlukahlukene kanye nekuvumelana netimo kwenta kukhonta kwemndeni kujabulise, kodvwa kuze kufundzise sibili, kudzingeka kutsi nonkhe nilungiselele. Ngaletinye tikhatsi bantfwana bayadzinwa, ngako bobabe kudzingeka bacabangisise ngaloko labakhetsa kutsi kwentiwe baphindze batinikete sikhatsi sekulungiselela kahle. Naku lokushiwo ngulomunye babe: “Nangilungiselele, wonkhe umuntfu uyazuza kulesifundvo.” Lomunye babe eJalimane utjela umndeni wakhe kusenesikhatsi ngaloko lokutawufundvwa emavikini lalandzelako. Lomunye babe waseBenin lonebantfwana labancane labasitfupha, nakahlela kutsi kubukelwe i-DVD lesekelwe eBhayibhelini ekukhonteni kwemndeni, ubaniketa imibuto kusenesikhatsi. Kuyacaca kutsi kulungiselela kwenta kukhonta kwemndeni kuzuzise.

Nangabe umndeni ukwati kusenesikhatsi loko lokutawufundvwa, ungacoca ngako njengobe liviki lisachubeka, lokwenta kutsi ube nenkhaphunkhaphu. Nangabe umuntfu ngamunye abelwe lokutsite, loko kutakwenta kutsi naye ative ayincenye yalokukhonta kwemndeni.

Imindeni leminyenti ikutfola kumatima kuba nekukhonta kwemndeni njalo.

Bobabe labanyenti kudzingeka basebente ema-awa lamanyenti kuze bakhone kondla imindeni yabo. Nasi sibonelo: Lomunye babe lohlala eMexico usuka ekhaya ngensimbi yesitfupha ekuseni aze abuye ngensimbi yesiphohlongo ebusuku. Kuletinye timo, kungase kube nesidzingo sekutsi kushintjwe sikhatsi seKukhonta Kwemndeni ngenca yaleminye imibutsano yebuKhristu leba khona.

Nanobe kunjalo, kudzingeka kutimisela kuze kukhonta kwemndeni kube khona njalo. Nakakhuluma ngekutimisela kwemndeni wakubo, Loïs lohlala eTogo loneminyaka lelishumi nakunye budzala utsi: “Ngisho nobe ngaletinye tikhatsi kudzingeka sicale kukhonta kwemndeni sekwephutile ngenca yalokutsite lokuphatamisile emkhatsini welilanga, siyaciniseka kutsi kuba khona.” Kungaleso sizatfu leminye imindeni ihlela kutsi ibe nekukhonta kwemndeni nakusasuka liviki. Nangabe kuvela simo lebesingakalindzeleki, ingakhona kuphindze ihlele kukuchuba ngalelinye lilanga kulelo viki.

Njengobe kubitwa ngekutsi “kukhonta kwemndeni,” leligama liyaveta kutsi kuyincenye yekukhonta kwenu Jehova. Njalo ngeliviki, onkhe emalunga emndeni kufanele aletse kuJehova ‘titselo temilomo yawo.’ (Hos. 14:2) Shengatsi leso kungaba sikhatsi lesijabulisa kakhulu kuwo onkhe emalunga emndeni, “ngobe injabulo yenu levela kuSimakadze ingemandla enu.”—Neh. 8:9, 10.