JESU KHRISTU watsi: “Hamba uye ekhaya kubakini, ubabikele ngako konkhe Jehova lakwentele kona kanye nemusa lakubonise wona.” Ngesikhatsi asho lamavi kungenteka abeseGadara, lebeyiseningizimu mphumalanga yeLwandle LwaseGalile, akhuluma nendvodza lebeyifuna kuba ngumlandzeli wakhe. Lamavi aJesu akhombisa kutsi abeyicondza intfo levamise kwentiwa bantfu—kutsi banesifiso sekucocela tihlobo tabo ngetintfo letibajabulisako naletimcoka kubo.—Mak. 5:19.

Loku sivamile kukubona lamuhla, kepha kuletinye tive kubonakala kakhulu kunaletinye. Ngako umuntfu nakaba sikhonti saJehova longuNkulunkulu weliciniso, uvamise kufuna kucocela tihlobo takhe ngetinkholelo takhe letinsha. Angakwenta njani loku? Angakhona njani kufinyelela tinhlitiyo tetihlobo takhe letikuletinye tinkholo nome letingakholwa sanhlobo? LiBhayibheli liniketa seluleko lesihle nalesinengcondvo.

Ekhulwini lekucala leminyaka, Andreya abengulomunye kulababa bekucala kwati kutsi Jesu unguMesiya. Ngubani lamtjela ngekushesha ngaloko? “[Andreya] wacale watfola Simoni umnakabo, watsi kuye: ‘Simtfolile Mesiya’ (lokusho kutsi Khristu).” Andreya waya naPhetro kuJesu, ngaleyo ndlela wavulela Phetro litfuba lekutsi naye abe ngumfundzi waJesu.—Joh. 1:35-42.

Ngemuva kweminyaka lesitfupha ngesikhatsi Phetro ahlala eJopha, wacelwa kutsi atsatse luhambo loluya enyakatfo alibangise eKhesariya ayewuvakasha endlini yaKhoneliyuse, lobekayindvuna yelibutfo. Bobani Phetro labakhandza babutsene endlini? “Khoneliyuse abebalindzile [boPhetro kanye nalabo lebekahamba nabo], futsi abite tihlobo nebangani  bakhe labakhulu.” Ngaleyo ndlela Khoneliyuse waniketa tihlobo takhe litfuba lekuva loko lebekutawushiwo nguPhetro nekutsi tente tincumo letisekelwe kuloko lebetikuvile.—Imis. 10:22-33.

Yini lesingayifundza endleleni Andreya kanye naKhoneliyuse labatiphatsa ngayo tihlobo tabo?

Andreya kanye naKhoneliyuse abazange nje batsi kutawuvele kutentakalele kutsi tihlobo tabo tati liciniso. Andreya yena matfupha wetfula Phetro kuJesu, kantsi Khoneliyuse wahlela kutsi tihlobo takhe tive loko lobekutawushiwo nguPhetro. Kodvwa bo-Andreya naKhoneliyuse abazange baticindzetele tihlobo tabo nobe basebentise bucili kute batente tibe balandzeli baKhristu. Kukhona yini sifundvo lositfolako kuloku? Kutawuba kuhle nangabe natsi senta ngalendlela. Singase sikhone kucocela tihlobo tetfu emaciniso nobe sivule ematfuba ekutsi tati emaciniso laseBhayibhelini futsi tetayelane nalabo lesikholwa nabo. Nanobe kunjalo, siyayihlonipha inkhululeko yato yekutikhetsela futsi sifuna kukubalekela kuticindzetela. Kuze sibone kutsi singatisita njani tihlobo tetfu, asesicabange ngesibonelo saJürgen naPetra, labashadene labahlala eJalimane.

Petra wafundza liBhayibheli naBoFakazi BaJehova, ngekuhamba kwesikhatsi wabhajatiswa. Indvodza yakhe lenguJürgen beyiphetse emasotjeni. Ekucaleni, sincumo lesentiwa ngumkakhe asizange simjabulise Jürgen. Kodvwa ngekuhamba kwesikhatsi, wabona kutsi BoFakazi bashumayela liciniso leliseBhayibhelini. Naye wanikela kuphila kwakhe kuJehova, futsi nyalo ungulomdzala ebandleni lakulo. Ngusiphi seluleko lasiniketako mayelana nekufinyelela inhlitiyo yesihlobo lesikulenye inkholo?

Naku lokushiwo nguJürgen: “Akukafaneli setame kuphocelela tihlobo tetfu nobe sikhulume kakhulu mayelana nenkholo. Kwenta kanjalo kungase kucinise tingcondvo tato. Kungase kube ncono kutiniketa lwati kancane kancane futsi loko sikwente ngekuhlakanipha. Kungasita kakhulu kutsi sente tihlobo tetfu tetayelane nalesikholwa nabo lababontsanga yato futsi labatsandza tintfo letifanako. Kwenta njalo kungenta kutsi kube melula kutisita.”

Umphostoli Phetro kanye netihlobo taKhoneliyuse bawemukela ngekushesha umlayeto lovela eBhayibhelini. Labanye labeva liciniso ekhulwini lekucala, bebadzinga sikhatsi lesinyenti kute bente sincumo.

Tihlobo taJesu letinyenti takhombisa kukholwa kuye ngesikhatsi ashumayela. Nasi sibonelo: Kubonakala shengatsi Salome, unina wemphostoli Jakobe kanye naJohane, abengudzadzewabo Mariya unina waJesu. Kungenteka bekangulomunye ‘webafati labanyenti lebebasebentisa tintfo tabo kute basite [Jesu nebaphostoli].’—Luk. 8:1-3.

Nanobe kunjalo, lamanye emalunga emndeni wakuboJesu akazange akukhombise ngekushesha kukholwa. Sibonelo saloko kutsi ngalesinye sikhatsi ngemuva kwemnyaka Jesu abhajatisiwe, ticumbi tebantfu tabutsana endlini letsite kute titewumlalela. “Bakubo nabeva ngaloku, beta batewumlandza ngobe bebatsi: ‘Uyahlanya.’” Ngemuva kwesikhatsi lesitsite, bomnakabo Jesu bambuta ngetinhlelo takhe tekuhamba, kodvwa akazange abaphendvule ngalokucondzile. Kungani enta njalo? Kungobe “bomnakabo bebangakholwa kuye.”—Mak. 3:21; Joh. 7:5.

Yini lesingayifundza endleleni Jesu laphatsa ngayo tihlobo takhe? Akazange acansuke ngesikhatsi letinye timtjela kutsi uyahlanya. Ngisho nangemuva kwekubulawa nekuvuswa kwakhe, Jesu wachubeka atikhutsata tihlobo takhe ngekutsi abonakale kumnakabo longuJakobe. Kubonakala kwakhe kwasita  Jakobe waciniseka kutsi Jesu unguMesiya sibili kwaphindze kwacinisekisa nalabanye bomnakabo. Ngako bebanebaphostoli kanye nalabanye ekamelweni lelisetulu eJerusalema futsi asingabati kutsi nabo bemukela umoya longcwele. Ngekuhamba kwesikhatsi, Jakobe naJuda lababomnakabo Jesu, batfola emalungelo lakhetsekile.—Imis. 1:12-14; 2:1-4; 1 Khor. 15:7.

Njengobe kwakunjalo ngelikhulu lekucala leminyaka, letinye tihlobo lamuhla tidzinga sikhatsi ngaphambi kwekuba tingene endleleni leya ekuphileni. Cabanga ngesibonelo saRoswitha, lobekangumRoma Katolika loshisekako ngesikhatsi indvodza yakhe ibhajatiswa iba ngulomunye waBoFakazi BaJehova nga-1978. Njengobe abebambelele kuloko labekukholelwa, ekucaleni Roswitha wayiphikisa indvodza yakhe. Kodvwa ngekuhamba kweminyaka, kuphikisa kwakhe kwehla futsi wabona kutsi BoFakazi bafundzisa liciniso. Wabhajatiswa nga-2003. Yini leyambangela kutsi ente lolushintjo? Kunekutsi indvodza yaRoswitha icansulwe kuphikisa kwakhe kwasekucaleni, yamnika ematfuba lamanyenti ekutsi ashintje indlela labecabanga ngayo. Ngusiphi seluleko Roswitha lasiniketa sona? Utsi: “Kunyenti kakhulu longakufeza ngekutsi ubeketele, futsi ubeketele kakhulu.”

Monika wabhajatiswa nga-1974, futsi emadvodzana akhe lamabili aba BoFakazi cishe ngemuva kweminyaka lelishumi. Nanobe indvodza yakhe lenguHans beyingabaphikisi, kodvwa yaze yabhajatiswa nga-2006. Mayelana naloko lokwenteke kuwo, ngusiphi seluleko lomndeni losiniketa sona? Utsi: “Namatsela ngebucotfo kuJehova futsi ungatentisi etindzabeni letiphatselene nekukholwa.” Kuliciniso kutsi bekudzingeka bamtjele njalo Hans kutsi bayamtsandza. Abazange baphelelwe litsemba lekutsi ngalelinye lilanga utakwemukela loko labakukholelwako.

Ngalelinye lilanga Jesu wachaza umlayeto weliciniso ngekutsi ufanana nemanti lakwenta utfole kuphila lokuphakadze. (Joh. 4:13, 14) Sifuna tihlobo tetfu tivuseleleke ngekunatsa lamanti lamnandzi nalahlobile eliciniso. Asifuni tihishwe ngobe tinatsiswa emanti lamanyenti ngenkhani nangekushesha. Kutsi titawutiva tivuselelekile yini nobe titawuhishwa, kungaya ngekutsi sitichazela njani ngaloko lesikukholelwako. LiBhayibheli litsi “umuntfu lolungile ucabanga kucala angakaphendvuli” liphindze litsi “inhlitiyo yemuntfu lohlakaniphile iyakwati kukhetsa emavi, onkhe emavi lawakhulumako ayalandzeleka.” Singasisebentisa njani leseluleko?—Taga 15:28; 16:23.

Umfati angase abe nesifiso sekuchazela indvodza yakhe ngaloko lakukholelwako. Nangabe ‘acabanga kucala angakaphendvuli’ utawakhetsa kahle emavi latawasebentisa futsi angakhulumi angakacabangi. Akukafaneli ente indvodza yakhe ibe nemuva wekutsi utibona alungile nobe aphakeme kunayo. Inkhulumo yakhe lecatjangelwe kahle ingajabulisa futsi yente kube nekuthula. Ngusiphi sikhatsi lapho indvodza yakhe isuke ikhululeke khona futsi ingeneka kalula? Ngutiphi tintfo lejabulela kucoca nobe kufundza ngato? Itsandza kukhuluma ngesayensi yini, ngepolitiki, nobe temidlalo? Angasikhulisa njani sifiso sendvodza yakhe sekufundza liBhayibheli abe ngesikhatsi lesifanako akhombise kuhlonipha indlela letiva ngayo nemibono yayo? Kucabanga ngaloku kutamsita umfati kutsi akhulume futsi ente tintfo ngekucondza.

Kufinyelela tinhlitiyo temalunga emndeni langasibo BoFakazi akufaki nje kuphela kuwachazela kancane kancane ngaloko lesikukholelwako. Kodvwa loko lesikushoko kufanele kuhambisane nekutiphatsa lokuhle.

Jürgen lokukhulunywe ngaye ekucaleni uyachaza: “Chubeka usebentisa timiso teliBhayibheli ekuphileni kwakho kwamalanga onkhe. Leyo yindlela lephumelela kakhulu ekwenteni sihlobo sinake futsi siphawule, ngisho nobe singeke sisho lutfo.” Hans lowabhajatiswa sekwendlule iminyaka lecishe ibengu-30 umfati wakhe abhajatisiwe, uyavumelana naloku. Utsi: “Kutiphatsa kahle kwemKhristu kubalulekile kute sihlobo sibone umphumela lomuhle lobangelwa liciniso ekuphileni kwetfu.” Tihlobo tetfu kufanele tibone kutsi sehluke ngendlela lenhle, hhayi lengatsandzeki nobe lecansulako futsi tibone kutsi loku kubangelwa kukholwa kwetfu.

Umphostoli Phetro waniketa bafati labanemadvodza langasibo BoFakazi leseluleko lesiligugu lesitsi: “Titfobeni emadvodzeni enu, kuze kutsi nangabe lamanye kuwo angalilaleli livi, azuzwe ngaphandle kwemavi ngekutiphatsa kwebafati bawo, ngenca yekutsi atibonele wona kutiphatsa kwenu lokumsulwa  nenhlonipho yenu lenkhulu. Kutihlobisa kwenu akungabi kwangaphandle—njengemichino, kufaka imihlobiso yeligolide, nobe timphahla—kodvwa akube nguloko lokusenhlitiyweni, kutihlobisa lokungonakali kwemoya wekuthula nalomuhle, lobaluleke kakhulu emehlweni aNkulunkulu.”—1 Phet. 3:1-4.

Phetro wabhala kutsi indvodza ingase izuzwe ngenca yesibonelo lesihle semfati wayo. Analesimiso semBhalo engcondvweni yakhe, dzadze libito lakhe lokunguChrista abetama kufinyelela inhlitiyo yendvodza yakhe kusukela ngesikhatsi abhajatiswa nga-1972. Nanobe indvodza yakhe yake yafundza naBoFakazi, isengakalenti liciniso laba layo. Yake yaya emihlanganweni yebuKhristu futsi yetayelena nalabo labasebandleni. Nabo bayalihlonipha lilungelo layo lekutikhetsela. Yini Christa layentako kute etame kufinyelela inhlitiyo yayo?

Utsi: “Ngitimisele kuhlala endleleni Jehova lafuna ngihambe ngayo. Ngesikhatsi lesifanako, ngiyetama kuzuza umyeni wami ‘ngaphandle kwemavi’ ngekutiphatsa kwami lokuhle. Nangabe kute timiso teliBhayibheli letiphulwako, ngenta konkhe lokusemandleni kutsi ngivumelane netifiso takhe. Ngiyayihlonipha inkhululeko yakhe yekutikhetsela futsi ngishiyela konkhe kuJehova.”

Loko lokwentiwa nguChrista kukhombisa kubaluleka kwekutivumelanisa netimo. Ubambelela eluhlelweni lwakhe loluhle lwekwenta imisebenti yebuKhristu, lefaka ekhatsi kuya njalo emihlanganweni nekuba nencenye emsebentini wekushumayela. Nanobe kunjalo, ukhombisa kucondza futsi uyati kutsi indvodza yakhe inelilungelo lekulindzela kutsi ayibonise lutsandvo, ayinikete sikhatsi futsi ayinake. Kutivumelanisa netimo kanye nekucondza kukuhlakanipha kunobe ngubani kitsi lonesihlobo lesingasiye Fakazi. LiBhayibheli liyachaza: “Konkhe kunesikhatsi sako.” Loku kufaka ekhatsi sikhatsi lesisicitsa sinemalunga emndeni, ikakhulukati bantfu lesishade nabo labangasibo BoFakazi. Sikhatsi lesisicitsa sindzawonye sitfutfukisa indlela lesikhulumisana ngayo. Lokuhlangenwe nako kukhombisa kutsi kukhulumisana lokuhle kunciphisa ematfuba ekutsi bative banesitunge, banganakwa, nobe banemona.—Shu. 3:1.

Holger, lonababe lowabhajatiswa ngemuva kweminyaka lengu-20 kubhajatiswe lamanye emalunga emndeni, watsi: “Kubalulekile kukhombisa lilunga lemndeni wetfu kutsi siyalitsandza futsi siyalithantazela.” Christa uchubeka atsi ‘ngeke aze aphelelwe litsemba lekutsi ngalelinye lilanga indvodza yakhe itawumelela Jehova futsi yemukele liciniso.’ Kufanele sihlale sinesimo sengcondvo lesihle ngetihlobo tetfu letingasibo BoFakazi futsi singalilahli litsemba.

Umgomo wetfu kutsi sigcine buhlobo lobuhle netihlobo tetfu, sitinikete litfuba lekutfola liciniso futsi sitsintse tinhlitiyo tato ngemlayeto weliBhayibheli. Konkhe lesikwentako kufanele sikwente “ngemoya lomuhle nangenhlonipho lenkhulu.”—1 Phet. 3:15.