Ngangineminyaka lelishumi kuphela budzala nga-1985 ngesikhatsi bantfwana baseCambodia befika esikolweni sami eColumbus, Ohio, eMelika. Kulabantfwana labefika, lomunye umfana bekati emagama lambalwa esiNgisi. Sisitwa titfombe, wangicocela tindzaba letibuhlungu mayelana nekuhlukunyetwa, kubulawa nekubaleka kwebantfu. Ngangikhala ebusuku njengobe ngangicabanga ngalabantfwana. Ngangifuna kubatjela ngelitsemba lekuphila eParadisi nangelitsemba lekuvuswa kwalabafile kodvwa bebangaluva lulwimi lengangilukhuluma. Nanobe ngangisengumfana, ngakhetsa kufundza lulwimi lwesiCambodia kute ngitewucocela bantfwana lengangifundza nabo ngaJehova. Ngangingaboni kutsi lendlela lengangiyikhetsile itawuncuma kuphila kwami.

Kufundza lulwimi lwesiCambodia kwakumatima. Ngancuma kabili kuyekela kufundza lolulwimi, kodvwa Jehova wangikhutsata asebentisa batali bami. Njengobe sikhatsi sihamba bothisela kanye nalabo lengangifundza nabo bangicela kutsi ngifune likusasa lelincono. Kodvwa mine ngangifuna kuba lihlahlandlela, futsi nasengisebangeni leliphakeme esikolweni ngakhetsa tifundvo letitangisita kutsi ngitfole ematoho kute ngikwati kufinyelela umgomo wami. Nakuphuma sikolwa ngangivame kuhlangana nemahlahlandlela ngisebente nawo ensimini. Ngaphindze ngavolontiya kufundzisa bantfwana lebebafundza lulwimi lwesiNgisi lolwalungasilo lulwimi lwabo lwemdzabu futsi loko lengakukhetsa kwangizuzisa kakhulu kamuva.

Nangineminyaka lengu-16 budzala ngeva kutsi kunelicembu lebantfu baseCambodia eLong Beach, eCalifornia, eMelika. Ngavakashela lapho futsi ngafundza kufundza siCambodia. Nangicedza esikolweni, ngaba lihlahlandlela futsi ngachubeka ngishumayela bantfu labakhuluma siCambodia lebebahlala edvute nasekhaya. Nasengineminyaka lengu-18 budzala, ngangicabanga ngekutfutsela e-Cambodia. Kwakusolo kuseyindzawo leyingoti, kodvwa bengati kutsi emkhatsini wetigidzi letilishumi tebantfu labebahlala e-Cambodia labambalwa bebake bativa tindzaba letimnandzi teMbuso. Ngalesosikhatsi, kwakunelibandla linye vo lelalinebamemeteli labangu-13 kuphela eveni lonkhe. Ngavakasha kwekucala eCambodia nangineminyaka lengu-19 budzala. Ngemuva kweminyaka lemibili ngivakashile ngakhetsa kutfutsela khona. Ngatfola litoho lekuhumusha siNgisi kute ngikwati kutisekela emsebentini wekushumayela. Ngekuhamba kwesikhatsi ngaba nemfati lobekanemigomo lefana neyami. Sobabili sijabulele kusita bantfu labanyenti baseCambodia kutsi banikele kuphila kwabo kuNkulunkulu.

Jehova ungiphe ‘lokufiswa yinhlitiyo yami.’ (Hla. 37:4) Kwenta bafundzi ngumsebenti lowenetisa kwendlula noma ngabe ngumuphi umsebenti. Kuleminyaka lengu-16 ngiseCambodia, lelicembu lelincane lebantfu labangu-13 letinceku taJehova, selikhule laba ngemabandla langu-12 nemacenjana langu-4!—Njengobe ilandziswa ngu-Jason Blackwell.