EMINYAKENI lengetulu kwalengu-3 000 leyendlulile, indvodza lenguJobe yabona kutsi tinyoni telizulu tingasifundzisa lokunyenti mayelana nemisebenti yaNkulunkulu. Indlela tinyoni letenta ngayo isenta sikhone kubekisa siphindze sifananise tintfo ngato. Nakukhulunywa ngetinyoni telizulu eBhayibhelini, sitfola tifundvo letibalulekile mayelana nekuphila kanye nebuhlobo betfu naNkulunkulu. Ase sibuke tibonelo letimbalwa.

Takhamuti taseJerusalema betibetayele boncedze, labebavame kwakha tidleke tabo ngephansi kweluphahla lwetindlu. Labanye bebakha tidleke tabo ethempelini lebelakhiwe nguSolomoni. Kungenteka laboncedze labebakhe tidleke tabo kulelithempeli bebalitfola liyindzawo lephephile yekukhulisa emazini abo.

Umbhali weTihlabelelo 84 lokungulenye yemadvodzana aKhora lebeyikhonta ethempelini kanye ngeliviki etinyangeni letisitfupha, yatibona letidleke kulelithempeli. Lendvodzana beyikulangatelela kuhlala endlini yaJehova njengalaboncedze, yaze yababata yatsi: “Maye, iyatsandzeka indlu yakho! Simakadze wemabandla! Umphefumulo wami ulangatelela emagceke akho, inhlitiyo yami nemtimba wami kuhlabela kumemete ngekujabula lokukhulu kuNkulunkulu lophilako. Ncedze uyayitfola indzawo yesidleke, nenkonjane iyayitfola indzawo yekwakhela indlu yayo, lapho ingachobosela khona emazini ayo. Lendzawo ingasemalatini endlu yakho, Simakadze wemabandla, Nkhosi yami, naNkulunkulu wami.” (Tihlabelelo 84:1-3) Siyakulangatelela yini kuhlangana nebantfu baNkulunkulu sikanye nebantfwana betfu futsi sikhombise kubonga ngako?​—Tihlabelelo 26:8, 12.

Umphrofethi Jeremiya wabhala watsi: “Ngisho nagilonki esibhakabhakeni uyatati tikhatsi takhe letimisiwe.” Lomphrofethi bekalwati kahle luhambo lwabogilonki lobelwendlula eVeni Lesetsembiso. Entfwasahlobo, bogilonki labangetulu kwa-300 000 bayandiza basuke e-Afrika balibangise eNyakatfo yeYurophu badzabule Esigodzini saseJordane. Bayati nasekutawungena lihlobo, lokusikhatsi sekutsi babuyele lapho batalela khona. Njengaletinye tinyoni letindizako, bogilonki ‘bayasigcina sikhatsi sabo sekuhamba.’​—Jeremiya 8:7.

Incwadzi letsi Collins Atlas of Bird Migration itsi: “Intfo lemangalisako ngaloluhambo kutsi luvele lutentakalele.” Jehova Nkulunkulu unikete letinyoni kuhlakanipha lokumangalisako kute tibone nasekusikhatsi sekutsi tihambe, kodvwa umuntfu yena umnikete likhono lekucondza kushintja kwetikhatsi netikhatsi temnyaka. (Lukha 12:54-56) Kuze umuntfu akhone kucondza kubaluleka kwetikhatsi lesiphila kuto, angasitwa lwati ngaNkulunkulu kuphela, hhayi kuhlakanipha kwemvelo lokunjengekwagilonki. Ema-Israyeli angesikhatsi saJeremiya abengakunaki kubaluleka kwesikhatsi labephila kuso. Nkulunkulu wachaza kutsi beyiyini inkinga yawo, watsi: “Njengobe balilahlile livi laSimakadze nje, banakuphi-ke kuhlakanipha?”​—Jeremiya 8:9.

 Lamuhla sinebufakazi lobunyenti bekutsi siphila esikhatsini liBhayibheli lelisibita ngekutsi ‘ngemalanga ekugcina.’ (2 Thimothi 3:1-5) Utamlingisa yini gilonki ngekutsi ukunake kubaluleka ‘kwesikhatsi’ lesiphila kuso?

LiBhayibheli livame kukhuluma ngelusweti kanye nangesitfunti salo lesingakavami lebesibonakala kanyenti eVeni Lesetsembiso. Lusweti lusuka esidlekeni salo lesisetulu “luhambe luyewufuna kudla kwalo; emehlo alo avele akubone kusesekhashane.” (Jobe 39:27-29) Emehlo alo akhaliphe kakhulu kangangekutsi lungambona ngisho nalogwaja nome lundizela etulu ngemamitha langu-1000.

Jehova uyakhona kubona tintfo letitawenteka esikhatsini lesitako, njengobe nje nelusweti lukhona “kubona tintfo letikhashane.” Kungaleso sizatfu Jehova atsi: “Ngimemetela siphetfo kusukela ekucaleni, kusukela etikhatsini takadzeni ngimemetela loko lokutakwenteka.” (Isaya 46:10) Nangabe sisilalela sicondziso saJehova, sitawuzuza ekuhlakanipheni kwakhe lokungalinganiseki kanye nasekhonweni lakhe lekubona tintfo letisengakenteki.​—Isaya 48:17, 18.

LiBhayibheli liphindze licatsanise bantfu labetsemba Jehova nelusweti, litsi: “Labo labetsembele kuSimakadze batfola emandla lamasha. Bayawukhuphuka ngemaphiko njengetinsweti.” (Isaya 40:31) Lusweti lusebentisa umoya lofutfumele kuze lukhone kuphakama luye etulu. Naselusendzaweni lenalomoya, luvula timphiko talo bese lushaya situngeletane kulomoya lofutfumele lolenta kutsi lukhone kuphakama kancane kancane. Lusweti alwetsembeli emandleni alo kute lundize futsi luntjweze emoyeni sigaba lesidze. Kuyafana nangalabo labetsemba Jehova, bangabambelela kuye njengobe abetsembisa kubanika “emandla lamakhulu kakhulu.”​—2 Khorinte 4:7, 8.

Ngaphambi nje kwekutsi Jesu afe, watinika sikhatsi sekubukisisa iJerusalema lebekuyinhlokodolobha yemaJuda. Ngenhlitiyo lebuhlungu watsi: “Jerusalema, Jerusalema, wena lobulala baphrofethi, nalobagcoba ngematje labo labatfunyelwe kuwe​—kukangakhi ngifuna kubagcogcela ndzawonye bantfwabakho, kuhle kwesikhukhukati sigcogcela emantjwele aso ngaphansi kwetimphiko taso! Kodvwa nine anizange nivume.”​—Matewu 23:37.

Lomunye wemikhuba lemihle yetinyoni kutsi tiyawavikela emazini ato. Tinyoni letingataleli etidlekeni letifaka ekhatsi tinkhukhu, kufanele tibe neliso lelikhaliphile ekubukeni tintfo letingaba yingoti. Nangabe sikhukhukati sibona lohheya andizela etulu, siyawecwayisa ematjwele aso, ngemuva kwaloko nawo abese ayagijima acondze ngephansi kwemaphiko aso. Nasekangephansi kwalamaphiko, lamantjwele angavikeleka elangeni lelishisa kakhulu kanye nasemvuleni lematima. Njengalesikhukhukati, Jesu bekafuna kuvikela takhamuti taseJerusalema etintfweni lebetingabeka buhlobo bato naJehova engotini. Lamuhla, Jesu usimema kutsi site kuye kute sitfole kucabuleka kanye nekuvikeleka ekucindzetelweni yimitfwalo lesindzako netinkinga tekuphila.​—Matewu 11:28, 29.

Ecinisweni, tinyenti tifundvo lesingatitfola nasibukisisa tinyoni telizulu. Nangabe utibona, yetama kukhumbula imibhalo lekhuluma ngato noma lebekisa ngato. Shengatsi sibonelo sancedze singakusita kutsi uyitsandze indlu lesikhontela kuyo Jehova. Shengatsi ungetsembela kuJehova kute akuphe emandla ekukhuphuka ngemaphiko njengelusweti. Shengatsi ungeta kuJesu kute utfole liciniso lelimayelana naNkulunkulu kute likuvikele njengobe sikhukhukati sivikela emantjwele aso. Shengatsi gilonki angakukhumbuta kutsi kubalulekile kutinaka tintfo letentekako eveni letisho kutsi siphila kusiphi sikhatsi.