SARA bekakhutsele futsi anaka tonkhe tintfo lebetentiwa ekhaya lakhe. Njengobe bekangumcondzisi, tisebenti takhe betijabula futsi timatasatasa ngemsebenti abetabela wona. Njengemfati lobekakhutsele, naye bekasebenta. Mbone ngeliso lengcondvo atelula tandla, etama kucedza buhlungu. Kungenteka bekachibela lithende lakhe njengobe bebahlala kulo. Lelithende lebelakhiwe ngeboya bembuti lebeseligugiswe lilanga kanye netimvula, lakhumbuta Sara kutsi sebaneminyaka leminyenti solo baphila ngekutfutsela kuletinye tindzawo letahlukene. Bese kunguntsambama futsi lilanga bese liyotilahla kunina. Abembonile Abrahama * nakahamba ekuseni, futsi nyalo besekabuke elukhalweni kutsi uyachamuka yini. Wavele nje wamamatseka nakabona indvodza yakhe ichamuka esicongweni sentsaba.

Bese kuphele iminyaka lelishumi Abrahama ahole umndeni wakhe lomkhulu bawele uMfula iYufrathe futsi behlela eKhenani. Sara bekakujabulela kusekela indvodza yakhe kuloluhambo lwabo lolukhulu lwekuya endzaweni lebebangayati, ngobe bekati kutsi indvodza yakhe beyitawugcwalisa injongo yaJehova ngekutsi ivete intalo lebeyitawutsandvwa kakhulu nguNkulunkulu iphindze ibe sive. Yini lebeyitakwentiwa nguSara ekugcwaliseni lenjongo yaNkulunkulu? Bekasolo ete bantfwana futsi besekaneminyaka lengu-75 budzala. Kungenteka watibuta lombuto, ‘Setsembiso saJehova sitawugcwaliseka kanjani njengobe ngingumfati wa-Abrahama?’ Bekufanele kutsi akhatsateke nobe aphelelwe sineke.

Natsi ngaletinye tikhatsi singase sikhatsateke ngekutsi tiyogcwaliseka nini tetsembiso taNkulunkulu. Ngalokuvamile nangabe sigadze intfo letawusijabulisa, sifisa shengatsi ngabe yenteka ngaleso sikhatsi. Yini lesingayifundza kulomfati losibonelo?

Lomndeni bowusandza kubuya eGibhithe. (Genesisi 13:1-4) Bewakhe emathende etintsabeni letisemphumalanga neBhetheli nobe eLuzi, njengobe emaKhenani bekayibita kanjalo lendzawo. Kuletintsaba, Sara bekakhona kubona kahle Live Lesetsembiso Jehova bekabetsembise lona. Bekuhlala emaKhenani kulendzawo futsi bekunemigwaco lekhiphela tivakashi kuletinye tindzawo. Nobe lendzawo beyiyinkhulu kanganani, kodvwa beyingafanani nelidolobha Sara bekasuka kulo. Wakhulela e-Uri, lidolobha leliyiMesophothamiya, lebelikhashane ngemakhilomitha langu-1 900 kusuka eKhenani. Washiya tihlobo takhe lapho, washiya nelidolobha lelihle lelinetimakethe netitolo letinyenti kanye nelikhaya lakubo lelihle lebelinako konkhe lakudzingako mhlawumbe nemifula legeletako! Nasingacabanga Sara abuka emuva futsi eva buhlungu ngekutsi ushiye likhaya lakubo lelihle nemphilo lentofontofo, loko kungasho kutsi asimati kahle lomfati lebekasaba Nkulunkulu.

Naka loko lokwabhalwa ngumphostoli Pawula eminyakeni lengu-2 000 leyalandzela. Akhuluma ngekukholwa kwaSara na-Abrahama, watsi: “Kube bebasolo bayikhumbula indzawo lebebaphume kuyo, bebatawutfola litfuba lekubuyela emuva.” (Hebheru 11:8, 11, 15) Bobabili abazange batikhumbule tintfo lebebatishiye emuva. Kube bake banaka tintfo labatishiyile, bekungenteka bacabange kubuyela emuva. Kubuyela kwabo e-Uri, bekutawusho kutsi bebatawulahlekelwa ngulelilungelo  Jehova bekabatsembise lona. Futsi bekungeke kukhulunywe ngabo njengebantfu labatibonelo letinhle tekukholwa kubantfu labatigidzi.

Kunekutsi Sara abuke tintfo latishiyile, wanaka loko bekakutsenjiswe nguNkulunkulu. Ngako wachubeka asekela indvodza yakhe kuloluhambo lwabo, futsi bekalekelela nakutfutfwa emathende, nakuchutjwa imihlambi kanye nalapho kwakhiwa kabusha emathende endzaweni lensha. Wabeketelela netinkinga letinyenti kanye netimo letishintjako. Jehova wasivusetela setsembiso lebekasente ku-Abrahama​—kodvwa akakhulumanga lutfo ngaSara!​—Genesisi 13:14-17; 15:5-7.

Ekugcineni, Sara wancuma kutjela indvodza yakhe Abrahama ngaloko bekakucabanga ngalenkinga lebekabhekene nayo. Mbone ngeliso lengcondvo nakaveta indlela lebekativa ngayo, nakatsi: “Ase ubuke, Simakadze ungimile intalo.” Ngako wacela indvodza yakhe kutsi ilale nesisebenti sakhe, Hagari, kute simtalele bantfwana. Asewumcabange nje Sara acela intfo lenjalo endvodzeni yakhe? Esikhatsini setfu, loku kungavakala kusicelo lesetfusako, kodvwa ngaleta tikhatsi bekuyintfo levamile kutsi indvodza ibe nalomunye umfati lotayitalela indlalifa. * Kungenteka yini kutsi Sara bekacabanga kutsi leyo bekuyindlela Nkulunkulu bekatawugcwalisa ngayo injongo yakhe yekutsi abe nesive? Kunobe ngabe ngukuphi, bekakulungele kutidzela. Wentani njani Abrahama? LiBhayibheli litsi “Abrama walilalela livi laSarayi.”​—Genesisi 16:1-3.

Singasho yini kutsi nguJehova lowatjela Sara kutsi akacele indvodza yakhe ilale nesisebenti sakhe? Cha. Kunaloko, lesento sakhe besingentiwa ngunobe ngubani. Bekacabanga kutsi nguNkulunkulu lobekambangele kutsi angabatfoli bantfwana, futsi bekangaticabangi kutsi uyoke abe nabo. Sincumo saSara besitawumletsela tinkinga kanye nekucindzeteleka. Nobe kunjalo, sicelo sakhe sakhombisa kutsi abengaticabangeli yena kuphela. Sara akasiso yini sibonelo lesihle sekungaticabangeli yena njengoba kulelive kugcwele bantfu labaticabangela bona? Nangabe sibeka tinjongo taNkulunkulu kucala kunetidzingo tetfu, sitawube silingisa kukholwa kwaSara.

Ngekushesha nje, Hagari wakhulelwa umntfwana wa-Abrahama. Kungenteka Hagari kukhulelwa kwakhe kwamenta watibona sekancono kunaSara, ngako wacala kumedzelela. Loku kwamdvumata kakhulu Sara! Ngekuvunyelwa ngu-Abrahama kanye nekusekelwa nguNkulunkulu, Sara wamekhuta loHagari lebekadzelela. Hagari watala indvodzana lengu-Ishmayeli, futsi bahlala iminyaka leminyenti emtini waSara na-Abrahama. (Genesisi 16:4-9, 16) Ngesikhatsi Sara aneminyaka lengu-89 nendvodza yakhe ineminyaka lengu-99, batfola umlayeto lovela kuJehova. Lona kwakungumlayeto lojabulisa kakhulu!

 Jehova waphindze watsembisa umngani wakhe Abrahama kutsi bekatabandzisa bantfwabakhe. Nkulunkulu waphindze walishintja ligama la-Abrahama. Bekasolo atiwa ngekutsi ngu-Abram. Jehova wase utsi utawubitwa ngekutsi Abrahama, lokusho kutsi “uYise wetive letinyenti.” Kuloku, kwaba kwekucala kutsi Jehova avete kutsi Sara abetawuba nencenye ekugcwalisekeni kwalesitsembiso. Waphindze walishintja neligama laSara lelitsi Sarayi, lokungenteka belisho kutsi “Intfo lebeyingabanga kucabana,” wase utsi abesatawubitwa ngekutsi nguSara lokuligama lesiletayele. Lisho kutsini ligama lelitsi Sara? Lisho kutsi “Nkhosatana”! Jehova uyasichazela kutsi kungani akhetsa kubita lomfati lotsandzekako ngaleligama leli, utsi: “Ngiyawumbusisa, ngikunike indvodzana ngaye. Ngiyawumbusisa, abe ngunina wetive. Kuyawuvela kuye emakhosi etive.”​—Genesisi 17:5, 15, 16.

Sivumelwano saJehova lasenta na-Abrahama sekuveta intalo lebeyitawubusisa tonkhe tive, besitawugcwaliseka ngendvodzana yaSara! Ligama Nkulunkulu laletsa lomfana, lelitsi Isaka, lisho “Luhleko.” Ngesikhatsi Abrahama atjelwa ngenjongo yaJehova yekubusisa Sara ngemntfwana lotawutalwa nguye matfupha, “wakhotsamisa buso bakhe, batsintsa phansi, wahleka.” (Genesisi 17:17) Wamangala futsi wajabula kakhulu. (Roma 4:19, 20) Sara yena wenta njani?

Kungakapheli sikhatsi lesinganani kwentekile loku, kwefika emadvodza lamatsatfu langatiwa, ethendeni la-Abrahama. Nanobe bekusemini futsi lishisa, labantfu labadzala ngekushesha batilungiselela lokudliwako letivakashi. Abrahama watjela Sara kutsi ‘akasheshise atsatse emabinta lamatsatfu afulaha ayibhuce, ente emacebelengwane.’ Kwemukela tivakashi bekunemsebenti lomnyenti ngaleso sikhatsi. Abrahama akazange ashiyele kuSara kutsi kube nguye yedvwa lowenta lomsebenti, kunaloko naye waphutfuma wahlaba inkunzi leseyincane wayipheka, waphindze wenta nalokunye kudla kanye nalokunatfwako. (Genesis 18:1-8) Lawomadvodza bekutingilosi taJehova! Kungenteka umphostoli Pawula bekacabanga ngaloku nakabhala atsi: “Ningakukhohlwa kwemukela tivakashi, ngobe ngako labanye bangenisa tingilosi bangati.” (Hebheru 13:2) Ungasilingisa yini lesibonelo lesihle sekwemukela tivakashi lesentiwa bo-Abrahama naSara?

Ngesikhatsi lenye yaletingilosi iphindze itjela Abrahama ngesetsembiso saNkulunkulu sekutsi Sara abetawutala indvodzana, abazange bambone Sara kutsi abengaphandle kwelithende, alalele. Kwametfusa kucabanga kutsi ebudzaleni bakhe bekatawutala umntfwana, kangangekutsi wehluleka kutibamba—wevakala sekahleka atsi: “Manje sengimdzala kangaka, nenkhosi yami seyigugile, utsi ngingabe ngisaba nayo lenjabulo?” Lengilosi yalungisa kucabanga kwaSara ngekutsi imbute lombuto lotsi, “Kukhona yini lokungamehlula Simakadze?” Njengobe bekungenta nobe ngumuphi lomunye umuntfu, Sara wavele wesaba futsi watitsetselela. Wavele watsi: “Angikahleki!” Ingilosi yaphendvula yatsi: “Cha, vele uhlekile.”​—Genesisi 18:9-15.

Ngabe kuhleka kwaSara bekusho kutsi ute yini kukholwa? Cha. LiBhayibheli litsi: “Ngekukholwa, Sara wemukela emandla kuze atetfwale abe nentalo, ngisho nobe abesamdzala kakhulu kutsi angatala, ngobe abemetsemba loyo lowetsembisa.” (Hebheru 11:11) Sara bekamati kahle Jehova, futsi bekati nekutsi angagcwalisa nobe ngabe ngusiphi setsembiso lasentile. Ngubani nje kitsi longeta akudzinga kukholwa lokufana naloku? Sitawube senta kahle nangabe simati kancono Nkulunkulu, umnikati weliBhayibheli. Njengobe sifundza ngaye, sitawubona kutsi Sara bekenta intfo lekahle ngekuba nekukholwa. Jehova wetsembekile futsi utigcwalisa tonkhe tetsembiso takhe​—ngalesinye sikhatsi , angahle ente tintfo lesikatilindzeli nobe tisente sihleke nje!

Nakaneminyaka lengu-90 budzala, Sara wagcine akutfolile loko bekasolo akulangatelela kuphila kwakhe konkhe. Watalela indvodza yakhe, lebeyineminyaka lelikhulu budzala, indvodzana! Abrahama wetsa lomntfwana libito lelitsi Isaka nobe “Luhleko,” njengobe Nkulunkulu abemtjelile. Singake simbone ngeliso lengcondvo Sara amamatseka nakasho nankha emavi latsi: “Nkulunkulu ungiphe luhleko, bonkhe labayivako lendzaba bayawuhleka njengami.” (Genesisi 21:6)  Lesipho lesimangalisako lebesivela kuJehova samjabulisa Sara kwaze kwaba sekufeni kwakhe. Nobe kunjalo, saphindze samngetela leminye imitfwalo.

Ngesikhatsi Isaka aneminyaka lengu-5 budzala, umndeni wakhe wenta umcimbi wekulunyulwa kwakhe. Kodvwa betingahambi kahle tonkhe tintfo. LiBhayibheli lisitjela kutsi Sara bekahlala ‘abona’ intfo lebeyimvisa buhlungu. Ishmayeli, indvodzana yaHagari lebeyineminyaka lengu-19 budzala, beyimhlupha onkhe malanga Isaka. Bekungasiko nje kutsi uyamdlalisa. Kamuva umphostoli Pawula waphemfulela kutsi abite lesento sa-Ishmayeli ngekutsi lushishiso. Sara wabona kutsi lokuhlukubetwa kwa-Isaka bekungafaka kuphila kwendvodzana yakhe engotini. Sara bekati kutsi Isaka bekangetulu nje kwekuba yindvodzana yakhe, kodvwa bekanendzima lebalulekile ekugcwaliseni injongo yaJehova. Ngako wacunga sibindzi, futsi wakhuluma na-Abrahama. Wamcela kutsi ahambise Hagari kanye na-Ishmayeli.​—Genesisi 21:8-10; Galathiya 4:22, 23, 29.

Wativa njani Abrahama ngaloko? LiBhayibheli litsi: “Loku kwamkhatsata kakhulu Abrahama, ngobe bekuphatselene nalendvodzana yakhe.” Bekamtsandza kakhulu Ishmayeli, futsi bekutawuba lukhuni kwehlukana naye. Nobe kunjalo, Jehova abesicondza kancono lesimo, ngako wangenela kulendzaba. LiBhayibheli litsi: “Kodvwa Nkulunkulu watsi ku-Abrahama: “Ungakhatsateki ngenca yalomfana nangenca yalesigcilikati sakho. Loko lokushiwo nguSara kuwe kwente njengobe akutjelile, ngobe titukulwane takho tiyawubitwa nga-Isaka.”” Jehova wacinisekisa Abrahama kutsi abetawubanakekela boHagari kanye nendvodzana yakhe. Abrahama lobekanekukholwa wavumelana naleso sincumo.​—Genesisi 21:11-14.

Sara bekangumfati lokahle futsi bekamsekela ngaso sonkhe sikhatsi. Abengamane nje atjele indvodza yakhe loko beyifuna kukuva. Nakabona inkinga lebeyingahle iphatamise umndeni wabo nobe likusasa lalomndeni, bekavele akhulume nendvodza yakhe ngaleyonkinga. Kuvele acondze endzabeni akukafaneli kusente sicabange kutsi abengahloniphi. Ecinisweni, nemphostoli Phetro lobekashadile, nakakhuluma ngaSara, watsi bekasibonelo lesihle futsi angumfati loyihlonipha kakhulu indvodza yakhe. (1 Khorinte 9:5; 1 Phetro 3:5, 6) Kube Sara akazange ayikhulume lendzaba, loko bekutawusho kutsi akamhloniphi Abrahama, futsi loko bekutakwenta indvodza yakhe ilahlekelwe ngulelilungelo beyilinikwe nguNkulunkulu futsi nemndeni wabo wonkhe ulahlekelwe malungelo lamanyenti. Ngelutsandvo Sara wenta loko bekufanele akwente.

Bafati labanyenti bayasijabulela lesibonelo saSara. Bafundza sibonelo lesihle sekukhuluma ungagegi nangenhlonipho emadvodzeni abo. Ngaletinye tikhatsi, labanye bafati bangase bafise kutsi Jehova angenele etindzabeni letitsite njengobe enta kuSara. Nobe kunjalo, bangafundza esibonelweni saSara sekukholwa, lutsandvo kanye nekubeketela.

Nanobe lomfati lotsandzekako etsiwa nguJehova kutsi ‘yiNkhosatana,’ kodvwa akazange alindzele kutsi aphatfwe njengemuntfu wasesigodlweni. Akumangalisi-ke kwati kutsi ngalesikhatsi Sara afa aneminyaka lengu-127 budzala, ‘Abrahama wamkhalela.’ * (Genesisi 23:1, 2) Bekayikhumbula kakhulu “Inkhosatana” yakhe lebekayitsandza. Asingabati kutsi naJehova uyamkhumbula lomfati lobekanekukholwa​—futsi ulangatelela kumvusa epharadisi emhlabeni. Sara utawutfola kuphila lokuphakadze netibusiso letinyenti esikhatsini lesitako kanye nabo bonkhe labalingisa kukholwa kwakhe.​—Johane 5:28, 29.