LITSEMBA LELIJABULISAKO! UMdali wetfu usetsembise kutsi sitawuphila khona lamhlabeni phakadze. Nanobe kunjalo, bantfu labanyenti bakutfola kulukhuni kukwetsemba loko. Bavame kutsi ‘Bonkhe bantfu batawugcine bafile. Kuphila kunjalo nje.’ Labanye bayati kutsi bangaphila phakadze, kepha hhayi lamhlabeni. Batsi kuphila lokuphakadze kutfolakala kuphela umuntfu nasafile wase uya ezulwini. Wena ucabangani?

Ngaphambi kwekutsi wente sincumo, kungani ungacabangi ngetimphendvulo letiseBhayibhelini talemibuto lemitsatfu letsi: Indlela bantfu labadalwe ngayo isitjelani ngesikhatsi lebekumele basiphile? Beyiyini injongo yaNkulunkulu yasekucaleni ngemhlaba nangebantfu? Kufa kwavelaphi?

Kuto tonkhe tintfo Nkulunkulu latidalile, bantfu behluke kakhulu. Kanjani? LiBhayibheli lisitjela kutsi bantfu kuphela labadalwa ‘ngemfanekiso waNkulunkulu futsi bamfuta’. (Genesisi 1:26, 27) Kusho kutsini loko? Kusho kutsi bantfu badalwa baba nebuntfu lobufana ncamashi nebaNkulunkulu, lebunjengelutsandvo nekulunga.

Bantfu badalwa kutsi babe nelikhono lekucabanga, lekwati lokuhle nalokubi, nekutsi babe nesifiso sekukhonta Nkulunkulu. Kungako sikhona kujabula ngebuhle bendalo, emakhono, umculo kanye netinkondlo. Ngetulu kwako konkhe, bantfu bayakhona kuba nebuhlobo lobuhle neMdali. Buntfu lobunjena benta kube nemehluko lomkhulu emkhatsini webantfu nakuto tonkhe letinye tintfo letiphilako emhlabeni.

Ngako tibute, Nkulunkulu bekangasidala yini kutsi sibe nebuntfu lobunjena aphindze asiphe nelikhono lekubutfutfukisa abe ahlose kutsi siphile sikhashana nje? Liciniso likutsi Nkulunkulu wasidala saba nalobuntfu kanye nemakhono lahlukile kute sitokhona kujabulela kuphila lamhlabeni phakadze.

Nanobe kunjalo, labanye batsi Nkulunkulu bekangakahlosi kutsi bantfu baphile phakadze emhlabeni. Batsi umhlaba bewakhelwe kutsi sihlale kuwo sikhashana, kute kubonakale kutsi ngubani lofanelwe kuyophila phakadze ezulwini naNkulunkulu. Nangabe loko bekuliciniso, bekungeke  yini kubonakale shengatsi nguNkulunkulu lobangela bonkhe lobubi lobukhona lamhlabeni? Loko bekungaba yintfo lephambene nebuntfu baNkulunkulu. LiBhayibheli litsi ngaye: “Tindlela takhe tonkhe tilungile. Nkulunkulu lowetsembekile longakwenti lokubi, ucotfo akakhetsi muntfu.”​—Dutheronomi 32:4.

LiBhayibheli liyiveta ngalokucacile injongo yaNkulunkulu yasekucaleni ngemhlaba nalitsi: “Emazulu ayindzawo yaSimakadze, yena yedvwa, kodvwa umhlaba wawuniketela kubantfu.” (Tihlabelelo 115:16) Nkulunkulu wadala umhlaba waba yindzawo lenhle, wayenta yaba nako konkhe lokudzingwa bantfu kute bajabule futsi bahlale kuyo kuze kube phakadze.​—Genesisi 2:8, 9.

“Emazulu ayindzawo yaSimakadze, yena yedvwa, kodvwa umhlaba wawuniketela kubantfu.”​—Tihlabelelo 115:16

LiBhayibheli liphindze likhulume nangenjongo yaNkulunkulu ngebantfu. Nkulunkulu watjela bantfu bekucala kutsi ‘bagcwalise umhlaba, bawuncobe. Babuse . . .tonkhe tilwane letihamba emhlabeni.’ (Genesisi 1:28) Bebanelilungelo lekunakekela lelikhaya labo leliliPharadisi futsi balikhulise lize ligcwale emhlabeni wonkhe. Ngako kusebaleni kutsi bo-Adamu na-Eva bebatawuphila phakadze emhlabeni nebantfwababo, hhayi ezulwini.

Kungani-ke sifa? LiBhayibheli lisitjela kutsi lenye ingilosi yaNkulunkulu leyase seyibitwa ngekutsi nguSathane Develi yaphatamisa luhlelo lwaNkulunkulu e-Edeni. Kanjani?

Sathane wenta kutsi batali betfu bekucala bangamlaleli Nkulunkulu njengaye. Ngesikhatsi Sathane atsi Nkulunkulu ubagodlele lokuhle, lokulilungelo labo lekutikhetsela kutsi ngukuphi lokuhle nalokubi, wabenta balalela yena esikhundleni sekutsi balalele Nkulunkulu. Waba yini umphumela? Ngekuhamba kwesikhatsi bafa, njengobe nje Nkulunkulu bekashilo. Balahlekelwa litfuba lekuphila phakadze emhlabeni loliPharadisi.​—Genesisi 2:17; 3:1-6; 5:5.

Kungalaleli kwabo-Adamu na-Eva kwabatsintsa bonkhe bantfu. LiBhayibheli litsi: “Ngemuntfu munye [lokungu-Adamu] sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu.” (Roma 5:12) Lamuhla siyafa ngobe satfola sono nekufa kubatali betfu bekucala, hhayi ngobe loko bekuyinhloso yaNkulunkulu.

Kungalaleli kwebantfu bekucala e-Edeni akuyishintjanga injongo yaNkulunkulu ngebantfu nangemhlaba. Njengobe Nkulunkulu anelutsandvo futsi alungile, wenta indlela yekutsi sikhululeke ekugcilatweni sono nekufa. Umphostoli Pawula watsi: “Umvuzo wesono kufa, kodvwa sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.” (Roma 6:23) Ngelutsandvo, Nkulunkulu “wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Johane 3:16) Jesu wabuyisela konkhe loko lobekulahlwe ngu-Adamu ngekutsi atinikele ngekutitsandzela abe yinhlawulo. a

Setsembiso saNkulunkulu sekugucula lomhlaba ube lipharadisi sitawufezeka masinyane. Nawe ungaba nalo lelikusasa lelihle nangabe nje ulalela lamavi aJesu latsi: “Ngenani ngelisango lelincane, ngobe ibanti futsi ivulekile indlela leya ekubhujisweni, banyenti labahamba kuyo; kantsi lincane lisango kanye nendlela leya ekuphileni, futsi bambalwa labayitfolako.” (Matewu 7:13, 14) Likusasa lakho lisetandleni takho! Wena utawentani?