Ngubani Libito LaNkulunkulu? Nkulunkulu ngekwakhe utsi: “[NginguJehova, NW]; lelo libito lami!” (Isaya 42:8) Libito laNkulunkulu livela tikhatsi letingaba ngu-7 000 eBhayibhelini. Nobe kunjalo, emahumusho eliBhayibheli lamanyenti alisusile leligama laNkulunkulu afaka ticu, letinjengekutsi “Nkhosi.” Nkulunkulu ufuna kutsi ube ngumngani wakhe, kungako akukhutsata kutsi ‘ubite libito lakhe.’​—Tihlabelelo 105:1.

Ticu TaJehova. LiBhayibheli lisebentisa ticu letinjengekutsi “Nkulunkulu,” “Somandla,” “uMdali,” “Babe,” “Nkhosi” “naNkhosi Lephakeme” nalikhuluma ngaJehova. Imithantazo leminyenti leseBhayibhelini isikhombisa kutsi bantfu nabakhuluma ngaJehova bebasebentisa ticu kanye nelibito lakhe lelitsi Jehova.​—Danyela 9:4.

 Simo SaNkulunkulu. Nkulunkulu ungumoya. (Johane 4:24) LiBhayibheli liyasicinisekisa kutsi “kute umuntfu loke wabona Nkulunkulu.” (Johane 1:18) LiBhayibheli liveta indlela Nkulunkulu lativa ngayo. Bantfu bangamvisa buhlungu nobe ‘bamjabulise.’​—Taga 11:20; Tihlabelelo 78:40, 41.

Buntfu Lobuhle BaNkulunkulu. Nkulunkulu akakhetsi wemukela bantfu bato tonkhe tive. (Imisebenti 10:34, 35) Uphindze abe ‘nesihawu nemusa; uyephuta kutfukutsela andze ngemusa nangekwetsembeka.’ (Eksodusi 34:6, 7) Nanobe kunjalo, bune buntfu baNkulunkulu lobuhamba embili.

Emandla. Njengobe ‘anguNkulunkulu Somandla,’ unawo emandla ekufeza nome ngabe yini layetsembisile.​—Genesisi 17:1.

Kuhlakanipha. Kuhlakanipha kwaNkulunkulu kwendlula kuhlakanipha kwebantfu. Ngaleyondlela liBhayibheli litsi ‘nguye yedvwa lohlakaniphile.’​—Roma 16:27.

Kulunga. Nkulunkulu uhlale enta lokulungile. “Imisebenti yakhe iphelele” futsi ‘akakwenti lokubi.’​—Dutheronomi 32:4.

Lutsandvo. LiBhayibheli litsi “Nkulunkulu ulutsandvo.” (1 Johane 4:8) Nkulunkulu akagcini ngekukhombisa lutsandvo, kodvwa ungilo. Konkhe lakwentako ukwenta ngenca yelutsandvo lolukhulu lanalo futsi luyasizuzisa ngetindlela letinyenti.

Bungani BaNkulunkulu Nebantfu. Nkulunkulu unguBabe wetfu wasezulwini lonelutsandvo. (Matewu 6:9) Nasimetsemba, singaba bangani bakhe. (Tihlabelelo 25:14) Ecinisweni, Nkulunkulu ukumema kutsi usondzele kuye ngemthantazo futsi ‘uphonse konkhe kukhatsateka kwakho kuye, ngobe uyakukhatsalela.’​—1 Phetro 5:7; Jakobe 4:8.

Jesu Akasuye Nkulunkulu. Jesu wehlukile, nguye kuphela umuntfu lowadalwa nguNkulunkulu ngalokucondzile. Kungako liBhayibheli limbita ngekutsi yiNdvodzana yaNkulunkulu. (Johane 1:14) Ngemuva kwakudala Jesu, Jehova wasebentisa lelitibulo lakhe “njengengcweti yekwakha” kuze adale tonkhe tintfo nabo bonkhe bantfu.​—Taga 8:30, 31; Kholose 1:15, 16.

 Jesu Khristu akazange atsi unguNkulunkulu. Kunaloko, wachaza watsi: “Ngiphuma kuye [Nkulunkulu], futsi nguye longitfumile.” (Johane 7:29) Ngesikhatsi akhuluma nalomunye webafundzi bakhe, Jesu wabita Jehova ngekutsi ‘nguBabe longuYihlo, naNkulunkulu wami longuNkulunkulu wenu.’ (Johane 20:17) Ngemuva kwekufa kwaJesu, Jehova wamvusela ekuphileni kwasezulwini futsi wahlala ngesekudla sakhe wamnika ligunya lelikhulu.​—Matewu 28:18; Imisebenti 2:32, 33.

Jesu Khristu Angakusita Usondzele KuNkulunkulu

Jesu weta emhlabeni kute atosifundzisa ngaBabe wakhe. Jehova ngekwakhe watsi ngaJesu: “Lena yiNdvodzana yami letsandzekako, yilaleleni.” (Makho 9:7) Jesu umati kancono Nkulunkulu kwendlula nome ngubani lomunye. Watsi: “Kute nalomati kahle Babe ngaphandle kweNdvodzana kanye nanobe ngubani iNdvodzana lefuna kumembula kuye.”​—Lukha 10:22.

Jesu ubukhombisa kahle kakhulu buntfu baNkulunkulu. Jesu wabulingisa kahle buntfu baBabe wakhe waze watsi: “Loyo longibonile mine umbonile naBabe.” (Johane 14:9) Jesu wadvonsela bantfu kuNkulunkulu ngekulingisa lutsandvo lwaBabe wakhe ngemavi nangetento. Watsi: “Mine ngiyindlela neliciniso nekuphila. Kute umuntfu lota kuBabe ngaphandle kwekutsi ete ngami.” (Johane 14:6) Waphindze watsi: “Emakholwa eliciniso atawukhonta Babe ngemoya nangeliciniso, ngobe Babe ufuna kukhontwa ngulabanjalo.” (Johane 4:23) Asewucabanga nje! Jehova ufuna bantfu labafana nawe labafuna kwati liciniso ngaye.