NGALOKUVAMILE bantfu bafuna kuphila imphilo lejabulisako. Kodvwa kulamalanga ekugcina, bonkhe bantfu bahlangabetana netinkinga “lokumatima kubhekana nato.” (2 Thim. 3:1) Kungalungi, tinkinga temphilo, kweswela umsebenti, kulila, naletinye tintfo letibangela kukhatsateka nebuhlungu tingabangela kutsi kancane kancane bantfu balahlekelwe yinjabulo labanayo. Ngisho netinceku taJehova tingadvumateka futsi tiphelelwe yinjabulo. Nangabe loku kuke kwenteka kuwe, ungaphindze uyitfole njani injabulo?

Kute siphendvule lombuto, kufanele sicale sicondze kutsi iyini injabulo sibili nekutsi yini labanye labayentile kute bahlale bajabulile noma banetinkinga. Sitawubese sifundza ngekutsi yini lesingayenta kute silondvolote injabulo lesinayo siphindze siyikhulise.

Injabulo sibili ayifani nekutsakasa. Nasi sibonelo: Nakacedza kunatsa kakhulu tjwala futsi sekadzakiwe, umuntfu angativa ajabule kakhulu, alibale kuhleka. Noma kunjalo, nabuphela lotjwala, ubese akasahleki futsi tinkinga netinhlungu lanato tiyabuya. Kutsakasa kwakhe kwangaleso sikhatsi akusiyo injabulo.​—Taga 14:13.

Ngalokwehlukile, injabulo ibuntfu lobutfolakala enhlitiyweni. Ichazwe ngekutsi “ingumuva wekujabula lotfolakala nangabe sitfole lokuhle noma sikugadzile.” Injabulo isimo sekujabula lesingapheli noma ngabe timo lesibhekene nato titinhle noma titimbi. (1 Thes. 1:6) Ecinisweni, umuntfu angaphatamiswa yintfo letsite kepha achubeke ajabula. Nasi sibonelo, baphostoli bashaywa ngenca yekukhuluma ngaJesu. Noma kunjalo “besuka kuleNkantolo YemaJuda bajabulile ngobe bebakufanele kuhlazwa ngenca yelibito laJesu.” (Imis. 5:41) Kuliciniso kutsi bebangajatjuliswa ngulokushaywa, kodvwa njengetinceku taJehova batfola injabulo sibili ngekugcina bucotfo babo.

Asitalwa sinalenjabulo; futsi ayimane nje ibekhona. Kungani? Kungobe injabulo sibili ingulenye yetitselo temoya waNkulunkulu. Ngelusito lwemoya longcwele singakhona kuba ‘nebuntfu lobusha,’ lobufaka ekhatsi injabulo. (Ef. 4:24; Gal. 5:22) Nangabe sinenjabulo, siyakhona kuhlangabetana netinkinga tekuphila.

Jehova bekafuna kutsi kube netintfo letinhle emhlabeni, hhayi letintfo letimbi lesitibonako lamuhla. Noma kunjalo, tintfo letimbi letenteka lamuhla atiyicedzi injabulo Jehova lanayo. LiVi laNkulunkulu litsi: “Emandla nenjabulo kusendlini yakhe lengcwele.” (1 Khr. 16:27) Ngetulu kwaloko, Jehova uyajabula ngetintfo letinhle letentiwa tinceku takhe.​—Taga 27:11.

Singalingisa Jehova ngekutsi singakhatsateki ngalokwecile nangabe tintfo tingahambi ngendlela lebesiyilindzele. Kunekutsi silahlekelwe yinjabulo lesinayo, singanaka tintfo letinhle  lesinato nyalo siphindze silindzele tintfo letinhle letitako. *

Sinetibonelo letinyenti eBhayibhelini tebantfu labahlala bajabulile ngisho noma bahlangabetana netimo leticindzetelako. Abrahama ngulomunye webantfu lababeketelela timo letimatima letabangelwa ngulabanye bantfu. (Gen. 12:10-20; 14:8-16; 16:4, 5; 20:1-18; 21:8, 9) Noma kunjalo, Abrahama wahlale ajabulile ngetulu kwekucindzeteleka. Wakwenta njani loko? Ngalokucacile, bekanelitsemba lekuphila emhlabeni lomusha ngaphasi kwekubuswa nguMesiya. (Gen. 22:15-18; Heb. 11:10) Jesu watsi: “Uyihlo Abrahama wajabula kakhulu nakutsiwa utawubona lilanga lami.” (Joh. 8:56) Singalingisa Abrahama ngekutsi sicabange ngenjabulo lesitayitfola esikhatsini lesitako.​—Rom. 8:21.

Njenga-Abrahama, umphostoli Pawula kanye nemngani wakhe Silasi bebanake tetsembiso taNkulunkulu. Bebanekukholwa lokucinile, futsi bebahlale bajabulile ngisho noma bebahlangabetana netimo letimatima. Nasi sibonelo, ngemuva kwekushaywa kabuhlungu futsi baboshwa, “ekhatsi nebusuku, bathantaza, baphindze badvumisa Nkulunkulu ngetingoma.” (Imis. 16:23-25) Ngetulu kwaloko bachubeka bajabula ngobe bebahlushwa ngenca yelibito laKhristu. Singalingisa sibonelo saPawula naSilasi ngekutsi sihlale sicabanga ngetintfo letinhle lesititfola ngekukhonta Nkulunkulu ngekwetsembeka.​—Fil. 1:12-14.

Lamuhla kunetibonelo tebazalwane labanyenti labahlala bajabulile ngisho noma bahlangabetana netinkinga. Nasi sibonelo, ngaNovember 2013 siphepho lesikhulu lesibitwa ngekutsi nguHaiyan lebesisePhilippines, sabhidlita emakhaya aBoFakazi langetulu kwa-1 000. George lowabhidlikelwa likhaya lebelisedolobheni laseTacloban utsi: “Ngisho noma kwaba nesiphepho, bazalwane bayajabula. Kulukhuni kuchaza indlela lesijabule ngayo.” Noma ngabe sihlangabetana nebulukhuni sitawuhlale sijabula nangabe sicabanga ngetintfo Jehova lasentele tona. Yini lenye Jehova lasentele yona lesiniketa sizatfu lesihle sekujabula?

Kute lesinye sizatfu lesikhulu sekuba nenjabulo kwendlula kuba nebuhlobo lobuhle naJehova. Ase ucabange: Siyamati uMbusi wendalo yonkhe. UnguBabe wetfu, Nkulunkulu wetfu, kanye neMngani wetfu!​—Hla. 71:17, 18.

Sisitsatsa njengalesiligugu sipho sekuphila kanye nelikhono lekujabulela kuphila. (Shu. 3:12, 13) Njengetidalwa letihlakaniphile letidvonswe nguJehova, siyayicondza intsandvo yakhe ngatsi. (Khol. 1:9, 10) Kungako sinenjongo ekuphileni kwetfu. Ngakulolunye luhlangotsi, bantfu labanyenti abayicondzi kahle injongo yekuphila. Akhuluma ngalomehluko, Pawula watsi: “‘Liso alikakuboni, indlebe ayikakuva, nenhlitiyo yemuntfu ayikakucondzi loko Nkulunkulu lakulungiselele labo labamtsandzako.’ Loku Nkulunkulu ukwembule kitsi ngemoya wakhe.” (1 Khor. 2:9, 10) Asijabuli yini ngekucondza intsandvo yaJehova kanye nenjongo yakhe?

Cabanga ngetintfo Jehova latentele bantfu bakhe. Asijabuli yini ngekutsi tono tetfu tingatsetselelwa? (1 Joh. 2:12) Ngenca yemusa waNkulunkulu, sinelitsemba lekutsi umhlaba lomusha utawufika masinyane. (Rom. 12:12) Nanyalo, Jehova usinikete bazalwane labanyenti lesikhonta nabo. (Hla. 133:1) LiVi laNkulunkulu liphindze lisicinisekise kutsi Jehova uyabavikela bantfu bakhe kuSathane kanye nemadimoni akhe. (Hla. 91:11) Nasizindla ngaletibusiso lesitinikwa nguNkulunkulu, sitawubona injabulo yetfu ikhula.​—Fil. 4:4.

UmKhristu lojabulako angayikhulisa yini injabulo yakhe? Jesu watsi: “Letintfo ngitikhulume kini khona injabulo lenginayo nani  nibe nayo, futsi iphelele.” (Joh. 15:11) Loku kukhombisa kutsi singakhona kukhulisa injabulo yetfu. Ungacatsanisa imetamo yakho yekukhulisa injabulo nekubasa umlilo. Kufanele uchubeke ufaka tinkhuni kuze lomlilo ushise kakhulu. Ngalokufanako, kuze ukhulise injabulo yakho kufanele ucinise buhlobo bakho naJehova. Khumbula kutsi umoya waNkulunkulu ngiwo losinika injabulo. Ngekuhlale ucela lusito lwemoya waJehova ngekuthantaza nangekuzindla ngeliVi lakhe liBhayibheli, utawutfola injabulo lenkhulu.​—Hla. 1:1, 2; Luk. 11:13.

Ungaphindze ukhulise injabulo yakho ngekwenta imisebenti lejabulisa Jehova. (Hla. 35:27; 112:1) Kungani? Kungobe sadalelwa kutsi ‘sesabe Nkulunkulu, sigcine imiyalo yakhe, kute lokunye lokungetulu kwaloko lokudzingekako kumuntfu.’ (Shu. 12:13) Ngalamanye emavi, sadalelwa kutsi sente intsandvo yaNkulunkulu. Ngako nasikhonta Jehova, sitfola injabulo sibili ekuphileni. *

Njengoba sikhulisa injabulo yetfu ngekukhonta Nkulunkulu, sitawutfola tinzuzo letinyenti. Nasi sibonelo, Jehova ujabula kakhulu nangabe simkhonta ngenjabulo ngisho noma sihlangabetana natiphi tinkinga. (Dut. 16:15; 1 Thes. 5:16-18) Ngetulu kwaloko, ngesizatfu sekuba nenjabulo sibili, sitawugwema kunaka umcebo walelive futsi esikhundleni saloko sitawudzela tintfo letinyenti ngenca yeMbuso waNkulunkulu. (Mat. 13:44) Nangabe sibona imiphumela lemihle, injabulo yetfu itawukhula, sibe nemphilo lenhle siphindze sente nalabanye bajabule.​—Imis. 20:35; Fil. 1:3-5.

Lomunye umcwaningi wetemphilo waseNyuvesi yaseNebraska, eMelika wabhala kutsi: “Nangabe ujabulile futsi wenetisekile emphilweni, manyenti ematfuba ekutsi ube nemphilo lenhle esikhatsini lesitako.” Loko kuvumelana neliBhayibheli nalitsi: “Kuhlala ujabulile kungumutsi lophilisako.” (Taga 17:22) Nangabe ukhulisa injabulo yakho, kunematfuba lamanyenti ekutsi ube nemphilo lekahle.

Noma siphila etikhatsini letisikhatsatako, singaba nenjabulo sibili nalehlala njalo nangabe sicela lusito lwemoya longcwele ngemthantazo, ngekudadisha kanye nangekuzindla ngeliVi laNkulunkulu. Siphindze sikhulise injabulo yetfu nasicabanga ngetibusiso lesitijabulelako, nasilingisa kukholwa kwalabanye kanye nekufuna kwenta intsandvo yaNkulunkulu. Ngaletindlela singakhombisa kutsi uliciniso umBhalo weTihlabelelo 64:10 lotsi: “Lolungile uyawujabula ngaSimakadze, akhosele kuye.”