1, 2. Yini ngamunye wetfu lokufanele aciniseke ngayo? (Buka sitfombe lesisekucaleni kwalesihloko.)

NJENGOBA sifundzile esihlokweni lesendlulile, Develi utsi Jehova ubusa ngendlela lengakafanele nekutsi bantfu bangaphila kahle nabangatibusa. Ucinisile yini vele Sathane? Asesitsi bantfu labakhetsa kutibusa baphila phakadze. Bebatawuphila ncono yini ngaphandle kwekubuswa nguNkulunkulu? Bewutawujabula yini kube bewutibusa futsi uphila phakadze?

² Kute longakuphendvulela lemibuto. Sonkhe kufanele sicabangisise ngalendzaba. Nasenta njalo, kutawuba sebaleni kutsi kubusa kwaNkulunkulu ngiko lokulungile. Kubusa kwakhe ngiko lokuncono kakhulu. Ngako kubalulekile kutsi sibusekele ngenhlitiyo yetfu yonkhe. LiBhayibheli lisiniketa tizatfu tekukukholelwa loku. Cabanga ngaloko imiBhalo lesitjela kona ngelilungelo laJehova lekubusa.

3. Kungani Jehova kunguye kuphela lonelilungelo lekubusa?

³ Jehova uyakufanelekela kuba nguMbusi wendzawo yonkhe ngoba unguNkulunkulu lophakeme neMdali lomkhulu. (1 Khr. 29:11; Imis. 4:24) Ku-Sembulo 4:11, labangu-144 000 labatawubusa  kanye naKhristu ezulwini, bavetwa embonweni batsi: “Kukufanele Jehova Nkulunkulu wetfu kwemukela inkhatimulo, ludvumo, nemandla, ngobe wadala tonkhe tintfo, nangentsandvo yakho taba khona futsi tadalwa.” Liciniso, ngenca yekutsi Jehova wadala tonkhe tintfo, unelilungelo lekubusa sonkhe sintfu kanye netidalwa letisezulwini.

4. Kungani kuvukela bukhosi baNkulunkulu kukulisebentisa kabi lilungelo lekutikhetsela?

⁴ Kute lokwadalwa nguSathane. Ngaleso sizatfu, ute sanhlobo lilungelo lekubusa indzawo yonkhe. Ngekuvukela bukhosi baJehova, yena nebantfu lababili bekucala bo-Adamu na-Eva, baveta umoya wekutikhukhumeta. (Jer. 10:23) Liciniso, njengoba bebatidalwa lebetinelilungelo lekutikhetsela, bebangakhetsa kungabuswa nguNkulunkulu. Noma kunjalo, loko bekubanika lilungelo lekwenta njalo yini? Cha. Lilungelo lekutikhetsela lisita bantfu kutsi bente tincumo letikahle onkhe malanga. Noma kunjalo, kuba nelilungelo lekutikhetsela akusho kutsi sekufanele bahlubuke kuMdali wabo longuMniki-Kuphila. Kuyacaca-ke kutsi kuvukela Jehova kukulisebentisa kabi lilungelo lekutikhetsela. Njengebantfu, indzawo yetfu ingephansi kwekubusa kwaJehova lokulungile.

5. Yini lesenta siciniseke kutsi tincumo taJehova tilungile?

⁵ Kunalesinye sizatfu lesenta Jehova kube nguye umbusi lofanele. Lilungelo lakhe lekubusa ulisebentisa kahle. Jehova utsi: “NginguSimakadze lophatsana ngemusa, ehlulele ngekwemtsetfocotfo, abuse nangekulunga emhlabeni, ngobe ngiyajabula-ke kuloko.” (Jer. 9:24) Akayisebentisi imitsetfo lebhalwe bantfu labanesono kute ancume kutsi ngukuphi lokukahle nalokulungile. Ngesizatfu sekutsi kulunga kubuntfu bakhe, unike bantfu imitsetfo lebhalwe eBhayibhelini. LiBhayibheli litsi: “Kulunga nebucotfo tisekelo tesihlalo sakho sebukhosi.” Ngako ke, singaciniseka kutsi yonkhe imitsetfo yakhe, netimiso, kanye netincumo takhe tilungile. (Hla. 89:14; 119:128) Ngalokwehlukile kuloku, nanobe Sathane atsi kubusa kwaJehova akukalungi, kodvwa wehlulekile kwenta umhlaba ube yindzawo lenekulunga.

6. Ngusiphi sizatfu lesenta Jehova abe nelilungelo lekubusa umhlaba?

⁶ Ngetulu kwaloko, Jehova nguye umbusi lofanele ngoba nguye lonelwati nekuhlakanipha lokudzingekile kute anakekele indalo yakhe. Asewucabange nje nganaku, Nkulunkulu wenta kutsi iNdvodzana yakhe ikhone kwelapha tifo bodokotela lebebangakhoni kutelapha. (Mat. 4:23, 24; Mak. 5:25-29) KuJehova, loku bekungasiso simangaliso. Uyakucondza loko lokwentekako futsi unelikhono lekususa noma ngabe ngumuphi umonakalo. Jehova angakhona kuphindze avuse labafile kanye nekuvimbela tinhlekelele temvelo.

7. Kuhlakanipha kwaJehova kwehluke njani kuloko lokukhona kulelive lelibuswa nguSathane?

⁷ Live lelibuswa nguSathane solo alikhoni kucedza kungevani lokukhona emhlabeni. NguJehova kuphela longaletsa kuthula emhlabeni wonkhe. (Isa. 2:3, 4; 54:13) Njengobe sichubeka sifundza ngelwati Jehova lanalo kanye nekuhlakanipha kwakhe, sitawutiva njengemphostoli Pawula lowatsi: “Maye tinyenti tibusiso taNkulunkulu, futsi kuhlakanipha nelwati lwakhe kujule kakhulu! Kwehlulela kwakhe akuphenyeki, netindlela takhe ngeke size siticondze!”​—Rom. 11:33.

8. Yini lekutsintsa inhlitiyo ngendlela Jehova labusa ngayo?

⁸ LiBhayibheli lisitjela tintfo letinyenti letimayelana nelilungelo laJehova lekubusa. Lisitjela kutsi kungani kubusa kwakhe kuncono kunekwalabanye. Lesinye sizatfu kutsi ubusa ngelutsandvo. Kuliciniso kutsi tinhlitiyo tetfu tiyatsintseka nangabe sibona indlela Jehova lasebentisa ngayo bukhosi bakhe. Jehova nguNkulunkulu “lonesihawu nemusa;  uyephuta kutfukutsela andze ngemusa nangekwetsembeka.” (Eks. 34:6) Nkulunkulu uphatsa bantfu labamkhontako ngesizotsa nangenhlonipho. Usinakekela ngendlela lengetulu kwaleyo lesingatinakekela ngayo tsine. Ngalokwehlukile kuloko Develi lakushoko, Jehova akatigodleli lutfo loluhle tikhonti takhe letetsembekile. Ingani wanikela ngendvodzana yakhe leligugu kute sibe nelitsemba lekuphila phakadze!​—Fundza Tihlabelelo 84:11; Roma 8:32.

9. Sati njani kutsi Nkulunkulu uphindze akhatsalele umuntfu ngamunye?

⁹ Jehova akanaki nje kuphela kutsi bantfu baphila njani. Uphindze anake sidzingo semuntfu ngamunye. Cabanga ngaloko lokwenteka emakhulwini lamatsatfu eminyaka, ngalesikhatsi Jehova abeka behluleli futsi abanika emandla kute bakhulule sive sema-Israyeli ekugcilatweni. Ngaleso sikhatsi lesimatima, Jehova akehlulekanga kunaka sihambi lebesinguRuthe. Lokujabulisako kutsi Ruthe watidzela kute agucukele ekukhonteni kweliciniso. Jehova wabusisa Ruthe ngendvodza nangendvodzana. Kodvwa akupheleli lapho. Nasekufike sikhatsi sekutsi Ruthe avuswe kulabafile, utawujabula nakafundza ngekutsi indvodzana yakhe yaba seluhlwini lwelutalo lolwaholela kuMesiya. Cabanga nje kutsi uyawutiva njani nakavuka atfola kutsi umlandvo wekuphila kwakhe wabhalwa eBhayibhelini futsi kwaba nencwadzi leyabitwa ngeligama lakhe!​—Rut. 4:13; Mat. 1:5, 16.

10. Kungani bukhosi baJehova bungacindzeteli muntfu?

¹⁰ Indlela yaJehova yekubusa ayicindzeteli futsi ayikacini kakhulu. Ivumela kutsi bantfu bakhululeke futsi bajabule. (2 Khor. 3:17) Davide wakuveta ngalendlela loku, watsi: “Ludvumo nebukhosi kusembikwakhe, emandla nenjabulo kusendlini yakhe lengcwele.” (1 Khr. 16:7, 27) Ngendlela lefanako umhlabeleli Ethani watsi: “Sibusisiwe sive lesati kahle kutsi kuyini kumpompoloza ngenjabulo, sihambe ekukhanyeni kwebuso bakho. Lesive sijabula njalo nje egameni lakho, siphakanyiswe ngenca yekulunga kwakho.”​—Hla. 89:15, 16.

11. Yini lesenta siciniseke kutsi kubusa kwaJehova ngiko lokuncono kakhulu?

¹¹ Kuhlala sizindla ngekulunga kwaJehova kungasenta siciniseke kutsi kubusa kwakhe ngiko lokuncono kakhulu. Sitawutiva njengemhlabeleli lowatsi: “Lilanga linye etibuyeni tendlu yakho, lincono kunalayinkhulungwane lacitselwe ngaphandle.” (Hla. 84:10) Kungenteka njani loku? Njengemsunguli wekuphila kanye nemdali, Jehova uyakwati lesikudzingako kute sijabule futsi leso sidzingo usigcwalisa ngendlela leyenetisako. Nobe ngabe yini lalindzele kutsi siyente izuzisa tsine. Letinzuzo tihlala tikhona ngisho nalapho loko lakufunako kudzinga kutsi sitidzele nasikwenta.​—Fundza Isaya 48:17.

12. Siyini sizatfu lesiyinhloko lesisenta sifune kusekela bukhosi baJehova?

¹² LiBhayibheli lisitjela kutsi ngemuva kweminyaka leyiNkhulungwane yekubusa kwaKhristu, labanye bantfu batawukhetsa kuvukela bukhosi baJehova. (Semb. 20:7, 8) Yini letawukwenta labantfu kutsi bavukele? Develi lotawube sekakhululiwe utawube atimisele kudukisa bantfu ngekutsi abente balalele yena. Nguloko lebekasolo akwenta. Kungenteka etame kwenta bantfu bacabange kutsi kunalenye indlela yekutfola kuphila lokuphakadze ngaphandle kwekulalela Jehova. Loku kuyobe kungemanga laluhlata. Umbuto lobalulekile lesingatibuta wona utsi: Siyowalalela yini lamanga akhe? Nangabe simtsandza Jehova futsi simkhonta ngenca yekulunga kwakhe nangesizatfu sekutsi nguye uMbusi lonelilungelo lekubusa indzawo yonkhe, emachinga aDeveli ngeke asebente. Ngeke sifune kuphila ngaphandle kwekubuswa nguJehova lonelilungelo lekubusa kanye nalonelutsandvo.

13. Nangabe silingisa Nkulunkulu sisuke sikhombisa njani kutsi siyamsekela?

¹³ Kuliciniso kutsi bukhosi baJehova kufanele sibusekele ngenhlitiyo yetfu yonkhe. Njengoba sesibonile, Jehova unelilungelo lekubusa futsi indlela yakhe yekubusa ngiyo lencono kakhulu. Singabusekela bukhosi baJehova ngekutsi sigcine bucotfo betfu futsi simkhonte ngekwetsembeka. Nguyiphi lenye indlela lesingamsekela ngayo? Loko singakwenta ngekutsi sente tintfo ngendlela Jehova latenta ngayo. Nasenta njalo sitawube sikhombisa kutsi siyamtsandza futsi siyayisekela indlela labusa ngayo.​—Fundza Efesu 5:1, 2.

14. Emadvodza lamadzala elibandla kanye netinhloko temindeni bangamlingisa njani Jehova?

¹⁴ Nasitadisha liBhayibheli, sifundza kutsi Jehova usebentisa ligunya lakhe ngendlela lenelutsandvo. Ngekuvumelana naloku, tinhloko temindeni kanye nemadvodza lamadzala elibandla latsandza bukhosi baJehova ngeke bafune tintfo tentiwe ngenkhani, kungazutsi nabo bangemakhosi. Kunaloko batawulingisa Jehova. Pawula bekalingisa Nkulunkulu kanye neNdvodzana yakhe. (1 Khor. 11:1) Pawula akazange abahlaze labanye noma abacindzetele kute bente loko lakufunako. Kunaloko wabancenga. (Rom. 12:1; Ef. 4:1; Flm. 8-10) Lena yindlela yaJehova yekwenta tintfo. Ngako-ke, lena kufanele kube yindlela yabo bonkhe labatsandza indlela yakhe yekubusa futsi baphindze bayisekele.

15. Kuhlonipha lilungiselelo laJehova lekubusa kuluveta kanjani lutsandvo lwetfu ngendlela yakhe yekubusa?

¹⁵ Sitiva njani ngelilungiselelo lebunhloko lelimiswe nguJehova? Nangabe sibambisana ngenhlonipho nalabo labaholako, sisuke sikhombisa kutsi sisekela bukhosi baJehova. Ngisho noma singasicondzi kahle sincumo labasitsetse, noma singavumelani naso, kodvwa sitawuchubeka sisekela sicondziso lesivela kuNkulunkulu. Kuliciniso kutsi bantfu  labakulelive abakutsandzi kucondziswa, kodvwa kitsi kulalela sicondziso kuyindlela yekubuswa nguJehova. (Ef. 5:22, 23; 6:1-3; Heb. 13:17) Siyazuza ngekwenta njalo, ikakhulukati ngobe Nkulunkulu uhlala asifunela lokuncono.

16. Labo labasekela bukhosi baJehova batenta njani tincumo letitsintsa bona?

¹⁶ Singaphindze sikhombise kutsi sisekela bukhosi baNkulunkulu nasenta tincumo letitsintsa tsine. Jehova akasiniketi ticondziso leticondzile ngaso sonkhe sikhatsi nasenta tincumo. Kunaloko, nangabe asicondzisa uyasitjela sizatfu sakhe sekusicondzisa. Nasi sibonelo, Jehova akasiniketi ticondziso leticondzile mayelana nendlela emaKhristu lokufanele agcoke ngayo. Kunaloko, uveta indlela lativa ngayo ngekutsi afune sigcoke ngendlela lekahle siphindze sitilungise ngendlela lenesizotsa nalefanele emaKhristu. (1 Thim. 2:9, 10) Ngetulu kwaloko akafuni kutsi sikhube labanye noma sibaphatamise ngetincumo tetfu. (1 Khor. 10:31-33) Nangabe sinaka indlela lesenta ngayo, sente loko lokufunwa nguJehova hhayi loko lokufunwa ngitsi, sisuke sikhombisa kutsi siyayitsandza indlela yakhe yekubusa futsi siyayisekela.

17, 18. Ngutiphi letinye tindlela bantfu labashadene labangakhombisa ngato kutsi basekela bukhosi baNkulunkulu?

¹⁷ Cabanga ngendlela emaKhristu lashadene langasekela ngayo tindlela taJehova kanye nebukhosi bakhe. Kutsiwani nangabe imphilo yalabo labashadene iba lukhuni kunaloko lebebakulindzele? Kungenteka sebayatisola ngekutsi bashadelani. Mhlawumbe kungabasita kucabanga ngendlela Jehova lasekela ngayo ema-Israyeli. Watifananisa nendvodza yaleso sive sasendvulo. (Isa. 54:5; 62:4) Lowo ‘bekungumshado’ lobewulukhuni kakhulu! Noma kunjalo, Jehova akazange asheshe alahle litsemba ngawo. Wachubeka asikhombisa sihawu lesive futsi wetsembeka esivumelwaneni lebekasente naso. (Fundza Tihlabelelo 106:43-45) Asitiva yini sisondzele kuJehova ngenca yalokwetsembeka kwakhe?

¹⁸ Ngendlela lefanako labo labashadile labatsandza tindlela taJehova bayamlingisa. Abafuni tindlela letingakasekelwa emiBhalweni kute nje baphume emshadweni longajabulisi. Bayabona kutsi Jehova ubahlanganisile futsi ufuna ‘banamatsele’ kulomunye nalomunye. Sizatfu lokukuphela kwaso lesisemiBhalweni lesingenta umuntfu ehlukane nalona lashade naye, kuphinga. (Mat. 19:5, 6, 9) Nangabe laba labashadene balubeketelela lusizi lababhekane nalo futsi betama kusenta sibe ncono lesimo, basuke bakhombisa kutsi basekela kubusa kwaJehova lokulungile.

19. Nangabe sihle sehluleka kusekela bukhosi baNkulunkulu, yini lokufanele siyente?

¹⁹ Njengobe sinesono, ngaletinye tikhatsi singahle sente tintfo letingamjabulisi Jehova. Naye uyakwati loko, kungako nje lutsandvo lwakhe ngatsi lwamshukumisela kutsi asilungiselele sihlengo ngaKhristu. Ngako, nangabe sente liphutsa, kufanele sicele Jehova kutsi asitsetselele. (1 Joh. 2:1, 2) Kunekutsi silibale kulila ngaloko lokwentekile, kufanele sitimisele kufundza kulelo phutsa. Nangabe sichubeka sisondzelana naJehova, utawusicolela futsi asisite kutsi selulame siphindze sikhone kusingatsa timo letimatima esikhatsini lesitako ngendlela lephumelelako.​—Hla. 103:3.

20. Kungani kufanele sisekele bukhosi baJehova nyalo?

²⁰ Eveni lelisha, bonkhe bantfu batawuba ngephansi kwekubuswa nguJehova futsi batawufundza tindlela takhe letilungile. (Isa. 11:9) Noma kunjalo, tsine sesivele siyayitfola lemfundvo. Sekusedvutane kutsi kufike sikhatsi lapho kutawuba bete losola kufaneleka kwebukhosi baJehova. Nyalo sikhatsi sekusekela bukhosi baNkulunkulu ngekutsi setsembeke, sente umsebenti wekushumayela, futsi setame kumlingisa kuko konkhe lesikwentako.