UNAKILE yini kutsi bantfu labanyenti kulelive bacabanga kutsi kufanele baphatfwe ncono kunalabanye? Ngisho nobe batfola lokunyenti kanganani, bachubeka bacabanga kutsi kufanele batfole lokunyenti kakhulu. Bantfu labacabanga ngalendlela baticabangela bona futsi ababongi ngaloko labanako. Nguloko liBhayibheli lelakusho ngebantfu bemalanga ekugcina.​—2 Thim. 3:2.

Akucali nyalo kutsi bantfu baticabangele bona. Bo-Adamu na-Eva bancuma kutikhetsela lokuhle nalokubi futsi loko kwaba nemiphumela lemibi kakhulu. Ngemuva kweminyaka leminyenti, iNkhosi Uziya yakaJuda, yacabanga kutsi beyinelilungelo lekushisa imphepho ethempelini kodvwa lelo bekuliphutsa lelikhulu kakhulu. (2 Khr. 26:18, 19) BaFarisi nebaSadusi nabo bebacabanga kutsi Nkulunkulu bekufanele abaphatse ngendlela lencono kunalabanye ngenca yekutsi basitukulwane sa-Abrahama.​—Mat. 3:9.

Siphila nebantfu labaticabangela bona nalabatikhukhumetako futsi lendlela labacabanga ngayo ingasitsintsa. (Gal. 5:26) Singahle sicale kucabanga kutsi kufanele sitfole sigaba lesitsite nobe siphatfwe ngendlela lekhetsekile. Singakugwema njani kucabanga ngalendlela? Kufanele sicale sitfole umbono waJehova ngalendzaba. Nati timiso teliBhayibheli letimbili letingasisita.

 NguJehova loncuma loko lokufanele sikutfole. Cabanga nganati tibonelo.

• Emndenini, indvodza kufanele ive kutsi umkayo uyayihlonipha nemfati kufanele eve kutsi indvodza yakhe iyamtsandza. (Ef. 5:33) Labashadene kufanele bente tintfo letikhombisa kutsi bayatsandzana futsi letintfo bangatenti kulabo labangakashadi nabo. (1 Khor. 7:3) Batali balindzele kutsi bantfwana babo babalalele futsi bantfwana balindzele kutsi batali babo babatsandze kakhulu baphindze babasekele.​—2 Khor. 12:14; Ef. 6:2.

• Ebandleni, labadzala belibandla labasebenta kamatima kufanele sibahloniphe. (1 Thes. 5:12) Nanobe kunjalo, bete lilungelo lekulawula loko lokwentiwa bazalwane babo nabodzadze.​—1 Phet. 5:2, 3.

• Nkulunkulu unikete bohulumende lilungelo lekufuna imitselo nekuhlonishwa.​—Rom. 13:1, 6, 7.

Ngenca yekutsi Jehova uyasitsandza usinikete tintfo letinyenti kakhulu kunaleto lokufanele ngabe siyatitfola. Ngenca yekutsi sinesono, sifanelwe kufa. (Rom. 6:23) Kodvwa Jehova usinikete tintfo letinyenti letinhle ngenca yekutsi usitsandza ngelutsandvo lolucotfo. (Hla. 103:10, 11) Tonkhe letibusiso sititfola ngoba unemusa lomkhulu.​—Rom. 12:6-8; Ef. 2:8.

Caphela umoya welive. Singakanaki, singahle sicale kucabanga kutsi kufanele sitfole lokunyenti kunalabanye. Jesu wakhombisa kutsi kumelula kucabanga ngalendlela ngesikhatsi asho umfanekiso wetisebenti letabhadalwa denariyo. Letinye tisebenti tacala kusebenta ekuseni kakhulu futsi tasebenta lilanga lonkhe elangeni lelishisako; kantsi letinye tasebenta li-awa linye nje. Laba labasebenta lilanga lonkhe bebacabanga kutsi kufanele batfole umholo loncono ngobe bebasebente kakhulu. (Mat. 20:1-16) Asebentisa lomfanekiso, Jesu wakhombisa kutsi balandzeli bakhe kufanele banetiswe nguloko Nkulunkulu labanika kona.

Bonga, ungafuni tintfo ngenkhani. (1 Thes. 5:18) Lingisa umphostoli Pawula longazange sekacele bazalwane bakhe nabodzadze baseKhorinte kutsi bamsekele ngetintfo lebekatidzinga ngisho nobe bekanelilungelo lekukwenta  loko. (1 Khor. 9:11-14) Kufanele sibonge ngetintfo lesititfolako futsi singafuni tintfo ngenkhani.

Tfobeka. Nangabe umuntfu atikhukhumeta, ubese ucala kucabanga kutsi kufanele atfole lokunyenti kunaloko lakutfolako. Kutfobeka kungasisita kutsi singacali sicabange ngalendlela leyingoti.

Umphofethi Danyeli wasibekela sibonelo lesihle sekutfobeka. Indlela lakhula ngayo, kubukeka kahle, kuhlakanipha kanye nemakhono akhe bekungamenta abone shengatsi kufanele aphatfwe ngalendlela lekhetsekile lebekaphatfwa ngayo futsi ente lemisebenti lebekayenta. (Dan. 1:3, 4, 19, 20) Nanobe kunjalo, Danyeli wahlale atfobekile futsi loko kwamenta waba ligugu kuJehova.​—Dan. 2:30; 10:11, 12.

Shengatsi singawugwema umoya wekuticabangela newekutikhukhumeta logcwele kulelive lamuhla. Kunaloko, shengatsi singachubeka sitfola injabulo kuto tonkhe tibusiso Jehova lasipha tona ngenca yemusa wakhe lomkhulu.