A yari baka dati mi bigin prei na ini felem. Na ini wan tu fu den felem disi mi ben de a moro prenspari sma. Nyunsuman ben wani interview mi, sma ben wani meki fowtow fu mi, sma ben e gi mi kari fu kon te wan felem ben o prei fu a fosi leisi noso te den ben o opo wan nyun presi. Mi ben e kisi kari tu fu go nyan nanga heihei sma. Ala ten mi ben de a moro prenspari sma na den presi disi.

Ma baka wan pisi ten mi kon si taki a libi disi no ben de so moi leki fa mi ben denki. Nofo tron mi ben e prei na ini felem pe sma e feti. Na ini son span pisi fu den felem, mi ben musu du kefalek sani di ben kan meki mi kisi hebi mankeri. Na ini Hollywood, a foto pe furu felem e meki na Amerkankondre, den gwenti poti wan tra sma di gersi a sma na ini a felem fu du den kefalek sani disi. Ma na ini Hong Kong den no ben e du disi furu tron. Sobun, na mi srefi ben musu du den sani disi, soleki fu rèi nanga wan bromfiets na tapu wan wagi. Furu fu den felem di mi prei na ini ben abi hurudu nanga ogridu. Sonwan fu den ben abi sani di abi fu du nanga ogri yeye srefi.

Na ini 1995 mi trow nanga wan man di e meki felem. A ben gersi leki mi ben abi ala sani di kan meki wan sma koloku. Mi ben abi biginen, furu moni nanga wan masra di lobi mi. Ma toku mi ben e sari èn mi ben e firi brokosaka doronomo. Dati meki mi bosroiti fu no prei na ini felem moro.

Mi bigin prakseri a bribi di mi ben abi di mi ben de wan pikin meisje. Mi ben memre fa mi ben e prisiri na a ten dati. Ibri satra mi nanga mi sisa ben e go na wan osofamiri di ben de Yehovah Kotoigi. A papa di ben nen Joe McGrath, ben e studeri Bijbel nanga wi makandra nanga den dri umapikin fu en. Yu ben kan si taki a famiri disi ben lobi makandra èn den ben abi switifasi tu. „Oom Joe” ben e lespeki en wefi nanga den pikin fu en. Mi ben lobi go na den Kresten konmakandra nanga den. Son leisi wi ben e go na den bigi  konmakandra tu. Mi ben de koloku na a ten dati. Na mindri den Kotoigi mi no ben e frede noti.

Ma na ososei sani no ben e go so bun. Den sani di mi papa ben e du ben meki mi mama sari srefisrefi èn ala ten a ben e firi brokosaka. Di mi ben abi sowan 10 yari, mi mama no ben wani bumui moro nanga Yehovah Kotoigi. Mi ben e dini Yehovah ete, ma mi no ben e du dati nanga mi heri ati. Ma toku mi dopu di mi ben abi 17 yari. Ma a no langa baka dati mi bigin du sani di no fiti gi wan Kresten èn mi no ben de wan memre fu a gemeente moro.

Syatu baka di mi trow, tu brada di e teki fesi na ini wan fu den gemeente fu Yehovah Kotoigi na ini a birti kon luku mi. Den sori mi fa mi kan drai kon baka na Yehovah Gado èn den seti sani so taki wan zendeling sisa di nen Cindy ben kan yepi mi. Ma na a ten dati mi ben e tweifri na son sani fu Bijbel. Dati meki mi aksi a sisa fu buweisi mi taki Bijbel na Gado Wortu trutru. A sori mi son profeititori di kon tru. Baka wan pisi ten wi tron bun mati. A aksi mi efu mi ben wani bigin nanga wan studie fu kon sabi den moro prenspari leri fu Bijbel. Mi agri fu du dati. A studie disi yepi mi fu kon frustan fu a fosi leisi taki Yehovah na wan Gado fu lobi èn taki a wani mi fu de koloku.

Di mi bigin go baka na den Kresten konmakandra, mi kon si taki mi ben lobi fu de nanga den Kotoigi moro leki den sma di mi ben sabi di mi ben e prei na ini felem. Ma son sani di pasa di mi ben yongu ben gi mi a firi taki mi no ben kan frutrow nowan sma èn mi no ben lobi misrefi tu. Ma wan sisa na ini a gemeente ben sori mi wan tu Bijbeltekst di kan yepi mi fu no abi den firi disi moro èn mi ben leri tu fa mi kan abi trutru mati.

Na ini 1997 mi nanga mi masra froisi go tan na Hollywood, Kalifornia, na ini Amerkankondre. Drape mi bigin du moro fu man yepi sma kisi wini fu Gado Wortu. A leri di mi e leri sma fu kon sabi Bijbel e meki mi prisiri moro leki a biginen di mi ben abi di mi ben e prei na ini felem. Fu eksempre, na ini 2002 mi miti Cheri di mi ben sabi sensi mi ben de na ini Hong Kong. Furu sani di ben pasa nanga mi ben pasa nanga en tu. A yari fosi mi tron Miss Hong Kong, Cheri ben de Miss Hong Kong. Na en ben weri a kroon gi mi di mi tron Miss Hong Kong. En srefi ben e prei na ini felem èn bakaten a ben e meki felem tu. A wroko makandra nanga sma di pôpi na ini a felem bisnis. Cheri srefi ben froisi go na Hollywood.

Mi ben sari srefisrefi di mi yere taki a man di ben o trow nanga Cheri ben kon dede fu di en ati tapu. Cheri no ben feni nowan trowstu na ini a Buda bribi pe a ben de. Neleki mi, a ben abi wan bigiten libi di furu sma wani, ma toku a ben e sari èn a no ben e frutrow nowan sma. Mi bigin fruteri en san mi ben leri fu Bijbel, ma fu di a ben de na ini a Buda bribi a no ben e frustan furu fu den sani di mi ben e taki.

Wan dei na ini 2003 Cheri bel mi di a ben de na Vancouver na ini Kanada. A ben de drape fu meki wan felem. Nanga prisiri a fruteri mi taki di a ben e rèi e luku den moi boitipresi drape, dan wantronso a bigin begi nanga wan tranga sten: „Taigi mi, suma na a tru Gado? San na yu nen?” Na a srefi momenti dati a ben e rèi pasa wan Kownukondre zaal, dan a si a nen Yehovah. Cheri ben feni taki disi na a piki di Gado gi en. Dati meki a ben wani miti den Yehovah Kotoigi so esi leki a man.  Mi seti sani so taki a ben kan miti den. Baka wan tu dei, Cheri go na wan konmakandra fu wan Sneisitongo gemeente na ini Vancouver.

Bakaten Cheri taigi mi: „Den sma disi lobi mi trutru. Mi no frede fu taigi den fa mi e firi.” Mi ben breiti fu yere dati, fu di ala den yari di Cheri ben de na ini a felem bisnis a no ben abi nowan mati. Cheri tan go na den konmakandra. Ma na ini 2005 a teken wan kontrakti fu meki tu langa felem na ini China. Dati meki a ben musu drai go baka na Hong Kong. Ma na ini 2006 mi ben breiti di mi yere taki Cheri gi en libi abra na Yehovah èn a teki dopu na wan konmakandra fu Yehovah Kotoigi na ini Hong Kong. A ben wani du moro gi Yehovah, ma a wroko fu en na ini a felem bisnis ben meki en muilek gi en fu du dati. A sani disi meki taki a no ben de koloku srefisrefi.

Na ini 2009 a heri libi fu Cheri kenki. A bosroiti fu komoto na ini a felem bisnis fu di a ben wani du moro gi Yehovah. A ben kon abi furu nyun mati na ini a Kresten gemeente. A ben bosroiti fu gebroiki furu fu en ten fu preiki a bun nyunsu fu a Kownukondre gi sma èn a ben breiti srefisrefi fu yepi sma kisi wan moro bun libi.—Mateyus 24:14.

Bakaten Cheri bosroiti fu leri Nepaltongo fu yepi den Kotoigi na ini Hong Kong di e preiki na ini a tongo disi. A grupu disi e kon bigi dei fu dei. Wan sani di mi musu fruteri, na taki sma no e poti prakseri na den sma fu Nepal di e tan na ini Hong Kong. Son sma no lobi den srefisrefi fu di den no sabi Ingrisitongo noso Sneisitongo bun èn fu di den abi tra gwenti. Cheri fruteri mi fa a lobi fu yepi den sma disi fu frustan Bijbel. Fu eksempre, di a ben e preiki na sma oso wan dei, a miti wan Nepal uma di ben sabi wan tu sani fu Yesus, ma a no ben sabi noti fu a tru Gado Yehovah. Cheri sori en na ini Bijbel taki Yesus ben e begi en Papa di de na ini hemel. Di na uma kon frustan taki a ben kan taki nanga a tru Gado na ini begi èn taki en nen na Yehovah, a teki a bun nyunsu nanga en heri ati. A no langa baka dati en masra nanga en umapikin bigin studeri Bijbel tu.—Psalm 83:18; Lukas 22:41, 42.

Di mi si omeni prisiri Cheri ben abi fu di a ben e preiki so furu, mi aksi misrefi: ’San e tapu mi fu du san Cheri e du?’ Na a ten dati mi srefi ben froisi go tan na Hong Kong baka. Mi teki a bosroiti fu seti mi libi na so wan fasi, taki mi ben kan gebroiki moro ten fu leri sma sani fu Bijbel. Mi kon si taki te mi e arki den sma èn mi e yepi den fu frustan Gado Wortu, mi e firi prisiri trutru.

Fu eksempre, mi ben studeri Bijbel nanga wan uma fu Vietnam. Fosi, a ben e sari ala ten èn a ben e krei furu tron. Ma now a abi prisiri na ini a libi èn a lobi fu de nanga den Kotoigi fu a gemeente na ini a birti fu en.

Mi nanga Cheri feni wan sani di bun omeni tron moro biginen. Wi ben e du ala sortu span sani na ini a felem bisnis èn wi ben kon pôpi. Ma wi de moro koloku now fu di wi e gi Yehovah Gado glori te wi e meki sma kon sabi en. Wi srefi ondrofeni taki Yesus ben abi leti di a taki: „Wan sma sa de moro koloku te a e gi sani, leki te a e kisi sani.”—Tori fu den apostel 20:35.