Milyunmilyun sma na heri grontapu e hori Kresneti fu difrenti reide ede. Sonwan e meki prisiri nanga mati nanga famiri. Trawan e prakseri Gado, noso den e gebroiki den ten fu yepi pôtiwan nanga sma di abi yepi fanowdu. Te yu luku en bun, dan den sani disi na bun sani. Ma dati no wani taki ete taki a fesa disi na wan bun fesa.

A fosi sani, na taki furu sma e hori Kresneti fu di den e bribi taki Yesus gebore na a dei dati. Ma furu historia skrifiman e taki dati nowan sma sabi o ten Yesus gebore. Wan buku e taki dati „noiti den fosi Kresten ben poti wan spesrutu dei leki a dei di Yesus gebore”, fu di den „no ben wani abi noti fu du nanga den gwenti fu sma di ben e anbegi falsi gado” (The Christian Book of Why). A moi fu sabi taki Bijbel no e taki dati Yesus ben e hori en eigi friyaridei noso a di fu trawan. Na presi fu dati, a taigi den bakaman fu en fu memre a dede fu en.—Lukas 22:19.

A di fu tu sani, na taki furu sabiman e agri taki furu sani di sma gwenti du na Kresnetiten, a no Kresten gwenti, ma na gwenti fu sma di ben e anbegi falsi gado. Dati na sani soleki Sinterklaas, kerstbon, gi kado, leti kandra, anga moi kransi, èn singi Kresneti singi. Luku san wan buku e taki fu sonwan fu den gwenti disi: „Wi e gi Kresneti kado èn wi e kisi kado, wi e anga moi kransi na ini oso èn na ini kerki, ma omeni fu wi sabi taki den sani disi na gwenti fu sma di ben e anbegi falsi gado?” (The Externals of the Catholic Church)

Fu di a gersi leki den sani disi no ogri, meki yu ben kan aksi yusrefi fu san ede a no bun fu du den. A di fu dri sani di wi o luku, o piki na aksi fu yu. Gado no feni en bun taki wi e moksi gwenti fu sma di e anbegi falsi gado, nanga a tru anbegi. Yehovah Gado ben meki en profeiti Amos taigi den tranga-ede Israelsma fu owruten: „Mi no lobi den fesa fu unu kwetikweti. Mi e tegu gi den . . .  Un tapu nanga a babari di unu e meki te unu e singi.”—Amos 5:21, 23.

Fu san ede a piri-ai gi den na a fasi dati? Luku san den sma fu a noordsei kownukondre Israel fu owruten ben e du. A fosi kownu fu den, Yerobeyam, ben poti gowtu mankaw na ini den foto Dan nanga Betel. Ne a gi a pipel deki-ati fu anbegi den mankaw disi na presi fu anbegi Yehovah na a tempel na ini Yerusalem, soleki fa a ben fiti. A kownu meki sma hori fesa tu èn a poti priester fu yepi a pipel fu hori den fesa disi.—1 Kownu 12:26-33.

A ben gersi leki den Israelsma ben e du wan bun sani. A no fu di den ben wani anbegi Gado èn fu di den ben wani taki a feni den bun, meki den ben e du a sani disi? A fasi fa Gado meki Amos nanga tra profeiti piri-ai gi den e sori krin fa Gado ben feni den sortu gwenti dati. Gado ben meki Maleaki taki: „Mi na Yehovah. Mi no kenki” (Maleaki 3:6). A sani disi no e sori fa Yehovah e denki fu den someni gwenti di sma abi na Kresnetiten?

Baka di milyunmilyun sma poti prakseri na den sani di wi luku na ini na artikel disi, dan den bosroiti fu no hori Kresneti moro. Now den e gebroiki den ten fu de makandra nanga mati nanga famiri èn fu yepi pôtiwan nanga sma di abi yepi fanowdu. Den e du dati o ten den wani, awansi sortu dei fu a yari. A sani disi e gi den prisiri èn den e firi koloku.